Hikayat Muda Seudang, Pt. 25; Meupisah

SEUNAMBONG CEURITA

Lheueh abeih dum doa yahwa geubeudoh
Hate geuh teuploh sumpah ka teulaksana
Meublah thoun geu preh si uroe gadoh
Tan le nyang mehmoh lam sisa masa

Wahee ee aneuek nyak Muda Seudang
Kajeut ta riwang malam rhap teuka
Ta takot seupot lam uteuen meugriwang
Hanjeut ta trajang sisat lam rimba

Muda Seudang sang brat that lam hate
Dak jeut bek dilee beudoh bak kubu
Baro trouh bak jrat sang brat bukon le
Sang han meuguna le arah geu tuju

Beudoh nyak Muda ngon ie mata reule
Han sampoe hate geu tinggai pusara
Adak pih seudeh meugom lam hate
Wajeb geu pante u nanggroe utara

Ayahwa amat geu meusu bagah
Gata bek gundah cara bloe guda
Lantang lon patok mayam limong blah
Jeut gata peuglah pajan na hareuta

Tajok keuh dilee meu siploh mayam
Keu tanda cinggram lon meuniaga
Bacut teuk sisa nyang limong mayam
Jeut gata reukam han lon boh masa

Geujok laju meuh di muda seudang
Cinggram si lantang keu yahwa amat
Jaroe geu mumat akad geulantang
Sisa meu utang bak yahwa amat

Abeh urusan langsong ek guda
Teubit lam rimba gisa u gampong
Meugreb trouh watee bak bineh teulaga
Geu ikat guda peubuet nyang limong

Lheuh sembahyang hana geu mayeum le
Malam ka trouh me buleuen tan punoh
Geu peu plueng guda ureueng nyan nan lhee
Meulet ngon watee geu plueng meusunoh

Guda geu pacu lam seupot malam
Hana geu tanggam bagah meugisa
Na sijeum jak nyak Muda geu langsam
Si lantang geu padam geu tawok ayahwa

Neu dong siat hai ayahwa amat
Ulon ka meuhat nibak simpang nyoe
Langsong lon balek arah u barat
Bak cut ti hayat lon piyoh malam nyoe

Teurimong geunaseh ka le that neu bantu
Ka neuba bak kubu almarhom ayahda
Doa lon lakee beu trouh bak nyang lon tuju
Ateueh nyang neu bantu syukor that raya

Kajeut lah meunan hai aneuek muda
Bak lon tok doa nyang jeut seureuta
Beukeuh meuhasee seugala reuncana
Beu meuseunia seugala nyang ta useuha

Seupot lah malam watee buleuen pet
Tamse sipalet han meupat taloe
Meunan geurawi udep punoh phet
Sang sang meuseupet deungon rampagoe

MEUSAMBONG

Bek tuwoe neubaca chit ata awai mangat meuho uram ngon ikue;

• Bhah dua plouh peuet Ziarah Kubu
• Bhah dua plouh lhee Jak Ziarah
• Bhah dua plouh dua Sahabat Pang Juhang
• Bhah dua plouh sa Han Sep Beulanja
• Bhah dua plouh Jak Bloe Guda
• Bhah sikureueng blah Langkah Phoun
• Bhah lapan blah Ie Mata Bungsu
• Bhah tujoh blah Meurumpok Ngon Guree
• Bhah nam blah Jangeuen Asmara
• Bhah limong blah Reuncana Keulana
• Bhah peut blah Nanggroe Ujong Utara
• Bhah lhee blah Tujoh Uroe Tujoh Malam
• Bhah dua blah Nasehat Poma
• Bhah siblah Senue
• Bhah Siploh Keunari Tujoh Rupa
• Bhah sikureueng Syarat Nikah
• Bhah lapan Haba Bahgia
• Bhah tujoh Aneuek Bungsu
• Bhah nam Mula Inti Ceurita
• Bhah limong Masa Abege Dua
• Bhah peuet Masa Abege Sa
• Bhah lhee Muda Lam Ayon
• Bhah dua Awai Phoun Mula
• Bhah sa Muqaddimah