Hikayat Muda Seudang, Pt. 18; Ie Mata Bungsu

SENAMBONG CEURITA

Taduek siat hai putroe bungsu
Bah ta deungo su tunangan gata
Jinoe jineuk jak siat teuk laju
Bagah meuseuru keunari tujoh rupa

Aisyah bungsu muka ka mirah
Malee geuh leupah han jiteubit su
Geuduek di sampeng abu meu siblah
Geuneuek deungo bhah haba di abu

Teuma geu narit Abu Peh Tima
Hai sinyak Muda ngon peu taneuek jak
Leupah that jioh nanggroe utara
Peulon di gata tajak ngon tapak

Watee lhee buleuen hana jeut leubeh
Hana jan tapreh ka troh bak masa
Lon takot urusan gata han bereh
Payah peukabeh bak buet meujeumba

Seudeh geudeungo di Muda Seudang
Lagee siloukdang duroh di cong u
Pikeran meurawe hate meupanggang
Ulee pih mumang wab dara bungsu

Kiban lon peugot teuma e abu
Lon peutimang su nasihat poma
Hana lon bantah ummi bek rhet su
Takot lon e abu jeut keu durhaka

Aisyah geudeungo seudeh lam tuleung
Nyoepat keuh ureueng nyang luar biasa
Meurhi-rhi manok tem karom boh kleueng
Meurhi-rhi ureueng balah guna ma

Bungsu geu cukeh singkee di abu
Haloh geumeusu inoeng mulia
Siat lon beudoh izin bak abu
Lon jak peuglah su di dalam kama

Trouh lam kama di sinyak Aisyah
Geuklik meulah-lah haba peuneuba
Dak jeut geu tarek narit nyang leupah
Teuntee han susah syarat meujeumba

Ie mata jile teulah meuleumpah
Ka geu peususah bak nyang tan peunteng
Leumari geu buka baluem geu sasah
Geu gisa bagah bek meuteng paneng

Geu peutheun malee narit geu peugah
Kanda bek susah gundah gulana
Ban mandum nyoe bak lon punca masalah
Lon lakee meu'ah lon peususah kanda

Nyo pat lam baluem na meuh siploh mayam
Kon lon peu pinjam kon lon meu hayeu
Neucok hai kanda hadiah lon rindam
Beutrouh keu nazam bek neu peu miseu

Ta cok hai kanda ngon ta bloe guda
Nanggroe utara jioh that tujuan
Doa bak ulon beu meuhase kada
Keunari tujoh rupa neupuwoe sajan

MEUSAMBONG

Bek tuwoe neubaca chit ata awai mangat meuho uram ngon ikue;

• Bhah tujoh blah Meurumpok Ngon Guree
• Bhah nam blah Jangeuen Asmara
• Bhah limong blah Reuncana Keulana
• Bhah peut blah Nanggroe Ujong Utara
• Bhah lhee blah Tujoh Uroe Tujoh Malam
• Bhah dua blah Nasehat Poma
• Bhah siblah Senue
• Bhah Siploh Keunari Tujoh Rupa
• Bhah sikureueng Syarat Nikah
• Bhah lapan Haba Bahgia
• Bhah tujoh Aneuek Bungsu
• Bhah nam Mula Inti Ceurita
• Bhah limong Masa Abege Dua
• Bhah peuet Masa Abege Sa
• Bhah lhee Muda Lam Ayon
• Bhah dua Awai Phoun Mula
• Bhah sa Muqaddimah