Hikayat Muda Seudang, Pt. 12; Nasehat Poma
Teuka bak buleuen cahya meuhu trang
Di miyup rangkang canie meusapat
Rasa lam hatee susah-susah seunang
Nyak Muda Seudang gadoh seumipat
Alahai ummi sayang si tangke
Hatee lon reulee han ek lon bayang
Teungoh lon rateb bunoe cong balee
Geu hei le guree lon geu peutunang
Khanduri geu bet kuah boh labu
Keu teumon bu sie manok reundang
Geu beu-et ceupee asoe asam u
Sideh di dapu talam meu idang
'Oh lheuh khanduri ulon ngon abu
Teuma geumeusu haba tunangan
Geuneuek peunikah ngon aneuek bungsu
Ureueng jih puteh hu meune mirah meunan
Seu-out di ummi ka ulon teupu
Buet mak nyak bungsu awai geupeugah
Ka lheueh musyawah ka sigo binggu
Amanah di abu bak gata bek lon peugah
Teukeujot teukepak nyak Muda Seudang
Sang-sang geulayang ka putog taloe
Hana geu sangka rencana peutunang
Lam hatee that seunang ka gadoh bajoe
Haba geulanjot le Muda Seudang
Le that tantangan syarat peuneuwoe
Kon suai harta atawa theun idang
Keunari tujoh rupa harus lon puwoe
Haba seutuju pih kalheuh ulon bi
Watee nyang geubri lhee go purnama
Meunyoe lam masa nyan hana ulon bi
Han jeut meu dali bateue reuncana
Pakri e ummi ulee lon mumang
Lon duek han timang lon dong hana pah
Teuingat haba nyan lon susah seunang
Lagee lam angan lumpoe nyang ceudah
Ummi Po Intan ka teu-iem teuma
Geusangka hana syarat payah ba
Pat keuh ta mita keunari tujoh rupa
Hantom lam donya geudeungo haba
Hai nyak boh hatee aneuekda lon gaseh
Bek keuh meuseudeh syarat ta mita
Si nyak Aisyah nyan carong ngon seumateh
Hatee jih pih gleh kon neuk seumalee gata
Lam tujoh uroe tujoh malam nyoe
Bek tajak sahoe ta bantu poma
Ta bantu di blang golom meu bouh bajoe
'Oh malam uroe tahajjud beuna
Mulai singoh ta puasa sunat
Tamah ibadat lam tiep-tiep masa
Ta meudoa beusampoe kiban nyang hajat
Seugala ma'rifat teukeudi Allah nyang buka
Bek tuwoe neubaca chit ata awai mangat meuho uram ngon ikue;
- Bhah siblah Senue
- Bhah Siploh Keunari Tujoh Rupa
- Bhah sikureueng Syarat Nikah
- Bhah lapan Haba Bahgia
- Bhah tujoh Aneuek Bungsu
- Bhah nam Mula Inti Ceurita
- Bhah limong Masa Abege Dua
- Bhah peuet Masa Abege Sa
- Bhah lhee Muda Lam Ayon
- Bhah dua Awai Phoun Mula
- Bhah sa Muqaddimah
