Hikayat Muda Seudang, Pt. 22; Sahabat Pang Juhang

SENAMBONG CEURITA

Teu groep teukeujoet ayah wa amat
Bahou geu mumat si Muda Seudang
Hana teujalok sang ikue meukeumat
Ayah wa amat geu lumpat girang

Geu uem laju geu lumpat-lumpat
Lagee tupee krat ji teumeung kacang
Allahurabbi nyang po akhirat
Ka neupeuteupat wareh Pang Juhang

Alahai aneuekda soe keuh nan gata
Geu tanyong nama di yah wa amat
Muda Seudang meunan keuh nama
Peuna ayah wa hai nyang meukeumat

Nyan ayah gata ngon lon jameun
Rakan di mideuen bak bila agama
Pang Juhang syahid bak ujong rangeun
Watee geu peuthen babah kuala

Gobnyan seb beuhe watee geu meuprang
Leupah geuransang bak geu let kaphe
Carong that silet hayeue geu ceumeucang
Nama Pang Juhang ji thee le kaphee

Lon kalon gata hai Muda Seudang
Lagee keuh sang na lon turi rupa
Rupa jih gata aneuek Pang Juhang
Hi teuh han leukang ngon ayah gata

Muda Seudang ka teuhah babah
Dada sang bungkah ka rhou ie mata
Han tom geu kalon kiban hi ayah
Geu deungo kisah tok nibak poma

Teuduek meuleuphoup di ateueh tanoh
Nyak Muda leumoh hana le daya
Ie mata geuh rhoe sang basah tanoh
Dada ka punoh ngon duka lara

Ayah wa amat meuphoum masalah
Muda geu papah u dalam rumoh
Peuduek bak tika haba han geu peugah
Bek meutamah susah hate nyang meh-moh

Cut bang abeudo ka tahe gante
Sang hana beuhe geu tanyong haba
Geu ngieng nyak Muda ka geumeu ba-e
Ulee meubiye han meupu ceurita

Geu jok ie puteh le yah wa amat
Peuglah meukeumat reukueng nyak Muda
Leupie mabacut na meukureueng brat
Geu kalon kasat sang kana meubida

Uroe ka leuho ta seumbahyang siat
Lheuh seuleusoe hajat ta peugah haba
Keudeh bak kubu akan lon intat
Ta saba siat hai aneuek muda

Singkat ceurita 'oh lheueh geu shalat
Ayah wa amat mulai geu peugah haba
Kiban keuh cara Pang Juhang wafat
Pat geu peusom jrat ayah nyak Muda

Wajeb keuh kamoe meupeusom jrat
Nyak bek mudharat jasad ayah gata
Saweueb di kaphee get that ji karat
Meunyoe na jasad di cang meugura

Nyan dum deundam si kaphe laknat
Ubee na siasat abeih di rika
Peu lom Pang Juhang lawan nyang sep brat
Ramee geu takat si puteh mata

Jasad meu peu plueng si uroe si malam
Lam rimba Tuhan meupeugot pusara
Bek sampoe jiteupue le kaphee haram
Peutimang deundam kubu ji buka

Meunan keuh kisah kamoe seumayam
Peu siblah deundam amara murka
Gata lon intat beutrouh bak makam
Meunan keuh nazam kamoe bentara

Jinoe ta pajoh pue-pue nyang mudah
Mangat bek susah lam perjalanan
Na bu puteh ngon bungong peutek teucicah
Ka sep ngon teugah bek deuk bak jalan

Di bang abeudo pih pajoh sajan
Ka sep lumayan hana payah bloe
Adak pih hana eungkot lam pingan
Bu pree lagee nyan hanjeut keu rugoe

Alahai intan seunalen rupa
Peuneungui raja dalam istana
Kiban keuh rupa si bungong duka
Duroh ka mala ateueh rhueng donya

MEUSAMBONG

Bek tuwoe neubaca chit ata awai mangat meuho uram ngon ikue;

• Bhah dua plouh sa Han Sep Beulanja
• Bhah dua plouh Jak Bloe Guda
• Bhah sikureueng blah Langkah Phoun
• Bhah lapan blah Ie Mata Bungsu
• Bhah tujoh blah Meurumpok Ngon Guree
• Bhah nam blah Jangeuen Asmara
• Bhah limong blah Reuncana Keulana
• Bhah peut blah Nanggroe Ujong Utara
• Bhah lhee blah Tujoh Uroe Tujoh Malam
• Bhah dua blah Nasehat Poma
• Bhah siblah Senue
• Bhah Siploh Keunari Tujoh Rupa
• Bhah sikureueng Syarat Nikah
• Bhah lapan Haba Bahgia
• Bhah tujoh Aneuek Bungsu
• Bhah nam Mula Inti Ceurita
• Bhah limong Masa Abege Dua
• Bhah peuet Masa Abege Sa
• Bhah lhee Muda Lam Ayon
• Bhah dua Awai Phoun Mula
• Bhah sa Muqaddimah