Hikayat Muda Seudang, Pt.21; Han Sep Beulanja

SENAMBONG CEURITA

Laju geu pakat jak kalon di likot
Di yup bak rambot geu tambang guda
Muda Seudang geuseutot di likot
Harap meusambot meuheuet beu teuka

Jeh pat si guda hai aneuek muda
Ci ta peureksa kadang pah seulera
Hana peu ragu ji plueng sep teuga
Sep meuteunaga ngon jak keulana

Geukalon guda di Muda Seudang
Leupah geuransang lagi peurkasa
Badan jih sep gab ngon raya panyang
Tamsee guda prang sri lila wangsa

Bulee that itam leugam sang malam
Ka meu bouh ladam ngon lindong gukee
Ikue jih keumang sang ouk seumayam
Tan bulee ragam itam dum lungkee

Kiban takalon hai aneuek muda
Peu keuh nyoe guda gata meukeusud
Beutoi lagee nyoe wahee e yahwa
Padum hareuga payah ulon suet

Meuhai hai aneuek lon bouh hareuga
Susah ta mita lagee nyoe macam
Yum jih lon peugah tok sigo buka
Ubit keunira tujoh blah mayam

Muda Seudang teukeujout leupah
Ulee ka susah han sep keunira
Hana teujalouk meuhai teuleumpah
Pat keuh geu tamah keu yum bloe guda

Oma teuh yah wa meuhai that lagoe
Nyang na bak jaroe tok siploh mayam
Kiban cara hareuga bek sampoe
Hana ngon lon bloe yum saboh macam

Han jeut ulon bri hai aneuek muda
Nyan yum guda murah nibak peukan
Lon cok keu laba cuma seukada
Hana meumada ngon mita piasan

Nyak Muda Seudang ka leumoh teu-oet
Hana geuseu-out ka meukhap babah
Ka hek geumita si uroe seupoet
Ujong meubaloet bak yum hana pah

Teuma geusamboung le yah wa amat
Keupue meukarat gata keu guda
Jareueng nyang mita guda meukilat
Adak meukarat geubloe nyang biasa

Lon jak meurantoe nanggroe utara
Wahee e yah wa lon seutot nek tu
Amanah poma hanjeut lon peu kra
Pakiban cara payah lon tuju

Watee meuteuntee harus beusampoe
Wajeb ulon woe peu punoh janji
Lhee go purnama beu lam seuramoe
Nazam peuneuwoe jeumba sitali

Ayah wa amat geudeungo teupat
Sang-sang leupah brat barang neu cari
Supoe keuh aneuek gata pat alamat
Bak lon kalon hat lagee lon turi

Gampong di ulon na keuh Lamkuta
Bak bineh istana ulee balang idi
Meunyoe tom neujak sagoe idi kuta
Teuntee nyan nama ayah wa turi

Ayah lon sidroe Pang Juhang Nama
Meuninggai donya dalam prang sabi
Ummi Po Intan nyan keuh nan bunda
Umu ka tuha teumpat lon meubakti

MEUSAMBONG

Bek tuwoe neubaca chit ata awai mangat meuho uram ngon ikue;

• Bhah dua plouh Jak Bloe Guda
• Bhah sikureueng blah Langkah Phoun
• Bhah lapan blah Ie Mata Bungsu
• Bhah tujoh blah Meurumpok Ngon Guree
• Bhah nam blah Jangeuen Asmara
• Bhah limong blah Reuncana Keulana
• Bhah peut blah Nanggroe Ujong Utara
• Bhah lhee blah Tujoh Uroe Tujoh Malam
• Bhah dua blah Nasehat Poma
• Bhah siblah Senue
• Bhah Siploh Keunari Tujoh Rupa
• Bhah sikureueng Syarat Nikah
• Bhah lapan Haba Bahgia
• Bhah tujoh Aneuek Bungsu
• Bhah nam Mula Inti Ceurita
• Bhah limong Masa Abege Dua
• Bhah peuet Masa Abege Sa
• Bhah lhee Muda Lam Ayon
• Bhah dua Awai Phoun Mula
• Bhah sa Muqaddimah