TagalogSerye : Ikalawang Araw mula sa Ikalawang Pangkat

Napasabit po ako sa isang madugong hamon ng @tagalogtrail na TagalogSerye. Hango ang hamon sa SteemitSerye na dugtungan ng kwento ang pakulo. Chill lang ako nun una pero medyo nawindang ako kay @johnpd haha. Kakaiba talaga ang pambungad. Sa mga hindi pa po nakakabasa, ang unang bahagi ng kwento ay nakalink sa baba.

Ang nakaraan ...

Hindi na tinapos pang pakinggan ni Lucy ang kwento ni Angelo. Hindi na niya kinaya kaya nagtatakbo na lamang siya hanggang sa kung saan siya dalhin ng mga paa. At sa kanyang pagtakbo, nabangga niya ang isang lalake na nakasuot ng tuxedo at naka-shades.

_{galing sa pixabay}

Umpfh

Damang dama ni Lucy ang namumuong pasa sa kanyang noo dahil sa pagkakauntog nito sa mala-bakal sa tigas na pectorals ng lalaking naka-shades. Dali-daling namuo ang pagkainis ng dalaga at unti-unting lumabas ang pagka-bruha. Pero … tila isang malamig na tubig ang bumuhos nang masilayan nya ang estranghero.

Nanlamig si Lucy... At nag-init.

‘Besh, iba na to.’ May kung anong karisma ang nakabalot sa lalaki. Pero bukod sa pagkabusog sa mata sa tikas at kaguwapuhan ng estranghero, may isa pang bagay ang pumupukaw sa pagnanasa ni Lucy. Isang kabigha-bighaning amoy: ang bukod-tanging amoy ng PERA.

Armani na tuxedo. Dolce & Gabana shades. ‘Teh, hindi sya ukay’. At halos mapatumbling na si Lucy ng matanaw ang isang itim na Lamborghini sa hindi kalayuan. Kaya’t sa isang iglap, na parang si Sailormoon, biglang nagtransform ang babaita sa pinaka-maalindog nitong anyo.

Duck Lips. Check. Pia Wurtzbach smize. Check. Kembot na parang matatae na. Check.

“Eiyow powz. Lehmown ka bah? Kaszi i-cahw ang leymown ng pusoh ko pows” 😆

Isang malamig na tubig na naman ang bumuhos sa kanya. Wait, literal na pala. Hawak ng estranghero ang isang spray bottle na sya namang ipinangwisik ng tubig sa dalaga, marahil ay dahil hindi kinaya ang pagka-jejemon at paka-waley nito.

Bagama’t tumatagas na ang Chanel na mascara ni Lucy, keribels pa rin daw dahil pasok naman daw ito sa kanyang pamatay na wet look. Winasiwas nya ang kanyang medjo basang buhok ala-baywatch at napatugtog ng background music sa isip:

Pasok Ely Buendia

🎵 Minsan pa ulan bumuhos ka, wag nang tumigil pa.
Hatid mo ma’y bagyo, dalangin ito ng puso ko … 🎶

pssht. Ngayon naman inasinta ng lalaki ang butas ng ilong ni Lucy na syang naging dahilan ng kanyang pagkasamid. Habang abalang sinisinghot ng dalaga ang tubig paalis sa kanyang sinus, nagsimula ng magsalita ang estranghero.

“Pasensya na, time is gold kasi kaya paspasan ang approach ko sayo. Sumama ka sa akin at mayroon tayong mahalagang paguusapan.”

Gusto pa sanang kumontra ni Lucy ngunit naisip ng manahimik nang makitang naka-amba na naman ang spray bottle. Sa huli, ipinakita ng estranghero ang bugkos na dolyar sa loob ng kanyang coat. At gaya ng biktima ng budol-budol gang ay napasunod na lang si Lucy sa lalaki.

“Grabe. Hindi ko naman inexpect to. Lambo sasakyan, tapos karinderia lang tayo. Ate, extra rice pa po!” Okay, masarap naman yun ulam, in fairness. Kaya’t napaparami talaga ng kanin si Lucy.

“So i-recap ko nga yung napagusapan natin ng tatlong oras.” Paumpisa ni Lucy para mabanggit ang lahat ng importanteng bagong plot points sa pinakamabilis na paraan.

“Kinokonfirm mo na ako’y kalahating mortal, na ang aking ama ay isang demonyo, na sya naman ding ama ng muntik ko ng fling na si Angelo. At bukod pa dun, sinasabi mo na ikaw ang kakambal nya na si Debilo. Kaya we therefore conclude na magkakapatid tayong tatlo sa ama”, banggit ni Lucy ng may kaunting pagkainis dahil pwede naman pala i-summarize ang tatlong oras na usapan sa tatlong sentences lang.

Di na rin nya magawang pagdudahan ang kwento ni Debilo, dahil para talagang pinagbiyak na bunga sila ni Angelo. Di rin mapagkakaila ang kakaibang awra ni Debilo na hindi pang normal na tao. Kung si Angelo ay mala-anghel, mas lutang naman ang pagka-mapanganib kay Debilo. Awrang masaabing taglay din ni Lucy.

“Madaling mabali ang katotohanan. Hindi lahat ng makita o inakala mo ay totoo. Magingat ka kay Angelo... At magingat ka din sa akin”, misteryosong bitaw ni Debilo na may kasamang mabigat na hugot habang malayo ang tingin.

“Alam na alam mo iyan. Sinong magaakala na ang isang kabigha-bighaning dalagang galing sa states ay isang halimaw na kumakain ng bato ng tao gabi-gabi.” Medyo kinalibutan si Lucy sa impormasyong alam ni Debilo.

“Dalwang extra rice pa nga ate!” Napakainin sya lalo dahil sa stress.

“Pero may pag-asa ka pa. Ang pamimili mo ng masasamang loob bilang biktima ay patunay na hindi pa nanaig sayo ang kadiliman. Pero hindi mo man tinapos ang kanilang buhay ...”

“Tao pa rin silang nasaktan mo, Lucy. Nagkasala man sila, mayroon pa ring paraan para magbago. At huwag na huwag mong kalimutan na tao ka rin na pwede pang mabago …” , paalala ni Debilo na may aninag ng sinseridad.

Nangilid ang luha ni Lucy dahil medyo na-touch sya sa sinabi ni Debilo. Pero naluha rin sya lalo dahil sa kakaibang kati na naramdaman.

omigehd, na-allergy ako!

Bigla na lang sya napatingin sa paligid, hinahanap ang maaring sanhi ng kanyang allergy. Krus, buntot ng pagi, bawang …. Bawang?!

omigehd, garlic rice pala itong nilapang ko!

Naguluhan si Lucy. Hindi naman sya naapektuhan ng ganito kagrabe kadalasan. Ang bling-bling nyang bertud ay nagsisilbing proteksyon sa kanya upang makapamuhay sya ng mas normal, gaya ng makapag-sunbathing sa Boracay tuwing Holy Week. Nagulantang na lang sya nang makita itong nasa kamay na ni Debilo. Ang pagkakaalam ni Lucy ay sya lang at ang kanyang Ina ang maaring humawak ng bertud-bling.

“Paano?”, sambit ni Debilo na parang binasa ang isip ng natamemeng si Lucy dahil sa tindi ng allergic reaction sa bawang.

“Marahil alam mo naman na ang bertud o anuman nabahiran ng mahikang dilim ay madaling linisin. Isang bendisyon lang at mawawalan na ito ng bisa.”

Napaisip si Lucy kung kailang sya huling nadiligan .. este kung kailan sya huling nabendisyunan. Windang na windang na sya sa kati at sa kakaisip pero wala pa ring mapiga. Nabigyan lamang ng linaw ang mailap na misteryo nang ilabas ni Debilo ang kanina pa nyang ginagamit na spray bottle.

omigehd, Agua Bendita! Hindi yun normal na tubig, Holy Water pala!

omigehd, leche ang kumplikado ng strategy mo!

Sadyang hinang-hina na si Lucy ng unti-unti syang lapitan ni Debilo. Dinukot nito ang nakatagong panyo sa kaliwang bulsa ng mini-skirt ni Lucy. Iyong mismong panyo na ginagamit nya upang patulugin ang kanyang mga biktima bago kunan ng dugo at kidney.

Sa unang pagkakataon nalanghap ni Lucy ang chloroform na makailang ulit nya ng ginamit sa iba.

Itutuloy ...

Bilang ng mga salita: unti na lang 1K na. Bagama't noong una ay plano ko lang sumulat ng isang bahagi na may bilang na 350 na salita, nagulat na lamang ako nang lumobo pa ang gawa ko lagpas sa 1000 salita. Masasabi ko na impluwensya ito ni @johnpd. Haha. Bagama't mahirap, nakakaliw sundan ang kanyang kwento, at gamitin ang mga punlang kanyang itinanim sa simula.

Sa mga susunod po sa grupo, wag po kayo mag-alala at ienjoy lang din natin ang pagsulat. Baka kusa rin pong dumating yun karugtong sa inyo. Ngayon po ay opisyal ko na pong ipinapasa ang pluma ng grupo kay @jemzem. Enjoy po.

Ang Prompts

Ang Maalindog, Ang Nagbabagong-buhay
Ang Pagtakas, Ang Magkakambal, Ang Bilog na Buwan

Ang Ikalawang Pangkat

@johnpd - Lunes
@jazzhero - Martes
@jemzem - Miyerkules
@jenel - Huwebes
@creyestxsa94 - Biyernes