Pəl qutabı

Qutabın çox növü var ; pendir, ət, qarın, göy, pəl. Hər birinin fərqli və ləziz dadı-tamı var. Pəl qutabı isə yalnız yaz mövsümündə olan və dadı-tamına görə digər növləri üstəliyən qutab sayılır. Pəl bitkisi meşələrdə və bataqlıq olan ərazilərdə, əsasən çürüntək olan məkanlarda bitir.

https://goo.gl/images/XBYYFb
Özüm yığmadığımdan qonşu qəsəbəyə pəl almağa getdim, çox axtardıqdan sonra, bir yerdə insanların toplandığını gördüm. Bu toplantı isə yeni pəl gətirən maşının yanında idi. Pəli görən camaat maşının üzərinə axın etmişdi. Tələm-tələsik özümü çatdırdım ora. Evdən bir dəstə almağımı demişdilər, ancaq həyəcandan üç dəstə aldım. Qiyməti də münasib idi, bir manat. Satıcı 30 dəstə gətirmişdi ki, 5 dəqiqə içərisində satıldı.
Nəhayət, vaxt çatdı qutabı bişirib yeməyə.

Axşam olduğundan, həmçinin havanın soyuq olduğundan sacda yox, evdə sobada bişirildi. Əlbəttəki, o pəli təmizləyib - bişirən yəni, ən çox əziyyəti çəkən anam idi. Bütün yeməklər kimi, qutabı da ləzzətli bişirmişdi.
Pəl qutabı da digər qutablar kimi, turşu və qatıq ilə yeyilir. Bir az təbiilik olsun deyə turşəng yığıb gətirmişdim, şəkildə boşqabda olan yaşıl bitki odur.
Yeyən zaman şəkil çəkmək yadıma düşmədi, həmdə əlim yağlı idi. Böyük olmasına baxmayaraq beşin yeyəndən sonra doydum və pəl qutabı haqqında məlumatı siz üçün paylaşmağı düşündüm. Sevgi ilə bişən yeməyin dadı unudulmaz olur.

Oxuduğunuz üçün təşəkkürlər.