Pinaglayo Ngunit Muling Pinagtagpo

---

Sa tuwing binabalik-tanaw ang nakaraan,
hindi ko pa rin masukat ang sayang nararamdaman.
Tadhana’y tila tayo ang napiling paglaruan.
Ngunit sa laro nito’y hindi naman tayo umuwing talunan.

Kay tamis ng aking aking ngiti,
kapag naaalala kung paano nakamit ang pag-ibig na minimithi.
Pareho mang bata noong tayo’y nagkakilala,
ngunit ang pagtibok ng puso ay wala sa tanda.

Puso ko’y nagwala nang ipinakilala ka ng kaibigan,
na kahit paglubog ng araw ay tila nakalimutan.
Dahil ikaw ang naging mistulang liwanag sa aking mundo.
Araw ko’y iyong kinompleto.

Hinatid kita upang makasama pa.
Ipinagdarasal ko noon na sana’y ang oras ay tumigil muna.
Subalit hindi ko iyon kontrolado.
Kaya para matawagan ka’y kinuha ko na lang ang iyong numero.

Iyon na nga ang simula ng paglalim ng nararamdaman.
Nasabi kong ikaw na ang gustong makasama sa dulo ng walang hanggang.
Ngunit tayo’t kanilang pinaglayo,
sa Maynila ikaw ay nagtungo.

Umabot sa sukdulan ang naramdamang sakit.
Wala man lang akong nagawa upang sa iyo’y mapalapit.
Subalit handa akong maghintay sa iyong pagbabalik.
Tiniis ko kahit gaano pa man kapait.

Ilang taon man ang lumipas na tayo’y nagkalayo,
ngunit ikaw pa rin ang tanging ibinubulong ng aking puso.
Hindi ka nito magawang palitan
kahit pa sabihin nilang paghihintay sa iyo’y walang patutunguhan.

Kalaunan ay nagbunga ang tiyaga’t paghihintay.
Pagbabalik mo sa akin ay nagbigay-buhay.
Walang bumitiw kaya sa pagsubok tayo’y nanalo.
Pagmamahalan natin ay wagas at totoo.

Ang pagdating mo sa buhay ko’y lagi kong pinapasalamatan.
Ikaw ang yamang hindi ko maipagpapalit kailanman.
Walang sawa kitang mamahalin at aalagaan.
Pangako ko’y pamilya natin ay magiging masaya magpakailanman.

---

---

pinagkunan ng larawan

Ang tulang ito'y aking tugon sa tulang Pag-ibig na Wagas ay Itinadhana ni @mallowfitt para sa Biglaang Kolaborasyon Ika-Anim na Araw ni @tagalogtrail

Maging bahagi sa pagpapalaganap ng wikang Filipino. Ikaw ba ay manunulat ng tula o maikling kuwento? O kaya ay nais malinang ang talento sa pagsusulat? Sumali sa mga patimpalak. I-follow ang @tagalogtrail para sa mga akdang Filipino at sumali rin sa aming talakayan sa discord: https://discord.gg/6dUJH2Z