Ang Paglalakbay Patungo sa Dako Pa Roon ni @shikika: Timog Cebu

Madalas akong maglakbay nang mag-isa at walang kasama. Marahil ang mag-isa ay ayaw ng karamihan. Ngunit para sa akin, madalas ay ito ang aking kagustuhan. Siguro’y dahil nakasanayan ko na rin at komportable akong nag-iisa.

Naglalakbay ako nang mag-isa hanggang sa nalaman kong may grupong hindi magkakakilala pero sabay-sabay na naglalakbay patungo sa dako pa roon. Hindi nila kilala ang isa’t isa, pero hindi estranghero ang turing nila sa mga bagong kakilala. Kagaya ko, ang bawat isa sa kanila’y naglalakbay nang mag-isa, hanggang sa daan ay nagkasalubong sila. Bagama’t walang kasiguraduhan ang patutunguhan ay nagpasya na lamang sila na sumabay para marating ang dako pa roon.

Habang binabaybay ko ang malubak na daan, napagtanto kong matagal na pala akong nawawala. Ilang daan na ang binaybay ko pero hindi ko pa rin mahanap kung saan nga ba talaga ako patungo. Nang malaman ko ang pagsasama-sama ng grupong iyon sa paglalakbay patungo sa dako pa roon ay agad ko silang hinanap. Bagama’t matagal kaming nagkasalubong, hindi pa rin ako nawalan ng pag-asang makikita ko sila.

Ako’y nagpapahinga sa lilim ng puno nang marinig ko ang malakas na tawanan ng mga taong papalapit sa aking kinaroroonan. Sa hindi kalayuan ay nakita ko ang siyam na naggagandahang dilag. Kinausap ko sila’t tinanong kung saan sila pupunta at nalaman ko ngang sila na pala ang matagal ko nang hinihintay. Sa wakas ay nagkasalubong na rin kami.

Kasama sina @shikika, @sunnylife, @jennybeans, @yennarido, @lunamystica, @akoaypilipina, @taminites, @ellechim0816, at @reginecruz ay nagpatuloy na kami sa paglalakbay sa dako pa roon.

Habang binabaybay namin ang daan papunta sa dako pa roon, hindi namin inaasahang madadaanan naming ang isang magandang talon. Napag-alaman namin na ito pala ang pinakasikat na talon sa Cebu — ang Kawasan Falls.

Dahil sa nakakaakit nitong ganda ay napagpasyahan muna naming magtampisaw at maligo rito.

May tatlong antas ang Kawasan falls at isa-isa naming iyong inakyat. At dahil gusto naming ng adventure ay napagpasyahan din naming tumalon sa mahigit tatlumpung talampakan na talon.

Napakasaya ng aming paglalakbay at makikita iyon sa kakaibang ningning ng aming mga mata at ngiti sa aming mga labi.

Pagkatapos naming magpakasaya sa Kawasan Falls ay dinayo naman namin ang Lambug Beach sa Badian, Cebu.

Bagama’t ito’y pampublikong dagat ay hindi ito ordinaryo gaya ng karamihan sa mga pampublikong dagat. Pero dahil low tide noong kami’y magtungo rito ay hindi kami nakapagtampisaw sa nasabing dagat at nagkukwentuhan na lang kami.

Nang lumipas ang ilang oras ay nagpasya kaming magpatuloy sa aming paglalakbay.

Dinala naman kami ng aming mga paa sa napakagandang lungsod ng Moalboal. Nasasabik kami na makita ang nakahahalinang dagat sa lugar na iyon.

Ang una naming pinuntahan ay ang Moalboal Turtle Point kung saan ay hindi maipapaliwanag na saya ang aming naramdaman nang makita namin nang malapitan ang naglalakihang pawikan. Napakasaya namin sapagka’t tatlong pawikan ang naabutan namin doon.

Matapos naming masilayan ang napakagandang pawikan ay pinuntahan naman naming ang Pescador Island na sikat sa mga yamang-dagat na naroon. Kami’y sobrang namangha sa ganda ng coral reefs na aming nakita pati na rin ang iba’t ibang uri ng isda na noon pa lang nasilayan ng aming mga mata.

Hindi namin ininda ang tumitirik na araw sapagka’t walang-wala iyon sa tunay na sayang dulot ng tanawing nakikita naming sa ilalim ng karagatan.

Ilang oras kaming nanatili sa lugar na iyon hanggang sa napadpad kami sa Moalboal Sardine Run. Sinisid namin ang karagatan at nakilangoy sa libo-libong mga sardinas doon.

Tunay na nakakamangha ang tanawin lalo na sa tuwing pinalilibutan kami ng mga sardinas. Walang kapaguran kaming lumangoy na parang kaisa namin ang mga sardinas na naroon. Walang paglagyan ang aming tuwa nang kami ay bumalik sa aming bangka para sa susunod naming paglalakbay patungo sa dako pa roon.

Bagama’t hindi pa namin nahanap ang daan patungo sa dako pa roon, walang pagsidlan naman ang aming saya na mapuntahan ang iba’t ibang lugar na aming nadadaanan sa paglalakbay namin patungo sa dako pa roon. At labis rin kaming nagagalak dahil dumadami ang nakikisabay sa aming paglalakbay.

Positibo kaming magkakaroon ng magandang patutunguhan ang paglalakbay naming ito. Matagal man ang pagdating namin, ang importante nama’y masaya kami at maraming nakikilalang mga kaibigan habang binabagtas naming ang daan.

Maraming salamat sa mga kasama ko sa paglalakbay papunta sa dako pa roon. @shikika, @sunnylife, @jennybeans, @yennarido, @lunamystica, @akoaypilipina, @taminites, @ellechim0816, at @reginecruz, maraming salamat at naging kasama ko kayo sa paglalakbay. Hanggang sa muli, mga kaibigan!

---

Pasensya na't natagalan bago ko kayo nasamahan sa paglalakbay. Naging abala lang talaga. Pero masaya ako't naisulat ko na rin ito. Hehehehe

Maging bahagi sa pagpapalaganap ng wikang Filipino. Ikaw ba ay manunulat ng tula o maikling kuwento? O kaya ay nais malinang ang talento sa pagsusulat? Sumali sa mga patimpalak. I-follow ang @tagalogtrail para sa mga akdang Filipino at sumali rin sa aming talakayan sa discord: Tropa ni Toto