---

Ayaw nating mangyari sa iyo ang nangyari kay Joanna.

Pinagmalupitan.
Pinahirapan.
Hanggang pinatay.

At walang pusong inilagay sa freezer.
Isang taon, bumulaga ang nakakatakot na totoong mukha ng mga kababayan nating nagdurusa sa Kuwait.

Paano maiiwasan ang pang-aabuso ng malupit na amo bilang OFW?

1. Dumaan ka sa tamang proseso ng pag-a-apply ng trabaho sa ibang bansa. Huwag kang kumagat sa mga taong nangangakong mataas na sahod at mabilis na nagpapalipad sa ibang bansa. Tiyakin mo mismo sa POEA kung sila nga ay may karapatang mag-recruit ng mga manggagawa para sa ibang bansa. POEA HOTLINE: 722-11-44 / 722-11-55)

2. Kung ikaw ay pinagbantaan na sasaktan, magsumbong agad sa kinauukulan. Opo, ang pagbabanta ng pananakit ay sapat na dahilan para iwan ang iyong amo. Huwag mo nang hintayin pa na ikaw ay masaktan. Gumawa ng paraan na magsumbong sa ating embahada o OWWA Coordinating Services office.

3. Ilista mo ang mahahalagang numero para sa emergencies at itago mo. Malaking tulong rin ang social media para malaman ang tunay na kalagayan mo. Minsan po gagawa tayo ng payo sa OFWs kung paano gagamitin ang Facebook para sa kanilang proteksyon.

4. Kung ikaw ay sinasaktan at ikinukulong pa, humingi agad ng tulong sa may otoridad. Huwag mong alalahanin ang hindi pa nakukuhang sweldo. Tumawag ka sa kakilala, kaibigan at humingi ng saklolo. Tawagan mo ang embahada kung saan ka nagta-trabaho.

5. Tumakas ka! Kung walang telepono at ibang paraan para makahingi ng tulong – gumawa ka ng paraan na tumakas. Alam ko nakakatakot gawin ito. Pero kung walang ibang paraan – at napupuno na ng pasa at bugbog ang iyong katawan, tumakas ka. Magpunta sa kababayan mo na mapagkakatiwalaan o sa awtoridad na Filipino, para masagip ang iyong buhay.

Umuwi ka na!

Huling payo sa mga nasasaktan. Tapusin mo na ang kahirapan ng loob. Malalagpasan mo ang kahirapan kahit dito ka sa Piliipinas.

Dito mo hanapin ang iyong palad.

Hindi lang sa ibang bansa ang dahilan ng pag-unlad.

Makikita mo rin sa mahal mong bayan kung saan at paano ka magiging maalwan.

Sources: Audio news from IZ Balita DWIZ/ Photos from Kuwait Page

Ano sa palagay mo? Kung may nais po kayong idagdag sa mga nakasulat dito, ilagay lamang po ninyo sa comment section.

Maraming salamat po.

Tulungan po ninyong tumaas ang aking Reputation: Follow, Upvote and Resteem (kung inyo lamang pong mamarapatin)
@pilipinas

---

▶️ DTube
▶️ IPFS