Asul ang paborito mong kulay simula nung mga bata pa tayo,

And sabi mo malamig sa mata, masaya, at parang napakapayapa nito

Asul din ang kulay ng langit at ng malawak na karagatan

Asul ang kulay ng damit mo noong huli kitang nasilayan...

Parang ang tagal na, pero sariwa pa ang mga sugat

Nakapaloob parin ang hapdi sa mga tula kong naisusulat,

Ang iniwan mong puwang sa buhay ko ay hindi parin nahihilom ng panahon,

At hindi ko parin matiis na tingnan ang kulay na asul hanggang ngayon.

Asul ang nagpapaalala sa akin kung paano mo sinasambit ang pangalan ko,

Asul ang nag-uudyok sa akin na muling balikan ang mga larawan ng pagngiti mo,

Asul... Asul ang nagpapasiklab ng pangungulila ko sa'yo,

Asul ang naging kulay ng pagdadalamhati ng pusong inulila mo.

Kung nasaan ka man ngayon, alam kong saksi ka sa aking pagtangis

Habang hawak ko ang mga litrato mo -- ultimo tarheta -- at pagluha ko ay labis,

Mananatili kang buhay sa bawat kulay na dadampian ng aking mga mata,

At tulad ng kulay asul, alam kong payapa ka na't masaya.

Ito po ay isang orihinal na obra na aking iniakda upang ilahok sa

Steemph.Cebu: Paglinang ng Kasanayan sa Paggawa ng Literatura - Contest #3

Nawa ay nagustuhan niyo po ito.