පොල් කන ලැසී

පොල් කියන්නෙ ඉතින් කොහොම උනත් රස කෑමක් නේ. දැන් වුනත් පොල් ගාන්න යන සමහර වෙලාවට අපිත් පොල් බෑය පොඩ්ඩක් රස බලනව. ඒ වගේම තමයි අපේ ගෙදර ඉන්න සත්තුත්. පොල් කන්න හරිම ආසයි. පොල් ගාද්දී බිම වැටෙන පොල් ටික කන්නෙ පූස. බිංග වත් උදේට කුඩුවට යවාගන්න සමහර දාට පාවිච්චි කරන්නෙ පොල්. ඒ කොහොම උනත් ඒ එක්කෙනෙක් වත් ලැසී තරම් අසාධාරණ විදියට පොල් කන්නේ නැහැ.

ලැසී ඉතින් පොඩි කාලෙ ඉදන් අපේ ගෙදර හැදුන බල්ලෙක් නෙවෙයිනෙ. ඒ නිසා ගෙදරක තියාගන්න ඕන හොඳ නරක පුරුදු ගැන ඒ තරම් හැඟීමක් එයාට නෑ.

අපේ ගෙදර කාලෙන් කාලට පොල් තෙල් හිඳ ගන්න පොල් වේලනවා. මුලින්ම පොල් පලල ටික දවසක් හොඳට අව්වේ වේලගන්න්ව. ඊට පස්සේ ආයෙත් ඒවා තීරු කපලත් තව ටික දවසක් වේලා ගන්නව. ඉතින් ලැසී ආපු මුල් කාලෙත් මේ වගේ සුපුරුදු විදියට අපි පොල් වේලලා අව්වුට දැම්ම. එතකොට තමයි දැනගත්තේ ටික වෙලාවක් යද්දි පොල් කටු ඇවිදිනව කියල. මුළු කට පිරෙන්නම පොල් කට්ට දාගෙන ආපු ලැසී තමයි ඔය පහල ෆොටෝ එකේ ඉන්නේ.

ඉතින් පලවෙනි දවසෙ නම් බය උනේ එයා කටේ පොල් කට්ටක් හිර කරගෙන කියල. ඒක ගලවන්න උත්සහ කරද්දී එයා එකත් අරගෙන උඩටම දුවගෙන ගියා.

එක පොල් බෑයක් නෙවේ, ඒ වගේ දෙක තුනක්ම එයා එදා ටික ටික කාල තිබුන. ඉතින් මේක දැකපු තාත්තටත් ගොඩක් තරහ ගියා. මොකද බිංගෝ ගෙන් මේ වගේ හැසිරීමක් අපි දැකල තිබුණේ නැති නිසා. ඉතින් පොඩ්ඩක් තරවටු කරත් පොල් කන එක ඒතරම් ලොකු වැරැද්දක් විදියට ලැසී ට නම් පේන්නේ නැතුව ඇති.

එතනින් පස්සේ පොල් පලුත් උස්සගෙන වහල වගේ උස තැන් වලට නගින්න තාත්තට සිද්ධවුණා. මොකද ලැසී ට නගින්න බැරි තැනක් වෙන්නත් ඕනනේ.

පහුගිය දවසක එක සැරේම උදේ පාන්දර මිදුලේ පොල් එක්ක කටුවක් තියනව මම දැක්ක. දවල් වේද්දි තව පොල් කටුවක් ඒ වගේම. ඒ කියන්නෙ පොල් ගෙඩියක්ම මිදුලෙ. ගෙදරින් අරගෙනත් නෙවෙයි. හවස් වෙද්දී පොල් පලු දෙකම නිකම්ම කටු දෙකක් බවට පත්වෙලා. පොල් ගෙඩිය කොහෙන් ගේනවද කියල නම් අදටත් දන්නේ නැහැ.