這不是一個鬼故事 (三)

隨著眾人漸漸遠離大樓，四周亦回復寂靜。就連停屍間大門亦沒有再傳出任何聲音。

「櫻木！櫻木！快啲起身啦！櫻木！出咗事呀！」
這名叫做櫻木的青年慢慢的睜開惺忪睡眼，有氣無力的說：「咩事呀大佬，尋晚成三點幾先瞓呀！瞓多陣先啦，有咩事留返拜山先講啦。」

「成10點啦，仲瞓唔夠？嘩，成陣酒味，尋晚飲咗好多呀？」朦朧中櫻木看到一個貌似Aaron的人跟他說話。
「係啦，你個組仔阿Ken出咗事，仲瞓？快啲起身跟我地去睇下啦！」

「Kitkat, 好少聽到你咁緊張喎，阿Ken 咩事呀？ 佢...」

Aaron同Kitkat一起將櫻木從床上拉了起來。來不及反應的櫻木的說話被這一舉動打斷了。只見站了起來的櫻木比另外兩人都要高出大半個頭。還未來得及再說話，已經被二人拖着向外跑去。

一行三人到達了昨晚大懲罰的場地-停屍間。只見到房門口站着一眾迎新營的籌委會成員，每一位都是面如死灰。見到如此場面，櫻木亦感覺到事情的嚴重性了。加上一踏入停屍間就湧入鼻孔的腥臭味，櫻木此時已經是完全清醒了。但當他看到停屍間的光景時，櫻木頓時感到一陣寒氣由脊骨傳到大腦。

「有冇人可以講我知到底呢度發生咩事？」櫻木聲音顫抖的問。「啲血手印係咩一回事？」

只見停屍間中間的地上留有一灘直徑大約三呎的紅色液體，由於房間中充斥着一陣陣血腥味，令人相信那些液體其實就是血來的。由這一灘「血」向着房門對面的牆壁的方向有一條由紅色的手印形成的路徑。從地板上的血的邊緣牆壁伸展，再由地面一直向上昇至天花板。更加詭異的是整個天花板全都是一個個的血手印！血手印的數量多至難以計算的程度。差不多整個天花板都被血手印覆蓋著。整個情境令人聯想起地獄的景況！

「係邊個做嘅？」櫻木問道。

Linus答道：「唔知！我地今朝早返到黎，諗住放返阿Ken出黎，點知一開門，就見到呢個樣啦。另外，原本應該係度嘅阿Ken亦都唔知去咗邊。好似人間蒸發咗咁。我地見事態嚴重，就即刻見你過黎！」

「先唔好理阿Ken住，有冇人可以解釋到d血手印係點樣印到上天花板？ 離地超過廿呎...就算櫻木咁高，用盡全力跳都冇可能印到上去㗎！」櫻木亦點頭讚同台灣仔的話。「而且係房入面亦搵唔到可以借力爬高嘅地方或者工具。就算阿Ken佢爬上手術枱上面，以佢嘅高度應該都印唔到嘅......」台灣仔已經斷定血手印是屬於Ken的。

Aaron接着說：「血手印點樣印上去係一個謎，啲血點黎又係另一個謎。呢度係停屍間，唔係血庫，冇理由有咁多血嘅。唔通血係阿Ken嘅？！」

博士開腔了：「正常人失咗咁多血，就算唔死都冇可能再郁動。咁阿Ken又去得邊呢？」

芝麻細聲的說：「而且呢間房又俾我地係外邊反鎖咗，雖然係入面係可以開到嘅，但係亦要有鎖匙至得。而鎖匙係Linus用O'Camp嘅名義向管理公司借返黎嘅。尋晚Linus交俾我之後就一直有係我身邊。咁即係話對於阿Ken黎講呢度係一間密室黎嘅。就算佢真係傻咗，放哂自己啲血，再唔知點樣印到成間房都係血手印，佢都要係度等我地放佢出黎。咁佢生嘅唔見人，係死嘅又唔見屍......到底佢去咗邊呀！！！」

大家很艱辛的才能聽得到芝麻所說的話。聽了後所有人都覺得格外的心寒。Linus突然大叫：「全部人同我將所有雪櫃門打開！」

所有人都恍然大悟，將房內十多個雪櫃門都全打開，只見雪櫃中全都是空空如也。連最後一個可能性都沒有了，所有人的臉都像是被人扭成一團一樣的白麵粉一樣，默不作聲的互相對望。

最後還是Linus開口：「而家情況係，
1)阿Ken 唔知生定死，就連屍都唔見咗。
2)成間房都係唔知邊度黎嘅血！
3)天花板嘅血手印亦唔知點印到上去！
幾樣野加起上黎，直頭可以成為醫學院第8大不可思議！」

「話時話，另外個7不思議係咩？」Kitkat忍不住又多口問道。
此時已經沒有人理會Kitkat的這些問題。所有人都落入深邃的沉思中。「使唔使報返俾Department知呀？ 而家阿Ken 唔見咗喎...」Kitkat不甘心沒有人理會他，繼續發問。

櫻木一副欲言又止的神情，幾次想開口又沒有發出聲來。最後，眉心一緊，向Linus走過去，在Linus耳邊用比芝麻說話時還要小的聲量說着。

「咩話！」Linus突然高聲說：「咁尋晚果個又係邊位？」正當房中其他人全都向他倆投以詢問的眼光，Linus卻突然發出指示：「台灣仔，芝麻，同博士你地去管理處借野返黎清潔呢度，記住，唔好俾人知道發生咗咩事！其他人跟我地返hall!」

雖然台灣仔，芝麻跟博士不停投訴，但Linus沒有理會他們，朝着古堡般的宿舍快步走去。「櫻木，你肯定尋晚阿Ken 十點之後就同你係埋一齊？」聽到Linus再次向櫻木確認事情之後，Aaron, Kitkat和博士都心底一寒。

「咁尋晚俾我地困住果個又係咩人？」聲音擅抖的Kitkat問。「唔通有鬼？」

Aaron用力拍了Kitkat一下：「邊有咁多鬼俾你撞呀！雖然話而家七月節啫...」

「咁你點解釋果個阿Ken係間密室入面消失咗？天花個啲血手印又點整到上去？而且我地hall又出名陰氣重，加埋就快七月十四......」

「早知就唔玩呢個大懲罰啦......真係撞鬼啦而家...」Aaron似乎亦相信Kitkat所說的鬼神論。

在前面的Linus和櫻木不發一聲，但從他們的臉色看來，他們心中亦有某程度的認同。

第三回 - 完

---

圖片來源:1, [2], [3], [4], [5], [6] Pixabay.

這不是一個鬼故事 (二)

這不是一個鬼故事 (一)