Word Poetry Challenge #3 : Gintong Medalya

Credit

Pilit na pagngiti, luha'y nangingilid,
Sa puso'y nagbubuno nang walang patid,
Hapdi, pag-asa, pait at pananabik,
Asam lang ang 'di tiyak mong pagbabalik

Walang humpay ang pagsabog ng pangamba,
Bawat panaginip ay pagkabagabag,
Laban ng bayan ang iyong dinidigma,
Bunga ng pag-ibig, aking nililimbag

Ngunit mahal ko, ano itong pasakit?
Sundalong umalis, kahon ng bumalik,
Sa iyong paglisan, pabaon ko'y halik,
Pag-uwi, gintong medalya ang kapalit?

At sa ating bagong silang na panganay...

Sapat ba ang gintong medalyang sinukbit,
Bilang tugon sa bawat tanong at bakit?

---

Salamat sa pagbasa ng aking tula. Ito ay ginawa para sa Word Poetry Challenge #3 : Gintong Medalya.

May 22, 2018 - 7:40 AM.