Philippine Poetry and Song Contest #1 - "Katahimikan"

Magandang araw po mga kaibigan at kababayan! Ako po ay lubos na nasisiyahan na makalahok po sa inyong patimpalakan, bagamat ang akin pong kalawakan sa pag unawa ng isang tula ay may hangganan, mandi'y akin pong pag iigihan para na din po sa dagdag angking kaalaman. Ang kahusayan po sa paglinang ng tula ay di po sa kagandahang bigkas ng mga titik lamang, bagkus yaong pagpaparamdam ng kalaliman at dulot sa puso ng kahatiran ng isang tula. Maraming salamat po!

Narito po ang aking tula, na pinamagatang "Katahimikan"

Katahimikan... ito ba'y wari ay tubig sa karagatan, na nagsasaad ng kalaliman?
... ito ba'y madilim na kaulapan sa himpapawidan, na nagbabadya ng isang unos?
...o sa kalaliman ng hating gabing nagdudulot ng nakakabinging... katahimikan.

Kaisipan ay pumapalaot, paroon.. parito, di ba nakababagot?
Katahimikan... lubos na katahimikan.
Datapwat ako'y napapalibutan ng mga kaganapan, mga gulo na nababalitaan, kabi-kabilang patayan, bunga ng syensang panlaban, pulburang nagpapabuga ng nagbabagang bala.
Kumikitil sa isang buhay o mas higit pa.

Katahimikan... ang unos ba'y lumipas na? Dambuhalang alon sa karagatan ay humupa na?
Nakakabinging katahimikan sa hating gabi ay nauulinigan pa ba?

Ngunit, heto na naman... di ba paulit-ulit lang? Dulot ng tao sa kapwa tao, mapangsalot na gawang kaperwi-perwisyo, na kumikitil sa buhay ng tao.

Pagod na ako... tama na!...
Katahimikan... sa paghawi ng malamig na hangin sa usok na dulot ng digmaan.
Katahimikan... sa mga daan-daang bangkay na nakaratay, ng mga inosenteng musmos na anghel sa kalupaan.
Biktima ng walang puso sa kaibuturan.

Katahimikan... luha ko'y umaagos at puso ko ay nagdadalamhati at tumataghoy.
Wala akong magawa... lakas ng tuhod ko'y bumibigay, kaisipan tuloy panilay- nilay.

Katahimikan... lubos na katahimikan.

Maraming salamat po!
Ito po ay aking sariling likha, ang inspirasyon o dulot ay sa kapapanuod ng balita, mga nagyayaring gulo sa loob at sa labas ng ating bansa. Muli po ako'y nagpapasalamat sa inyo mga kaibigan, lalong-lalo na po sa bumuo ng patimpalak na ito na dili at walang iba.na si @jassennessaj 😊.

Mabuhay po tayong lahat! Ako po'y lubos na kalugod-lugod sa inyong pagtangkilik sa aking mga gawa, mangyari po lamang na kayo po ay magbigay ng kumento, at kung mamarapatin po ninyo ay tatanggapin ko po ng buong puso ang inyo pong boto, yaon ay sa kadahilanang inyong naibigan ang aking tula.

Hanggang sa muli pong kaganapan! Ang inyong lingkod @dwightjaden po lamang 😊.