"The Diary Game Season 3, week #18 | September 10, 2021 | Ang Aking Vertigo at Ang Kaarawan Ng Aking Bunsong si CJMari"

Magandang araw mga kasama, sana ay nasa mabuti kayong kalagayan at kalusugan!

May kalamigan ang klima dito sa amin pagkatapos ng bagyong "Jolina" mabuti at sumisilay paminsan minsan ang araw. Nagpapasalamat ako sa Poong Maykapal at iniligtas kami at hindi ganun kalakas ang hangin.

Ngayong umaga, hindi pa rin ganun kagandahan ang aking pakiramdam dahil sa iniinda kong "Vertigo" ngunit ayokong magpatalo sa nararamdaman kong sakit na ito. Sobrang sama ng pakiramdam ko nitong dalawang nakaraang linggo halos di ako agad makatayo dahil sa sobrang lula na nararamdaman ko. Di ako yung tipo ng taong umiinom agad ng "synthetic medicine" kapag may nararamdaman. Hangga't kaya ko prutas at gulay lang ang nilalantakan ko. Siyempre pa kailangangng kompleto ang tulog at "nutritious foods". Iwas stress talaga at puyat. Ganito ang agahan naming mag-ina at ng aking Nanay. Berdeng ensalada, avocado at "fish fillet" na "yellow fin". Sa umagang ito wala kaming kanin. Ensalada at prutas imbes na kanin.

Kaarawan ng aking minamahal na bunsong si CJMari kaya pilit kong bumangon para ipagluto siya ng kanyang paboritong "Chicken-Chili-Pasta" at "Fruit Salad Gelatin" para sa pananghalian. Marami na naman nakain si bunso. Basta gusto niya ang haing pagkain di pahirapan ang pagpakain sa kanya. Masayang-masaya siya kapag ang kanyang paboritong pagkain ang ihahain sa kanya. Busog na busog siya at nakadalawang "servings" pa ng "pasta". Tuwang-tuwa siya lalo sa kanyang dessert. Di maawat sa pagkain ng "gelatin" nangalahati ang inihanda kong "gelatin" at enjoy na enjoy. Habang kumakain may pangiti-ngiti pa at "beautiful eyes".

Kay bilis talaga ng panahon. Kelan lang baby pa siya at magaan pang buhatin at kalungin. Ngayon, 22 taong gulang na siya. Kung makakapagsalita, makapaglakad, at makakaupo lamang siya. Sayang at hindi talaga niya na-enjoy ang kanyang pagkabinata. Minsan tuwing pinagmamasdan ko siya, napapaiyak ako sa kalagayan niya. May mga oras na naitatanong ko sa sarili ko bakit ang bunso ko pa ang nagkakaron ng ganung klaseng sakit ngunit magkaganun man, pinapasa-Diyos ko na lang ang lahat alam kong meron siyang ibang plano para kay CJMari. Kung ano man yun, ang Siya lang ang nakakaalam ng lahat. Talaga nga namang mahiwaga ang buhay.

Naglalambingan at nagtulog lang kami buong maghapon at kailangan ko talagang mag-ipon ng lakas ng mawala ang aking "Vertigo". Pagkagising, naghapunan at konting kulitan pagkatapos kumain. Pinaliguan si "Big Boy" at matulog ng maaga.

Hanggang sa muli mga kasamahang Steemians. Sanay matiwasay din ang buong araw ninyo.

Salamat sa pagbasa.

@joshuelmari

---