හීනෙන් වත් එන්න එපා| @saku49539

කොහොමද යාලුවනේ. ඔයාලා හැමෝම හොඳින් ඇති කියලා හිතනවා. මං අද ආවෙ ඔයාලට තවත් කවි පන්තියක් අරගෙන. "හීනෙන් වත් එන්න එපා" කියන එක තමයි මේකෙ මාතෘකාව. සරලවම කිව්වොත් මේකෙන් කියවෙන්නෙ ප්‍රථම ප්‍රේමය අහිමි වුනු තරුණයෙක් දැකපු හීනයක් ගැන. අපි මුලින්ම පද්‍ය පන්තිය රසවිඳලා ඉමු.

කුළුඳුල් ආදරෙන් මත් කර ළඟම හිඳ
ගියදා දුරට මගෙ අහසින් වැටුනි සඳ
නින්දත් උදුර ගත් තැන රෑ නිදන ඇඳ
මතකය හදේ කොනකට කර තබමිබැඳ

කඳුලැලි වලාවන් ඇහිපිය මතින් එලා
පුන්සඳ රැයේ මනසේ සිතුවමක් කලා
ඒ සඳ රැසින් රෑ හීනෙන් වුනිද මුලා
දුවන මුවන් දැක නොදමමි නෙලූ පලා

රැයටත් හොරා පිපි කඩුපුල් හොරෙන් නෙලා
ඇවිදින් ගියේ ඇයි සඳ හදවතම තලා
රසයක් විඳින්නට ඇවිලෙන විටදි බලා
හදවත මගේ කූරක් නොමවේය නිලා

හිමි වන අහිමි වන එක ලෝකයෙ හැටිය
මතකය මකා මට හැක ඉවසා සිටිය
හීනෙන් උනත් ආ විට හද බැඳි වැටිය
පුපුරන හඬට පැරදුනි කිඹුලා පිටිය

දුක නෑ කියන්නට මගඵල නැතිය මට
එනමුදු නුඹට පතනෙමි සුබ වෙන්න හෙට
නුඹ ගැන මතක ආයෙත් යලි නැගෙන විට
තදකර බඳිමි දුවනා හදවතට වැට

කොතරම් හැඩට පෙනුනද බාඳුරා පෙතී
රැවටී මටත් දැන් නම් හොඳටෝම හතී
හිමිවුනු නෙළුම් මල හා මා වෙතම ගැතී
මියෙනා තුරුම ඉන්නෙමි සෙනෙහසින් එතී

මේ පෙම්වතාට අතිතයේ දවසක පලමු පෙම අහිමි වෙනවා. ඒ තරුණිය ඔහුව අතහැර යනවා. ඒත් අදටත් පරන මතක ඔහුව රිද්දනවා. ඔහුට නින්ද පවා අහිමි වෙනවා. මෙන්න මේ කවියෙන් කියවෙන්නෙ ඒ ගැන.

"කුළුඳුල් ආදරෙන් මත් කර ළඟම හිඳ
ගියදා දුරට මගෙ අහසින් වැටුනි සඳ
නින්දත් උදුර ගත් තැන රෑ නිදන ඇඳ
මතකය හදේ කොනකට කර තබමිබැඳ"

_{Source link}
*දැන් ඔහුට අලුත් පෙම්වතියක් ඉන්නවා. ඒත් දවසක් ඔහු අර කලින් පෙම්වතිය හීනෙන් දකිනවා. ඔහුට ඒක සතුටක් වගේම දුකක්. "කඳුලැලි වලාවන් ඇහිපිය මතින් එලා - පුන්සඳ රැයේ මනසේ සිතුවමක් කලා" මේ පද්‍ය ඛන්ඩයෙන් කියවෙන්නෙ ඔහු ඇය හීනෙන් දුටුව වග. ඔහු හීනෙන් ඇයට වශී වූවත් සැබෑ ජීවිතයේ පෙම්වතිය ඔහුට වටිනවා. අලුත් පෙම්වතිය ඔහුට කොච්චර වටිනවද කියලා ඔහු කියන්නෙ මෙහෙම. " ඒ සඳ රැසින් රෑ හීනෙන් වුනිද මුලා - දුවන මුවන් දැක නොදමමි නෙලූ පලා"

"රැයටත් හොරා පිපි කඩුපුල් හොරෙන් නෙලා - ඇවිදින් ගියේ ඇයි සඳ හදවතම තලා". මේ පද්‍ය ඛණ්ඩයෙන් කියවෙන්නෙ ඇය හීනෙන් දුටුව එක සතුටක් බවත්, ඒ හීනය කෙටි නිසා නැවත ඔහුට දුකක් ඇතිවූ බවයි. මේ ලෙස හීනෙන් ඇවිත් හිත රිදවීම ඔහුට වේදනාවක් බව ඔහු පවසනවා. ඔහුගේ හදවත පුපුරන හඬ කිඹුලාපිටියේ මල්වෙඩි වලටත් වඩා වැඩි බව ඔහු උපමාවෙන් පවසනවා. ඔහුට මේ ජිවිතය මහන්සියි. එම නිසා ඔහු හිතට තරවටු කරනවා. අවසාන වශයෙන් ඔහු හිත හදාගෙන තමන්ගේ සැබෑ පෙම්වතිය සමඟ මැරෙන තුරාවටම ජීවත් වෙන්න සපථ කරගන්නවා. අවසාන කවියෙන් කියවෙන්නෙ ඒක.

දැන් ඔයාලට තේරෙනවා ඇති මේ පද්‍ය පන්තියේ සරල අර්ථය. එහෙනම් ආයෙත් කවියකින් හමුවෙමු. ඔයාලා හැමෝටම බුදුසරණයි.

ස්තූතියි!!!