කැලෑ මල් වල ප්‍රභූ මල්...

සුබ දවසක් හැමෝටම!

මම කලින් දවසෙ ඔයාලට කිවිවනෙ පිදුරුතලාගල ගැන, අපි එහේ ගිය ගමනක් ගැන. ඉතිං ඇත්තටම පිදුරුතලාගල කඳු මුදුන කියන්නෙ එක එක ජාතියෙ ලස්සන ලස්සන මල් ගොඩාක් පිරිච්ච තැනක්. කඳු මුදුනෙදි මම අරගත්තු තවත් එක ලස්සන පිංතූරයක් මං ළඟ තිබුණ.

මට හිතෙන්නෙම මං මේ පිංතූරෙ ගනිද්දි මේ හැඩ වැඩට ඉඳල තියෙන්නෙ කැලෑ ඩේසි මල් යායක් කියලමයි. ඉතිං මේ පිංතූරෙ දිහා බලන් ඉද්දි මට හිතට ආපු දෙයක් මං අකුරු කරා.

පිදුරුතලාගල

හරි දුකින් ඉන්නවැති කැලෑ මල්...

බිං කළුවර වැටීගෙන එන හවසක,
අහස පුරාම විසිරිච්ච, වළාකුළු ගොන්නකට,
ඉර දීල යන,
තද දම්, රතු, කහ, තැඹිලි,
ඒ ලස්සනම,
මැජික්කාරම පාට ඔක්කොම,
තියෙනව නෙව අපි ළඟිත්,
හරි හැඩට, අඩු නැතුව,

ඒත්,,,

කැලෑ මල් වෙලා ඉපදුනේ,
පෙර කළ පවකට වෙන්නැති අපේ.
පිපුණත් කොයි තරං, හැඩ රුවට අගේ,
ඒකනෙ නොබලන්නෙ
කවුරුත්ම,
රුව ලස්සනේ අපේ...

එහෙමත් හිතනවැති
ගමේ - වන වදුලෙ පිපුණු
අහිංසකම කැලෑ මල්...
හරි දුකින් ඉන්නවැති ඒ මල්...

ඔය අතරෙ,,,

දුරම දුර ඈතක, උසම උස කන්දක,
පොඩියක් විතර බෑවුමක,
ඉන්නව
ප්‍රභූ මල්
ඔව් එයාල තමයි,
කැලෑ මල් වල ප්‍රභූ මල්...
කැලෑ මල් වෙලා ඉපදිච්චි එකට
සතුටින්ම ඉන්න කැලෑ මල්...
ඉඳ හිටල අපි එහෙ ගියාමත්,
ආව කවුදැයි කියාවත්,
නිකංවත් නොබලන කැලෑ මල්.
ඔව් එයාල තමයි, හරි ආඩම්බරකාර,
ප්‍රභූ කැලෑ ඩේසි මල්...

කැලෑ මලක් වෙලා ඉපදුනත් මොකද,
මේ දූපතෙන්ම, වැඩියෙන්ම උසම තැන...
අළු පාට සුදු පාට
පුළුං හා පැටව් වගෙ
හෙමි හෙමින් ඇදිල යන
වළාකුළු පුළුං ගෙඩි
අල්ලන්න උසම මල්.
ඔව් අපි තමයි,
එයාලට ළඟම, උඩම ඉන්න කැලෑ මල්.
ඉතිං ඔව්,
අපි තමයි,
කැලෑ මල් වල ප්‍රභූ මල්...

හවසක අහසක, වෛවාරණ පාට නැතුවට,
ඝනම මීදුම් දුමාරෙක, පිරිසිදුම පාට මල්...
ළඟින් යන එන ඇත්තො, හරි ලස්සනයි කියන,
ඒ වගක් කනකට නොගෙන, උඩ බලාගෙනම ඉන්න,
අපි තමයි,
කැලෑ මල් වල ප්‍රභූ මල්...

ඈතින්ම වටේටම, නිල් පාට කඳු පේන
ඒ හැඩ කඳු වළලු, අහස අල්ලනු දකින
අපි තමයි,
ලෝකෙ ලස්සනම තැන ඉන්න,
වාසනාවන්තම කැලෑ මල්.
ඉතිං ඔව් අපි,
කැලෑ මල් වල ප්‍රභූ මල්.

ඈත කඳු වල හැපී එන, හැම තැනම ගොහිං එන,
සුළං රැලි විත් කියන,
පහළ පැති වල කැලෑ මල් වල
වග විස්තර අසන,,,
කවුරුත්ම හැඩ යැයි නොකියන නිසා
උන් තුටින් නැති වග අසා
අපි නම් ප්‍රීතිමත් නෙව දැයි සිතා
තව ටිකක් ආඩම්බරම වෙන,
ඔව් ඇත්තමයි, මේ නම් ප්‍රභූ මල්,
කැලෑ මල් වල ප්‍රභූ මල්...