Share Your Message on the Vesak Poya Day/ 10% SL Charity

ගෞතම බුදුන්වහන්සේගේ තෙමඟුල සමරණ වෙසක් පොහෝ දින පිළිබඳව සිතන්නට, ලියන්නට පෙළඹවූ මේ පෝස්ටුව අගනේය.වෙහෙසකර දිනක නිමා⁣වේදී වුවත් මගේ වෙසඟ සිතිවිලිවලින් බිඳක් මෙම පල කිරීම දුටු වහා ලියා තබන්නට පෙළඹුණු බව කෘතඥතාපූර්වකව සඳහන් කරණු කැමැත්තෙමි.

මෙවර මෙරට බහුතරය වන බොදු ජනතාවට තෙමඟුල සමරන්නට සිදුවු⁣ණේ නිවාස අඩස්සියේ දී වුවත් විවේකීව ගත කරන්නට ඉඩ ලැබීම නිසා වඩාත් හැඟීම්බරව පොහෝ දිනය ගත වන්නට ඇතැයි සිතමි.සිල් සමාදන් වීම පුරුද්දක් කර ගත් අය නිවසේ දී අටසිල් සමාදන්ව වෙසක් දිනය ගෙවන්නට ඇත.

මා සම්බන්ධයෙන් කණගාටුදායක කරුණ වූයේ හදිසියේ රැකියාවට යාමට සිදු වීමත් සවස 5 වන තුරු එහි රැඳී සිටීමට සිදුවීමත්ය. අප අත්‍යවශ්‍ය සේවා යටතට ගැනෙන බැවින් අවශ්‍යතාව මත යා යුතුය.

මගේ වෙසක් 😥

යළි නිවසට පැමිණීමෙන් පසු නිවසේ අනෙක් අය කලින් මිලදී ගත් වෙසක් කූඩුව සමඟ වෛවර්ණ කුඩා බල්බ වැලක් සවි කර දල්වා එහි හැඩ රුව බලනයුරු ඇසිණි.එය නරඹන්නට එන්නැයි ආරාධනයක් ද ලැබිණි."උන්නු හැටියට මලා මදැයි" කීවා මෙන් කාලේ හැටියට නරකම නැත.😁

මෙවර අපේ ආමිස පූජාව

එය දකිද්දී වෙනත් වසරවල දී කල් තබා සව් කඩදාසි හැඩට කපා කූඩු ඇලවූ අයුරු, පාට බල්බ් වැල්, බකට් පහන් සහ වෙසක් පහන් දල්වා නිවසේ සවිකර වෙසක් සිරි නරඹන්නට ගිය'යුරු සිහිවිය.

අපගේ නගරයට පිට පලාත්වලින් පැමිණ වාර්ෂිකව දෙනු ලබන වෙසක් දන්සැල් රාශියක් වාර්ෂිකව පැවැති හෙයින් රෑ කෑම ගෙදර නොසාදා කළ දන්සැල් වන්දනාව පවා මිහිරි මතකයකි.කථන භාෂාවෙන් කිවහොත් "ඒක වෙනමම ආතල් එකකි".😁

අප බහුලවම වෙසක් සමරනුයේ ආමිස පූජාවක් ලෙසය.එහෙත් වඩාත් සුදුසු වන්නේ ප්‍රතිපත්ති පූජාවයි.

අට පට්ටමකට ද අරුතක් ඇත.

බුද්ධ භාෂිතය අන්ධානුකරණයෙන් ඇදහිය යුත්තක් නොවේ.කාලාම සූත්‍රයෙහි දී බුදුන් වහන්සේ ⁣දෙසන ලද්දේ ද පරම්පරාවෙන් පැවත එන නිසා හෝ කිසිවකු පැවසූ පමණින් හෝ තමන්වහන්සේ දෙසන නිසා නොව අපම සොයා බලා අවබෝධයෙන් වැළඳ ගත යුතු දහමක් බවය.

ඉන් කිසිවකු මත බලෙන් නොපටවන ප්‍රජාතන්ත්‍රවාදී ස්වභාවය පැහැදිලි වේ.
නිදහස්ව හා බුද්ධිමත්ව නුවණැසින් දකිමින් බෞද්ධ දර්ශනයේ හර පද්ධතිය හඳුනා ගනිමින් අපේ එදිනෙදා ජීවිතය තුළට කෙමෙන් තිර ලෙස ඈඳාගත යුත්තකි.

භාණක පරම්පරා විසින් කටපාඩමෙන් රැකගෙන විත් පසු කලෙක ග්‍රන්ථාරූඪ වී අදටත් ත්‍රිපිටකය ලෙසින් වසර දෙදහස් පන්සියකටත් වැඩි දීර්ඝ කාලාන්තරයක් ධර්මය පැවතීමම ප්‍රාතිහාර්යයක් ලෙස දකිමි.

අප බෞද්ධයන් යැයි ආඩම්බරයෙන් අපව හඳුන්වා දීමට කැමති නමුදු පන් සිල් නොරකින්නේ නම් අප සැබැවින්ම බොදුනුවන් නොවේ.

පන් සිල් රැකීමට ඇතැම් පැවිද්දන් ද අසමත් නමුදු නිසි ලෙස රකින පංච ශීලය පමණක් වුව බලගතු අධ්‍යාත්මික ශක්තියකි.

දකුණු පලාතේ වියපත් මහතෙකු වතුර මතුරා දී රෝග සුව කරන අයුරු කලකට පෙර පුවත්පතකින් කියවූ මතකයක් මා සතුය.ඔහු කියා තිබුණේ එය මැජික් එකක් නොව ඉතා දිගු කාලයක සිට තමා පන් සිල් රකින්නෙකු බවයි.

අප උපන් ර⁣ට පත් වී ඇති ඉරණමට මෙන්ම සමාජයේ ඕනෑම ස්ථානයක දී අපට අත් විඳින්නට සිදුවන පෘතඥන ගැටළු සියල්ලටම පාදක වී ඇත්තේත් අප නිරන්තර දැවෙන්නේත් තෘෂ්ණාව,මමත්වය, රාගය,
ද්වේශය, මෝහය ආදී නිතැතින් ඉස්මතු වන භාවයන් බව විමසුම් ඇසකින් බැළුවහොත් ඔබට පෙනී යනු ඇත.

එහෙයින් මගේ වෙසක් පණිවිඩය ලෙස යෝජනා කරනු ලබන්නේ ඊට විසඳුම් චතුරාර්ය සත්‍යය (දුක,දුකට හේතුව,දුක නැති කිරීම,දුක නැති කිරීමේ මග) මත පදනම් වන බෞද්ධ දර්ශනය තුල නිසැකව අන්තර්ගත හෙයින් සම්මා දිට්ඨියෙන් අරඹා හදාරමින් හැකි උපරිමයෙන් එදිනෙදා ජීවිතය තුළ ධර්මයෙහි හැසිරෙන්නටත් ලද දුලබ මිනිස් අත් භවය තුළදීම නිවෙන්නටත් උත්සාහ දරමු යන්නයි.

---- චාම් ----