Kusina ni Nanay Romeskie | Pochero

Magandang araw! Narito na naman po ang Kusina ni Nanay Romeskie. Sa katotohanan po ay buong linggong bukas ang kusina ni nanay dahil walang ibang gustong kainin si Aya kundi ang luto lamang ni nanay. Nakakataba ng puso, anak. Ngayong Lunes, nais ko lamang ibahagi sa inyong lahat ang aking niluto dahil unang beses ko pa lamang itong niluto. At ako'y nagagalak dahil may bago na naman akong natutunan.
Narito na ang ulam ngayong tanghalian:
Ang Pochero, Palong- palo ni Nanay Romeskie!

Trivia: Ang Pochero ay isa pa sa mga impluwensiya ng Spain sa ating bansa. Ito ay itinuturing na primera klaseng ulam dahil kumpleto ito sa lahat ng nutrisyon. May karne na maaaring baka o baboy, gulay tulad ng pechay, repolyo at baguio beans, root crops tulad ng kamote o patatas, at prutas - saging.

Mga kakailanganin

1. Kawali
2. Sandok
3. Kutsilyo at sangkalan
4. Panukat na tasa

Mga sangkap

1. Baboy
   • Hiwain nang katamtaman lang ang laki. Nakalimutan ko na naman ibilin kay Tatay Ritsard na kaunting taba lang ang bilhin pero di bale, sa susunod na lang.
     
2. Patatas
   • hiwain nang mga isang pulgada ang kapal
3. Carrots
   • may pakiramdam akong wala naman talagang ganito sa orihinal na pochero pero dahil gusto ni Tatay Ritsard ito para kay Aya, idagdag na rin natin. Sayang naman kasi.
     
4. Saging na saba
   • hiwahiwain nang medyo makakapal. Patabingi dapat ang hiwa pero naalala ko na lang nung nahiwa ko na.
     
5. Pechay
   • paghiwahiwalayin lang. Isang bungkos lang dapat peri dahil walang repolyo, dalawang bungkos na ang binili ni Tatay
     
6. Sibuyas, bawang at kamatis
   • hiwahiwain nang maliliit
     
7. Tomato sauce
   • yung maliit lang na sachet, kasya na yun
     

Paraan ng pagluluto

1. Igisa ang sibuyas, isunod ang bawang tapos ang kamatis
2. Isunod ang baboy
   • Lagyan ng dalawang kutsarang patis saka sangkutsahin. Halu-haluin hanggang sa makitang pumuti na ang lahat ng gilid ng baboy
3. Ilagay ang tomato sauce
4. Lagyan ng tubig
   • siguraduhing lubog ang lahat ng baboy sa tubig. Anim na tasa ang inilagay ko. Pakuluin nang mga kalahating oras
5. Pag nakitang kulo na, ilagay ang patatas at carrots
   • palambutin nang mga limang minuto
6. Ilagay ang saging na saba
7. Kapag malambot na ang saging, ilagay na ang pechay
   • palipasin lang ang mga kalahating minuto saka patayin ang kalan. Maluluto na ang gulay sa init ng sabaw.

At ayan na ang pochero natin na palong palo sa sarap!

Paghuhusga ng panlasa:

Biyenan: Two thumbs up. May komento pang: "Kuhang kuha mo ang lasa!" Bawal na sa kanya kumain ng marami pero napasarap ang kain

Tatay Ritsard: Tumikim ng sabaw habang nasa sala ako. Pinuntahan ako habang hawak pa ang kutsara at sinabing "Ang sarap ng luto mo mahal!" ayhieeee! Kinilig aku!!!

Aya: Sumabay na kay tatay kumain, sumabay pa ulit kay nanay.

Konklusyon:

Hindi na kinakayang itago ni Tatay ang tuwa niya sa mga luto ko. Nagututo na talaga ako. Hehe

Nalilibang akong magluto nitong mga nakaraang araw. Sabi ko kay tatay, nag-a-audition akong maging housewife. Sana pumasa ako.

At iyan nga po ang ihinain ni Nanay Romeskie ngayong tanghali. Unang beses ko pa lang itong iniluto kaya sinigurado kong punung puno ng nutrisyon, pag-aalaga at pagmamahal ang pagsasaluhan sa hapag kainan.

Maraming salamat sa pagbabasa!

---

---