Nakadawat kini og Ikaduhang Ganti sa 1st Flash Fiction Contest nga gipasiugdahan sa Nagkahiusang magsusulat sa Cagayan de Oro (NAGMAC) sa Dakbayan sa Cagayan de Oro City ug una kining napatik sa Bulawan LIterary Folio sa maong grupo.

---

Morag gahapon lang ang halos baynte katuig nga milabay sukad ko migradwar sa City High. Morag gahapon lang nga perte nakong tinago sa matag suok sa building sa mga fourth year aron dili matagboan ang pangasaba sa Guidance Counselor nga morag nagbantayg kriminal nga makaikyas sa prisohan, hilabi na kon malate. Ug karon mao pay pagbalik nako sa maong tunghaan. Makigatubang sa kanhing mga higala. Makigatubang sa nakalubong na nga kagahapon.

Usa ka oras nako kapin naabot sa multi-purpose hall, gikan sa gitakdang schedule diin gipahigayon ang Grand Alumni Homecoming. Ug kon dili palang ang akong batch, Batch 2010, ang mag-host niining maong reunion sa kanhing mga sip-onong hayskul nga karon mga malamposon nang mga propesyonal, dili ko makatunob og balik diri.

Gipatapot nako ang name tag nga giprepara sa Secretariat. Nanghinaot ko nga wala untay makakita nako o kailang makabantay sa akong presensya diri. Kay sa sugod palang niining tanan, wala ko diri para sa mga kanhing mga higala o mga klasmeyt nga gakisikising makita ang ilang mga tagsa-tagsang mga kunot, magpadaghanayg sakit, o mangumusta sa nahitabo sa ilang tagsa-tagsa ka mga kinabuhi sukad sa katuigang milabay. Wala ko mitambong para nianang tanan.

Pero malipay napod ko bitaw magtan-aw sa uban, samtang naghawid ko sa akong softdrinks, sa kilid. Makita ang kalipay nga makabalik sila sa abaga sa mga suod nilang higala nga naangkon tungod sa pagtambayong ug pag-uban sa nagkadinaiyang mga kabuang sa high school. Mga hagikhik manglapos sa pagdahunog sa musikang pinalabyog nga gipatukar sa DJ uban ang pagdumdom sa mga kasinatian sa unang nilang hinigugma nga sa pagkakaron makapangisi kanila. Ug ang mga pakigbayloay sa nadumdoman pang kagahapon diha sa ilang tagsa-tagsa ka mga paboritong maestra. Makadumdom sad pod biya ko sa bersyon sa akong pagka-high school pero, mao sad lage, dili tanan angayng balikag pag-ayo. Tinuod! High school ang pinakamemorableng katuigan sa kadaghanan. Pero dili alang sa tanan.
“Oras na para ako na say makighimamat sa akong kagahapon.” ingon ko sa akong hunahuna dayon pasiplat minglili sa relo. Gibutang nako sa lamesa ang botelyang akong gihawiran ug migawas sa lawak nga padayon ang kasadya. Gitabok nako ang mangitngit nga quadrangle hangtod sa naabot nako ang atbang nga building sa mga fourth year kaniadto. Walay suga sa palibot, hilabi na sa quadrangle. Ug ang hayag gikan sa pikas pang building ang nagsilbi nakong giya niining maong kagabhion.

“Kathy’s corner” maoy pagbasa sa karatula sa student lounge nga motagbo sa pagsulod mismo sa maong building. Usa ni sa mga lugar diris City High nga maingon na nga monumento kay kining maong student lounge gipangalan sa usa ka 4th year Supreme Student Government president nga nawala ug wala na nakita hangtod sa adlaw sa graduation. Walay makatino ug makatudlo kon asa na ang maong estudyante. Ingon nila gi-rape. Ingon nila gipatay. Maski ang mga kapulisan walay mahatag nga saktong eksplanasyon, maski man lang ang motibo sa iyang pagkawala.

Gikuot nako gikan sa akong bulsa ang gipilo-pilong itom nga garbage bag ug midretso sa usa ka gamayng garden nga nahimutang sa tuong bahin niining akong gilingkorang student lounge. Giyak-an nako ang basa-basa pang yuta ug gisugdag pagkalot gamit lang ang duha nakong mga kamot. Hinay-hinay nakabkab ang yuta. Hinay-hinay nakutkot hangtod mingbuho kini sa basang yuta. Hangtod mingpakita ang tuyo nakong makita. Gikalotan pa nako og pag-ayo bag-o nako sila hinay-hinayng gikuha gikan sa pagkalubong ug gisulod sa itom nga garbage bag.

Dihang nasulod na ang tanan, nagpamati ko sa multi-purpose hall kon gapadayon pa ang ilang panagsadya sa ilang pakighimamat sa mga higala. Sige pa ang tukar. Basig wala pa gyod nahuman. Gipapha nakog ayo ang yutang mingtapot sa akong pantalon bag-o migawas sa maong building ug migawas sa tunghaan. Dako nakong ngisi nga minggawas sa lawak ug gibyaan ang uban pa nakong batch sa kaalegreg kalipay nila. Nakatagamtam nako ang akong bahin sa kalipayg kaalegre. Dala nako niining itom nga putos ang akong tuyo sa pag-tambong sa reunion.

Mingsulod ko sa akong sakyanan nga naka-park duol sa eskuyalahan ug giabrihan ang itom nga garbage bag. Mga bukog sa akong kanhing higala ug kanhing hinigugma.

“Hello, Kathy! It’s nice to see you again.” ingon ko, bag-o mipaturatoyg padagan pauli sa balay.

(KATAPOSAN)