RE: COOK YOUR WAY TO WIN 2 STEEM
Ha! 500 naira na big money ehehehehehehe Oya make I start the cooking
Na okro soup I want cook so in the calabar special way!
Okro 100
Ice fish 100
Ikpa(kpomo) 50
Redoil 50
Mfi perewinkle 50
Fufu 50
Maggie 20
Crayfish 50
Salt-borrow from neighbor or you get for house already.
Pepper- 20
Adusa— bargain price with the seller to give you small for 10naira
Onion—borrow from neighbor
Water—scoop from your drum
Stove or firewood enter bush pick woods.
Na the way to cook all these things be this here!
First of all cut and wash your kpomo, ice fish. Then wash your perewinkle well well make all the dirty for inside their body fly commot sharp sharp.
You fit use salt wash the perewinkle to remove all the yama yama for the thing body.
Secondly, put them inside small pot, Remember na small soup so no attempt to use big pot.
Put the fish, kpomo, perewinkle then add Maggie, Pepper and sliced onion with salt to steam the thing.
Then you go don chop your okro into pieces by now, pound your crayfish keep aside and also slice your Adusa keep.
By now your fish and kpomo Don steam, Remember steam the thing no boil am. If them dey boil meat/fish without steaming, Taste no dey enter inside the thing body.
Then when you bring am down, put clean pot for fire, allow am make the thing dry well then pour your red oil inside.
When the oil Don fry small no let am go white turn to groundnut oil. Just heat am small, then add a pinch of salt, add small onion, then pour your okro inside and stir the thing wella, no let the okro go fry too much na just to make the thing touch fire dry well.
Then pour your crayfish inside, stir am well, then pour those things wey you steam inside.
Add Maggie, add salt, taste the thing. Na from your mouth you go take sabi how you like the taste because some people dey like plenty pepper some plenty salt so suit your mouth and add up any condiment wey you feel say lack.
No forget to add small water. Then allow am boil small, add Adusa leaf wey you Don slice keep, then stir the thing bring am down from fire. Scoop put for plate then carry fufu take chop am. If you no like fufu use Eba.
Chai na your mama born you @cateyes1990. See as the food make sense.
Eyenwoño. No be small work. 😂😂😂😂 Una and okro soup ehnn