小朋友，壓力大

琴日同個女睇書 ，睇到呢本字典裏面有啲字我都唔識，到底係我英文程度太差，定係而家小朋友學嘅嘢太深？
童年到底係應該嘻嘻哈哈、吃喝玩樂、開開心心咁過一日，定係要努力學習新知識 ？究竟係而家啲小朋友係越嚟越聰明、越嚟越早熟？定係做家長嘅，太早灌輸太多知識畀佢哋？
好坦白，我個女而家4歲，但係佢嘅英文已經好過14歲嘅我， 到底係家長嘅問題、環境問題定係社會問題？而家兩文三語好似係必須咁，有時我都喺度諗，係咪而家嘅家長過份催谷？我係咪應該畀佢玩多啲？但係香港係一個好現實嘅社會，入唔到好學校，就好似選擇少好多咁樣………
有時唔係你想比較，但係你身邊總會有人同你一齊，一拍埋去就比咗落去、 然後就會自我審查一番，睇下係咪自己嘅問題。 呢啲係咪真係我自己愛比較嘅性格問題？ 但係香港嘅社會，就係乜都需要你比較、乜都需要競爭， 咁樣做人其實好攰😵😵😵
我呢排諗咗好耐，我到底應該點樣教好個女？我唔想谷得佢太緊要，但係又唔想佢同正常嘅小朋友 距離太遠，我應該點樣做先好？

[WhereIn Android] (http://www.wherein.io)