Rənglər və biz.

Bu şəkli bir il əvvəl çəkdirmişəm. Bu gün təsadüfən qarşıma çıxdı və üzərimdəki rəngləri görüncə düşündüm ki, rənglər həyatımda böyük rol oynayır. Yalnız mənim deyil, yəqin ki çoxlarının.
Mən geyimdə əlvan rənglərə üstünlük verirəm, daha çox sarı, qırmızı, narıncı çalarlar seçirəm. Çünki bu rənglər məni sakitləşdirir, özünə əminlik hissi verir, əhval ruhiyyəmi yüksək tutmağa kömək edir.
Şəhərə çıxanda görürəm ki, insanların əksəriyyəti qara rəngli üst geyimləri geyinir-palto, pencək, plaş və gödəkcələr daha çox qara rəngdədir. Bunun səbəbi nədir bilmirəm, yəqin insanlara qara rəngdə geyimlər geyinmək daha rahatdır və ya başqa səbəblər var. Onu deyə bilərəm ki, qara rəng qadınları arıq və biçimli göstərdiyinə görə qadınlar bu rəngdə axşam geyimlərini çox sevirlər.
Rənglər həyatımızda böyük rol oynayır, məncə insanın seçdiyi və istifadə etidyi rəng onun daxili aləmindən xəbər verə bilər. Bir dəfə hardasa oxudum ki, xoşbəxt olmayan adamlar əlvan rənglərdə geyinir ki, öz mənasız həyatını bir az da olsa boyasın. Mən belə düşünmürəm, zənnimcə rəngli geyinən insanlar daha çox sərbəstliyi sevən, sərhədləri aşmaq istəyən yaradıcı insanlardır.