မဲလုံး
မဲလုံးက ဆရာဝန် မဟုတ်သဖြင့် သူ့ရောဂါ ဘာမှန်း မသိချေ။ သို့သော် သူ ကြာကြာ ခံတော့မှာ မဟုတ်မှန်းတော့ အလိုလို သိနေသည်။ သူ့မှာ ဆက်လက် ရှင်သန် နိုင်လောက်သည့် ခွန်အား မရှိတော့။ စင်စစ် ရှင်သန်ချင်သည့် စိတ်ဓာတ်ပင် မရှိတော့။ တစ်သက်လုံး မတ်တတ် မတ်တတ် ဆိုသလို နေလာခဲ့ရာက ယခုတော့ နေ့လည် ကြောင်တောင်ပင် မြေပြင်မှာ ဝပ်စင်းချင် နေပြီ။ တုံးလုံး ပက်လက်ကြီးသာ လှဲ၍နေ ချင်ပြီ။ သူ့သခင်တွေ မဲလုံး အနီးသို့ ရောက်လာကြသည်။ သူ သွားတော့မည် ဆိုတာ သည်လူတွေ သိနေကြ သည်ပဲဟု မဲလုံး တွေးမိသည်။
သို့သော် သူ မအံ့ဩပါ။ သည်လူတွေသည် တစ်သက်လုံး သူ့ကို ခိုင်းစေလာကြသူများ၊ သူ့ကို အမျိုးမျိုး အဖုံဖုံ စီမံခန့်ခွဲ လာကြသူများ၊ သူ့ဘဝတစ်ခုလုံးကို ချုပ်ကိုင် ခြယ်လှယ်ကြသူများ ဖြစ်၍ သူ့အကြောင်း သူ့ထက်ပင် သိကြမည် ဆိုလျှင်လည်း မဲလုံး အံ့ဩမိမည် မဟုတ်ပါ။ ဖြစ်နိုင်မည် ဆိုလျှင် သည်လူတွေကို တစ်ခုလောက် မဲလုံး တောင်းပန်ချင်သည်။ သူ့ရှေ့ ခြေထောက် နှစ်ချောင်းမှာ ချည်နှောင်ထားသည့် သံကြိုးကို သူမသေမီ တဒင်္ဂကလေး ဖြစ်ဖြစ် ဖြေပေးပါ ဟူ၍ပဲ ဖြစ်သည်။
သံကြိုး အတုပ်အနှောင် ကင်းသော ဘဝ၊ တစ်သက်လုံး မျှော်မှန်း တမ်းတခဲ့ရသည့် လွတ်လပ်သော ဘဝကို ယခု နောက်ဆုံးအချိန် ကျမှပင် သူ အမွတ်သိပ်ကြီး မွတ်သိပ် နေမိတော့သည်။ သို့သော် စင်စစ်တော့လည်း နှောင်ကြိုးမဲ့သော ဘဝ၏ အရသာ၊ လွတ်လပ်သော ဘဝ၏ အရသာ ဆိုသည်ကို သူ သေသေချာချာပင် မှန်းဆမိတော့သည် မဟုတ်။
သည်ဘဝမျိုးနှင့် ဝေးနေတာ ကြာခဲ့ပြီ။
တောထဲမှာ ဆွေအုပ်မျိုးအုပ်နှင့် လွတ်လပ်စွာ လှည့်လည်သွားလာ နေထိုင်ခဲ့ရသည့် ဘဝ။ တစ်နေကုန် တစ်နေခန်း စားလိုက် ဝါးလိုက် မြူးထူးးပျော်ပါးလိုက်နှင့် နေထိုင်ခဲ့ရသည့် ဘဝ။ ကိုယ့်ခြေ လေးချောင်းလုံးကို ကိုယ်ပိုင်ပြီး ကိုယ့်ကျော ပေါ်မှာလည်း ဘယ်သူ့ကိုမှ တင်ခေါ်စရာ မလို၊ ဘယ် အလေးအလံတွေ ကိုမှလည်း တွန်းထိုးဆွဲငင် နေစရာ မလိုသည့် ဘဝ။ ယခုတော့ သည်ဘဝသည် သူ မည်မျှပင် တမ်းတသည် ဆိုစေ အာရုံထဲတွင်ကား ဝိုးတဝါးမျှသာ ရှိတော့ပြီ။ သို့သော် နှစ်ပေါင်းများစွာ ကြာပြီဖြစ်သည့် ယနေ့ကာလတိုင် သူ့ခေါင်းထဲတွင် ပြက်ပြက်ထင်ထင် မြင်နေဆဲ အဖြစ်အပျက် တစ်ခုကား ရှိနေသည်။
လွတ်လပ်သော ဘဝ နိဂုံးချုပ်သောနေ့။
ကျွန်ဘဝသို့ ကျရောက်ခဲ့သည့်နေ့။
သူတို့ဆင်အုပ် ကျက်စားရာ အနီးတစ်ဝိုက်မှာ လူသတ္တဝါအချို့ ရောက်ရှိနေတာ သူတို့ သတိပြုမိကြသည်။ တောထဲမှာ ရှိသည့် အခြား သတ္တဝါမျိုးစုံ၏ သဘောကို သူတို့ သိကြသည်။ သို့သော် လူဆိုသော သတ္တဝါ၏ သဘော သဘာဝကိုမူ သူတို့ မသိကြ။ ထိုသူတို့၏ အလေ့အထကို သူတို့ နားမလည်။ မကျွမ်းကျင်။
မကျွမ်းကျင်သည့် အတွက်ကြောင့် သူတို့သည် ထိုလူဆိုသော သတ္တဝါကို သတိထားကြသည်။ ကြောက်ကြသည်။ ရှောင်ကျဉ်ကြသည်။ သို့သော် ထိုသို့ကြောက်ရင်း ရှောင်ကြဉ်ရင်းပင် လူ၏ ထောင်ခြောက်တွင်းသို့ သူတို့ သက်ဆင်းခဲ့ကြခြင်း ဖြစ်ချေသည်။
ထိုနေ့က တောထဲမှာ အဝီစိ ပွက်လေသည်။
ပတ်ပတ်လည် တောတစ်ခွင်လုံးမှာ ကြောက်မက်ဘွယ် ဆူညံသံများ ရုတ်တရက် အဆက်မပြတ် ထွက်ပေါ်သည်။ သည်အသံတွေသည် လူတို့ ဖန်တီးသည့် သေနတ်သံ၊ ဗျောက်အိုးဖောက်သံ၊ တုံးခေါက်သံ၊ သံပုံးတီးသံ၊ အော်သံဟစ်သံများ ဖြစ်ကြောင်း မဲလုံးတို့ မသိနိုင်။ သူတို့ သိသည်မှာ ကြောက်မက်ဘွယ် တစ်ခဲနက် အသံကြီးများ အဆက်မပြတ် ပေါ်ထွက်နေခြင်းသာ ဖြစ်သည်။
သည်အသံဗလံများနှင့် အတူ မီးတောက်မီးလျှံ တွေလည်း အရပ်မျက်နှာ အနှံ့အပြားမှာ ခြောက်ခြားစရာ မြင်တွေ့ကြရသည်။ တုန်လှုပ်ခြောက်ခြား ရသည့် အချိန်အခါမျိုး၌ သူတို့ အားကိုးရာသည် အဘစွယ်စုံကြီး ဖြစ်၏။ အဘစွယ်စုံကြီး ပြေးရာနောက်သို့ သူတို့အားလုံး ထပ်ကြပ်မကွာ လိုက်ကြလေသည်။ သစ်ပင် သစ်ကိုင်းနှင့် ချုံနွယ်ပိတ်ပေါင်း တို့သည် သူတို့ ဆင်အုပ်ကြီး အောက်တွင် ပြားပြားဝပ်၍ ကျန်ရစ်သည်။ တစ်တောလုံးသည်လည်း လူတို့လုပ်သော အသံများထက်ပင် ပို၍ဆူညံ ပို၍ ခြောက်ခြားဖွယ် ကောင်းသည့် ဆင်အုပ်ကြီး၏ ထိတ်လန့်တကြား အော်သံဟစ်သံ ပြေးလွှားသံများကြောင့် ကမ္ဘာပျက်သည့်နှယ် ပွက်ပွက်ညံလျက် ရှိလေသည်။
ကျုံး …
ရှေ့ လည်း မတိုးနိုင်၊ နောက်လည်း မဆုတ်နိုင်သော အနေအထားမျိုး တောထဲမှာ မဲလုံး တစ်ခါမျှ မကြုံစဖူးခဲ့။ ရှိသမျှ အဆီးအတားကို အုပ်စုကြီး၏ အင်အားဖြင့် တရကြမ်း ဖယ်ရှားကာ ကမူးရှူးထိုး ပြေးလွှားခဲ့ရာက ရုတ်တရက် ရှေ့ မတိုးနိုင် နောက်မဆုတ်နိုင် ဘေးဘီပင် မလှည့်နိုင်သည့် ထူးဆန်းသော အကျဉ်းအကျပ် တစ်ခုထဲသို့ လျှပ်တပြက် ရောက်သွားသောအခါ မဲလုံး သွေးပျက်မတတ် ထိတ်လန့် သွားမိသည်။
ကျုံးထဲမှာ ပိတ်မိနေကြပြီ။
ထုံးစံအတိုင်း အဘစွယ်စုံကြီးကို အားကိုတကြီး လိုက်ရှာကြည့်သည်။ အဘစွယ်စုံကြီးသည် နံဘေးနံရံရှိ သစ်လုံးတိုင်ကြီးများကို တအားတိုးဝှေ့ကာ ဖြိုဖျက်နိုင်ရန် ကြိုးပမ်းနေသည်။ သစ်လုံးတိုင်တွေ ယိုင်၍ ယိုင်၍ သွားသည်။ သည်တိုင်တွေ ယိုင်လဲသွားလျှင် သူတို့အားလုံး ထွက်ပြေး လွတ်မြောက် နိုင်ကြမည်။ မဲလုံးတို့ မျှော်လင့်တကြီး ကြည့်နေဆဲ ရုတ်တရက် အလွန်ပြင်းထန် ကျယ်လောင် ပေါက်ကွဲသော အသံကြီး တစ်ခု အနီးကပ် ကြားလိုက်ရသည်။ အဘစွယ်စုံကြီး တုံ့ခနဲ ဖြစ်သွားပြီး တဖြည်းဖြည်း ဖင်ထိုင်ကျသည်။ အဘ၏ နားသယ်စပ်ဆီမှ နီရဲသော သွေးစီးကြောင်း တစ်ခု စီးဆင်းကျ လာသည်။ ထို့နောက် စွယ်စုံကြီး ဘေးတိုက် လဲကျသွားပြီး နာကျင်စွာ ညည်းညူ အော်မြည်သည်။ သို့သော် ခဏမျှသာ ကြာသည်။ အသံတိတ်သွားပြီး ခန္ဓာကိုယ်ကြီးလည်း မလှုပ်မယှက် ငြိမ်သက်သွား လေသည်။
အဘစွယ်စုံကြီး ကျဆုံးသွားခြင်းနှင့် အတူ မဲလုံးတို့ လွတ်လပ်သော ဘဝလည်း နိဂုံးချုပ်ခဲ့ရ လေသည်။
သို့သော် မမှန်းဆနိုင်သောအကြောင်း တစ်ခုခုကြောင့် တစ်နေ့သောအခါ မိမိ အလိုအလျောက် လွတ်မြောက်လေမလား ဟူသော မျှော်လင့်ချက်ကလေး တစ်ခုကမူ သူ့ရင်ထဲတွင် ကိန်းအောင်း၍ နေခဲ့သည်။ စင်စစ် သည်မျှော်လင့်ချက် ကြောင့်ပင် မဲလုံးသည် …
သူ့ခန္ဓာကိုယ် အသွေးအသားထဲ သူ့ဦးနှောက်နှင့် သူ့နှလုံးသားထဲမှ အရိုင်းစိတ်ကို လေ့ကျင့်ခန်း အမျိုးမျိုး သင်တန်း အမျိုးမျိုးဖြင့် ချိုးဖျက်ဖောက်ထုတ်ခဲ့ ကြသည့် ရှည်လျားသော ငရဲခန်းကာလ ကိုကား မဲလုံး ပြန်မတွေးချင်။ သူ့လည်ကုပ်ပေါ် လူတစ်ယောက် ပထမဆုံး ခွစီးခံရသည့် အဖြစ်ကို သတိရလျှင်ပင် သူ မျက်ရည် လည်လာသည်။
တကယ်တော့ မဲလုံးသည် ခွန်အားဗလ ကြီးမားသော်လည်း ဒေါသ အာဃာတ နည်းပါးသူ၊ အစွယ်နှစ်ချောင်း ပြိုင်းပြိုင်း ရှိသော်လည်း တိုက်လို ခိုက်လိုစိတ် ကင်းမဲ့သူ ဖြစ်ခဲ့သည်။ လူသခင်များကို တော်လှန် ဖောက်ဖျက်ကာ ကျွန်ဘဝမှ လွတ်မြောက် ထွက်ပြေးဖို့ မဲလုံး တစ်ခါမျှ မကြိုးစားဘူးခဲ့။ လွတ်မြောက်နိုင်သည် ဟူသော ယုံကြည်ချက်ရော၊ လွတ်မြောက်အောင် ကြိုးပမ်းမည် ဟူသော စိတ်ဓာတ်ပါ သူ့ရင်ထဲမှာ တစ်ကြိမ် တစ်ခါမျှပင် ပီပြင် ထင်ရှားစွာ မဖြစ်ပေါ်ဘူးခဲ့။ သူ့တစ်သက်လုံး လူတို့ ခိုင်းသမျှ စေသမျှကိုသာ ကျေပွန်စွာ ထမ်းဆောင်ကာ သဘောကောင်းသော ဆင်ကြီး ဘဝ၌ ကျိုးနွံစွာ နေထိုင်ခဲ့သည်။ စင်စစ်လည်း အဘစွယ်စုံကြီး ကျဆုံးချိန်တွင် သူ၏ အရိုင်းစိတ်ဓာတ်နှင့် အရိုင်းသတ္တိများ တစ်ဝက်ကုန်ခဲ့၍ လေ့ကျင့် သင်တန်းဆင်း ကာလတွင် လုံးလုံးလျားလျား ကုန်ဆုံး သွားခဲ့သည်ဟု ဆိုရပေမည်။ ထိုကာလမှ စ၍ မဲလုံး ရင်ထဲ၌ အနှောင်အတည်းမှ ကင်းလွတ်လိုသော ဆန္ဒနှင့် အနှောင်အတည်းခံ ဘဝတွင် နေရခြင်း အတွက် ဝမ်းနည်း ကြေကွဲခြင်း ခံစားမှုများမှ တစ်ပါး အခြားမရှိတော့။
သို့သော် မမှန်းဆနိုင်သော အကြောင်း တစ်ခုခုကြောင့် တစ်နေ့သောအခါ မိမိ အလိုအလျောက် လွတ်မြောက်လေမလား ဟူသော မျှော်လင့်ချက်ကလေး တစ်ခုကမူ သူ့ရင်ထဲတွင် ကိန်းအောင်း၍ နေခဲ့သည်။ စင်စစ် သည်မျှော်လင့်ချက် ကြောင့်ပင် မဲလုံးသည် လူတို့လက်တွင် သည်မျှ အသက်ရှည်ရှည် နေနိုင်ခဲ့ခြင်း ဖြစ်သည်။ သူနှင့်အတူ အဖမ်းဆီးခံရသည့် အထဲမှ မဲမကြီး ဆိုလျှင် လေ့ကျင့်သင်တန်းပေး ခံရစ ကာလမှာပင် ရင်ကွဲနာဖြင့် ကွယ်လွန် သွားခဲ့သည်။ တမှိုင်မှိုင် တတွေတွေနှင့် စိတ်ပျက် အားလျော့စွာ အလုပ်လုပ်ရင်း သူ့ထက် စောစီးစွာ သေဆုံးခဲ့ကြသူတွေ ကိုလည်း မဲလုံး မြင်တွေ့ခဲ့ရပြီး ဖြစ်သည်။
အဆိုးဆုံး ကတော့ ဘညို ဖြစ်သည်။ ဘညိုသည် ဆင်သမားတွေ ဝိုင်းဝန်း ရိုက်ပုတ် အော်ဟစ် နေကြသည့်ကြားကပင် ကိုယ့်နှာမောင်းကို ကိုယ်တက်နင်းကာ အဆုံးစီရင် သွားခဲ့သည်။ ဘညို၏ လုပ်ရပ်ကို ချီးမွမ်းရမလား၊ အပြစ်တင်ရမည်လား မဲလုံး မဝေခွဲတတ်။ သို့သော် ဘညို လုပ်သွားပုံကို ပြန်လည် မြင်ယောင်မိတိုင်း အကြီးအကျယ် တုန်လှုပ်ချောက်ချား ရစမြဲ။ သည်မြင်ကွင်းကို ချက်ချင်း ပြန်လည် မေ့ပစ်နိုင်ရန် သူအတင်း ကြိုးစားစမြဲ ဖြစ်သည်။
စင်စစ် မဲလုံး မျှော်လင့် ထားခြင်းသည် လူတို့၏ စိတ်သဘောနှင့် ပတ်သက်၍ အကဲခတ် မှားခြင်းကြောင့်လည်း ဖြစ်သည်။ မဲလုံး၏ စိတ်၌ မိမိသည် လူတို့ ခိုင်းသမျှ စေသမျှကို မညည်းမညူ ဆောင်ရွက်ပေးလျှင် တစ်နေ့သောအခါ မိမိအပေါ် စေတနာ တုံ့ပြန်လိမ့်မည်၊ မဲလုံးကြီး သွားလိုရာ သွားတော့ဟု ကြိုးဖြေပေး လိမ့်မည်ဟူ၍ တစ်ခါတစ်ရံ မျှော်လင့် နေမိသည်။ တစ်ခါတစ်ရံလည်း လူတွေမှာ တစ်နေ့သောအခါ လုပ်စရာ ကိစ္စ ဝိစ္စတွေ ပြီးစီးသွားပြီး သူတို့အရပ်သို့ သူတို့ ပြန်သွားကြကာ မိမိတို့အား မိမိတို့ သဘာဝအတိုင်း တောထဲတွင် လွတ်လွတ်လပ်လပ် နေကြရန် ထားပစ်ခဲ့ကြ လိမ့်မည်ဟုလည်း မရေမရာ မျှော်လင့်နေမိ တတ်သေးသည်။
သို့သော် လူတို့၏ ကိစ္စဝိစ္စများမှာ ပြီးဆုံးသည် ဟူ၍ မရှိခဲ့ချေ။ လူတွေလက်ထဲ ရောက်ရှိပြီး သူတို့ အမိန့်ပေး စကားများကို နားလည်အောင် သင်ကြားပြီးသည့် အချိန်ကစ၍ သစ်လုံးတွေကို ဦးခေါင်းနှင့် တွန်းရွှေ့သည့် အလုပ်၊ သစ်လုံးရှည်ကို ကြိုးနှင့်ဆွဲသည့် အလုပ်များကို သင်ရင်းလုပ် လုပ်ရင်းသင် ရသည်။ အလုပ်သင် ဘဝမှာပဲ နှစ်ပေါင်း အတန်ကြာခဲ့သည်။ စင်စစ် လမ်းမရှိသည့် လျှိုမြောင် ချောက်ကမ်း တောတောင်တန်းများကို ဖြတ်သန်းကာ သစ်လုံးများကို မြစ်ဆိပ်အရောက် သယ်ရဆွဲရသည့် အလုပ်သည် အန္တရာယ် များသလောက် ကျွမ်းကျင်မှုလည်း အထူး လိုအပ်သော အလုပ် ဖြစ်သည်။
မဲလုံးက သဘောကောင်းရုံ ဝီရိယနှင့် ခွန်အားဗလ ရှိရုံသာမက ဥာဏ်ပညာလည်း ထက်မြက်သူ ဖြစ်သည်။ ထို့ကြောင့် သစ်လုပ်ငန်း ပညာကို သူတကာထက် လျင်မြန်စွာ တတ်မြောက်သည်။ အားတက်သရော ကျွမ်းကျွမ်းကျင်ကျင် လုပ်သည်။ မဲလုံးနှင့် လုပ်ရလျှင် အလုပ်တွင်သည်ဟု လူတိုင်းက မှတ်ချက်ချ ကြသည်။
စင်စစ် အသက်နှစ်ဆယ် အရွယ်လောက်မှာပင် မဲလုံးသည် တကယ်ခန့်ညား၍ ဥပဓိရုပ် ကောင်းသော ဆင်ကြီးတစ်ကောင် ဖြစ်ခဲ့သည်။ ဦးခေါင်း ကြီးသည်။ နဖူးပြင် ကျယ်သည်။ နားရွက် ဖားသည်။ မျက်လုံးများ ကြည်လင်၍ တကယ် စိတ်နှလုံးကောင်း ရှိသော အသွင်အပြင်မျိုး ဖြစ်သည်။ ကျောကုန်းက ရှေ့ ပိုင်း ညီညာကာ နောက်သို့ ပြေလျောကျဆင်း သွားသည်။ လည်ပင်းက တိုသော်လည်း ဗြက်ကျယ်သဖြင့် ဆင်ဦးစီးအတွက် အထိုင်ကောင်းသည်။ ထို့ပြင် ရင်အုပ်ကျယ်သည်။ ရှေ့ ခြေနှစ်ချောင်း ကားပြီး မြင့်လည်း မြင့်သည်။ နောက်ခြေနှစ်ချောင်းက တိုတုတ်သလောက် တောင့်တင်းခိုင်မာဟန် ရှိသည်။ ခြုံ၍ ပြောရလျှင် မဲလုံးသည် ဆင်အကြောင်း နားမလည်သူများပင် မြင်ရုံနှင့် နှစ်သက်ကြမည့် ဆင်ခန့် ဆင်လှကြီး တစ်ကောင် ဖြစ်သည်။
သဘောကောင်းသော မဲလုံးကြီးကို ဆင်ဦးစီးများ၊ ဆင်ခေါင်းများ သဘောကျ သကဲ့သို့ ခန့်ညား တည်ကြည်သော ဥပဓိရုပ်နှင့် သူမတူသော လုပ်ရည်ကိုင်ရည် များကြောင့် ဆင်ပိုင်ရှင်များ အတွက်လည်း ဂုဏ်ယူ ဝင့်ကြွားစရာ ဖြစ်ခဲ့သည်။ မက်ဂရီကာ ကုမ္ပဏီမှ ဖာဂူဆင်တို့ စမစ်တို့ ဆိုလျှင် ကုမ္ပဏီ ဌာနချုပ်မှ ဧည့်သည်အသစ် ရောက်တိုင်း မဲလုံးကို တခမ်းတနား ပွဲထုတ်ပြလေ့ ရှိသည်။ သူနှင့်တွဲ၍ ဓာတ်ပုံရိုက် ကြသည်။ သူ့တစ်ကိုယ်တည်း ကိုလည်း ဓာတ်ပုံတွေ ရှုထောင့် အမျိုးမျိုးမှ ရိုက်ကြသည်။ သူ့ကို ကကြိုးတန်ဆာတွေ အမျိုးမျိုး ဆင်ယင်ကာ စီးကြည့်ကြသည်။ သစ်တုံးကြီးများကို တွန်းကြည့်ခိုင်း ဆွဲကြည့်ခိုင်း ကြသည်။ လေးတန်လောက် လေးသော သစ်တုံးကြီးကို မဲလုံး ဆွဲပြသည်ကို ကြည့်ကာ လက်ခုပ်ဩဘာ ပေးကြသည်။ သူ့ကို ရုပ်ရှင်သရုပ်ဆောင် တစ်ယောက်လို တစိမ့်စိမ့် ကြည့်ကာ သူ့အမူအရာ အမျိုးမျိုး၊ သူ့ဟန်ပန် အမျိုးမျိုးကို ရိုက်ကူး မှတ်တမ်းတင် ကြသည်။
တစ်ခါ တစ်ခါတော့လည်း မဲလုံး၏ စိတ်တွင် ဒီလူတွေသည် သူ့ကို တကယ်ပင် ချစ်ခင် တွယ်တာကြ လေသလား၊ တပ်မက်၍များပင် နေလေလားဟု တွေးမိသည်။ သို့သော် ဘယ်လောက်ပင် ချစ်ယောင် ခင်ယောင် ပြုကြသော်လည်း အလုပ်ခိုင်းသည့် နေရာ၌ကား လျော့ပါးသွားသည် ဟူ၍ မရှိခဲ့ချေ။
နှစ်ပေါင်း လေးဆယ်ကျော် ကြာခဲ့သည့် မဲလုံး၏ ကျွန်ဘဝ သက်တမ်းအတွင်း ပိုင်ရှင် အဆက်ဆက် ပြောင်းခဲ့သည်။ ရှမ်းလူမျိုး ဆင်ဖမ်းသမားများထံမှ နေ၍ ဖာဂူဆင်တို့ မက်ဂရီကာ ကုမ္ပဏီသို့ ရောက်သည်။ မက်ဂရီကာမှ တစ်ဆင့် မြန်မာ ဆင်သူဌေး တစ်ဦး လက်သို့ ရောက်သည်။ သူဌေးက ကိုယ်ပိုင် သစ်လုပ်ငန်းတွင် ခိုင်းသည်။ ထို့နောက် အခြား မြန်မာ ဆင်သူဌေး တစ်ဦးထံသို့ ရောင်းချသည်။ ပထမတွင် ကိုယ်ပိုင်အလုပ်။ ထို့နောက်တွင် အစိုးရ သစ်လုပ်ငန်းသို့ ငှားရမ်းသည်။ နောက်ပိုင်း လုပ်အား ကျလာသောအခါ အစိုးရအလုပ်မှ နှုတ်ထွက်ကာ သူဌေးထံမှာ ဘောက်အလုပ်တွေ လုပ်ပြီး နေခဲ့ရသည်မှာ ယခု ကွယ်လွန်ခါနီး အချိန်အထိ။
ယင်းနှစ်ကာလများ အတွင်း သူ့လည်ကုပ်ပေါ် စီးနင်းခဲ့သည့် ဆင်ဦးစီးတွေလည်း မနည်းတော့။ သူ့ကို အလုပ်အတူ လုပ်ဖော် တစ်ယောက်လို ညီနောင်သားချင်း တစ်ယောက်လို ညှာညှာတာတာ ဆက်ဆံဖော်ရသည့် ရွှေထီးတို့ ဖိုးခတို့လို ဦးစီးများနှင့်လည်း ကြုံခဲ့ရဖူးသည်။ ဘမုန်းတို့လို အလကားနေရင်း စိတ်တို နေတတ်သော ဦးစီးများ၊ မညှာမတာ မစာနာတတ်သူများ ထံမှလည်း ဒုက္ခကြီးစွာ ခံခဲ့ရဖူးသည်။
ဘမုန်းအကြောင်း တွေးမိသောအခါ ဘမုန်းကို ချေမှုန်းခဲ့သည့် လရောင်ကြီးကို သတိရသည်။ လရောင်ကြီး ငါးနှစ်အတွင်း ဦးစီးလေးယောက် အပါအဝင် လူကိုးယောက်ကို သုတ်သင်ရှင်းလင်း ပစ်ခဲ့ပြီး နောက်ဆုံး တိုက်ပွဲတွင် သေနတ် ဒဏ်ရာဖြင့် သေဆုံးသွားခဲ့သည်။
လရောင်ကြီး၏ ပြင်းထန်သော စိတ်ဓာတ်မျိုး မဲလုံးတွင် မရှိပါ။ သူ့တစ်သက်လုံး လူကို အန္တရာယ် ဖြစ်အောင် မလုပ်ဘူးခဲ့။ မတော်တဆ အထိတ်တလန့် ဖြစ်စေဖူးတာပင် တစ်ကြိမ် တစ်ခါပဲ ရှိခဲ့ဖူးသည်။ အဲသည်တုန်းက သူ နေမကောင်း။ တစ်ကိုယ်လုံး မအီမသာ နာကျင်ကိုက်ခဲ နေသည်။ သူ နေမကောင်းမှန်း သိသဖြင့် ပိုင်ရှင်တွေက သူ့ကို အလုပ်မခိုင်း။ နေမကောင်း ဖြစ်နေတာ မသိဘဲ အတင်း အလုပ် လုပ်ခိုင်းသည့် အခါမျိုးတွင် သူ့မှာ အလွန်ဒုက္ခ ကြီးမားလှသည်။ ယခု အလုပ်မခိုင်းသည့် အတွက် သူ ကျေးဇူးတင် နေမိသည်။ သစ်ပင်ရိပ်မှာ ရပ်ကာ အဖျားဝေဒနာကို ခံစားရင်း သူ့အတွေးများကို ငယ်စဉ်ဘဝဆီသို့ လွှင့်မျောနေသည်။
မပီသသော ကြည်နူးမှု ပုံရိပ်များ။
သို့သော် ကြည်နူးမှုက တာရှည်မခံ။
ထုံးစံအတိုင်း ကံဆိုးမိုးမှောင် ကျသော ထိုတစ်နေ့ဆီက အိပ်မက်ဆိုးများ သူ့ခေါင်းထဲ တိုးဝင်လာသည်။ သေနတ်သံ၊ ဗျောက်အိုး ပေထုပ်တို့ ပေါက်ကွဲသံ၊ လူတွေ ညာသံပေး အော်ဟစ်သံများ။ ချောက်ချားစဖွယ် တောမီးရောင်များ။ ထို့နောက် အနီးကပ် ပေါက်ကွဲသည့် ဆင်ပစ် သေနတ်သံနှင့်အတူ အဘစွယ်စုံကြီး ညည်းညူ လဲကျသေဆုံး သွားရပုံ။
ရင်တုန် လှိုက်မောစွာ အတိတ် အိပ်မက်ဆိုးကို မြင်မက်နေဆဲ ညာဘက် နံဘေးမှ ထူးခြားသော လှုပ်ရှားမှု တစ်ခုကိုရုတ်တရက် မြင်လိုက်ရပြီး နှာမောင်းနှင့် ဆတ်ကနဲ ယမ်းကာ ကာကွယ် လိုက်မိသည်။ အခြေအနေမှန်ကို သူသတိပြုမိသည့် အချိန်တွင် သူ့အား ဆေးကုရန် လာသော တိရစ္ဆာန်ဆေးကု ဆရာဝန်သည် မြေပေါ်တွင် တလိမ့်ခေါက်ကွေး ဖြစ်သွားရာက လူးလဲထကာ နောက်သို့ လေးငါးလှမ်း ဆုတ်ပြေးသည်ကို မြင်လိုက်ရသည်။
မဲလုံး ရုတ်တရက် ထိတ်လန့်ပြီး လုပ်လိုက်မိခြင်း ဖြစ်ကြောင်း ရိပ်မိသည့် ဆင်သမား တစ်ယောက်က ဆရာဝန်၏ ဆေးထိုးအပ်နှင့် ရွှေကိုင်း မျက်မှန်ကို လိုက်ကောက်နေသည်။ ဘေးလူများ ဝိုင်းရယ်ကြပြီးနောက် ကတုန်ကယင် ဖြစ်နေသော ဆရာဝန်အား ဆေးပုလင်း တစ်လုံးထဲမှ အရည်တစ်ခွက် ငှဲ့တိုက်တာ တွေ့ရသည်။
”မဲလုံးက ဒေါသ မကြီးတတ် ပါဘူးဗျာ၊ မတော်တဆ ဖြစ်သွားတာပါ” ဟု သူ့အား မဲလုံးကိုယ်စား တောင်းပန်ကြလိမ့်မည် ထင်သည်။
ခြေလေးချောင်းလုံး ခွေကာ မြေမှာ ဝပ်စင်းလျက် ရှိသည့် မဲလုံး၏ အနီးတွင် လူတွေ တဖြည်းဖြည်း များလာသည်။ ဒီလူတွေ၏ မျက်နှာတွေသည် မကောင်းကြ။ အထူးသဖြင့် ပိုင်ရှင်၏ မျက်နှာသည် မကောင်း။ သူ့အလုပ်ကို နှစ်ရှည်လများ လုပ်ကိုင် ပေးခဲ့သည့် မဲလုံးကြီးအတွက် စိတ်မကောင်းခြင်း ကြီးစွာ ဖြစ်နေဟန် တူသည်ဟု မဲလုံး တွေးမိသည်။
ကျွန်တော့်အတွက် စိတ်မကောင်း မဖြစ်ပါနဲ့တော့၊ ကျွန်တော့်ကို ချစ်ရင် သံကြိုးကလေးသာ ခဏဖြေ ပေးပါ၊ တောထဲ တောင်ထဲမှာလည်း ပြေးလွှားခုန်ပေါက် မနေနိုင်တော့ပါဘူး၊ သံကြိုး မပါတဲ့ ခြေနဲ့ တစ်လှမ်း နှစ်လှမ်းလောက် လှမ်းလိုက် ရရင်ပဲ ကျွန်တော် သေပျော်ပါပြီဟု သူ့စိတ်ထဲ ပြောနေမိသည်။
လူတွေဟာ ငါ့မျက်နှာကိုချည်း ကြည့်နေကြတာပဲ။ ခြေထောက်တွေကို ဘာလို့ မကြည့်ကြတာလဲ။ ခြေထောက်တွေကို ကြည့်မိရင် သံကြိုးတွေ မြင်သွားပြီး ဖြေပေးဖို့ စိတ်ကူးရချင် ရကြမှာဟု သူမျှော်လင့် နေမိသည်။ သူတစ်ခါမျှ မမြင်ဘူးသော လူတစ်ယောက် ပိုင်ရှင်နှင့်အတူ သူ့ဦးခေါင်းနား ချဉ်းကပ်လာသည်။ ပိုင်ရှင်နှင့်အတူ သူ့ဦးခေါင်းကို ပွတ်သပ်သည်။ သူ ဝမ်းနည်းသွားသည်။
သူ့အပေါ် ကြင်နာရှာသည်ပဲ။
ခိုင်းစေလွန်းသည့် အခါများတွင် တစ်ခါတစ်ရံ ငြူစူခဲ့ဖူးသည့် အတွက်ပင် သူ အားနာ သွားမိသည်။ လူစိမ်းက သူ့မျက်နှာကို တစ်ချက်မျှ ကြည့်လိုက်ပြီးနောက် သူ့အစွယ်ကို ပွတ်သပ်ကြည့်သည်။ အရှည်အလျားကြီး မဟုတ်သော်လည်း ညီညာ ဖြောင့်စင်း၍ အလွန် လှပသည့် စွယ်ငှက်ပျောဖူး နှစ်ချောင်း။ အစွယ်နှစ်ချောင်းကို ပွတ်သပ်နေရာက အစွယ်ရင်းရှိ အသားပျော့ထဲသို့ ထိုးကြည့် ဖိကြည့်သည်။
ရုတ်တရက် မဲလုံးသိလိုက်သည်။ ငါသေလျှင် ငါ့အစွယ်ကို ယူကြမည်ပဲ။ ငါသေလျှင် ဖြတ်ရောင်းမည့် အစွယ်ကို ငါမသေသေးခင်မှာပင် အားမနာ ပါးမနာ တိုင်းတာ ကြည့်ရှု နေကြသည်ပဲ။
သေသည့်နောက်မှာ ယူကြ ငင်ကြပါ။ အစွယ်သာမက အရိုးရော အသားပါ သူတို့ကြိုက်ရာ စီရင်ကြပါ။ မသေခင်လည်း ခိုင်းစေခဲ့ပြီးပြီ။ သေသည့် နောက်တွင်လည်း ကျန်သမျှကို ယူကြ ငင်ကြဦးမည်။ ယူကြပါ။ သူတို့အတွက် လုပ်ကြပါ။ သို့သော် ငါ့ကို သံကြိုး ဖြေပေးဖို့ကလေး လောက်ကိုပင် သူတို့ လုပ်မပေးနိုင် ကြပြီလား။
တစ်သက်လုံးမှာ ငါ အတောင့်တဆုံး၊ အငတ်မွတ်ဆုံး ဖြစ်ခဲ့သည့် ဒီဟာလေး တစ်ခုကို ငါ သေခါနီး အချိန်လေးမှာပင် သူတို့ လုပ်ပေးရကောင်းမှန်း မသိကြပြီလား။ ဒီလူတွေ ကျေးဇူးကန်းလွန်းလှသည် တကား။
မဲလုံး ဒေါသ မထွက်စဘူး အကြီးအကျယ် ထွက်သွားသည်။ လရောင်ကြီးတို့ ဘညိုတို့ကို သူ မြင်ယောင်သည်။ ရုတ်တရက် ကုန်းရုန်းထဖို့ သူ ကြိုးစားသည်။ မရ။ သူ့ခြေထောက်များမှာ အားမရှိတော့သလို ဖြစ်နေသည်။ မဲလုံး မလျှော့။ တအား အော်ဟစ်ကာ ရှိသမျှအားကို ညှစ်ထုတ်သည်။ မဲလုံး ခန္ဓာကိုယ်ကြီး တဖြည်းဖြည်း ကြွတက်လာသည်။ ခြေလေးချောင်းက တဖြည်းဖြည်း မတ်လာသည်။ လူတွေ ရုတ်တရက် နောက်ဆုတ် သွားကြသည်။ အားလုံး အံ့အားသင့် နေကြသည်။
တစ်သက်လုံး သဘောကောင်းပုံ ရခဲ့သော မဲလုံး၏ မျက်နှာနှင့် မျက်လုံးတွင် ကြီးမားသော ဒေါသနှင့် အာဃာတကို သူတို့ မြင်တွေ့ နေကြရသည်။ လူတွေ နောက်ဘက် ထပ်ဆုတ် သွားကြသည်။ မဲလုံး ခြေလေးချောင်း ပေါ်တွင် မတ်မတ်ရပ်ကာ စူးစူးစိုက်စိုက်ကြီး ကြည့်နေသည်။ သူ့ခန္ဓာကိုယ်ကြီးကို အားစိုက်ပြီး တောင့်ထားသည်။ ရှေ့သို့တိုးဖို့ သူ မကြိုးစား။ ကြိုးစားလျှင်လည်း မရနိုင်မှန်း သူ သိနေသည်။
နေရာမှာပင် တောင့်မတ်ကာ ခပ်လှမ်းလှမ်းမှ ရပ်ကြည့်နေသည့် လူစုကို အပြင်းထန်ဆုံး ဒေါသဖြင့် စိုက်ကြည့်နေရင်း တဖြည်းဖြည်း ယိုင်လာသည်။ ခြေထောက်များကလည်း ခွေညွတ်ကျ လာသည်။ တောင့်ထား၍ မရတော့။
ဘေးဘက်သို့ ယိုင်သွားသည်။
မဲလုံး အသံအကျယ်ကြီး တစ်ချက် ကြွေးကြော် အော်ဟစ်ပြီးနောက် ဗုန်းကနဲ လဲကျသည်။ ထို့နောက် ချက်ချင်းဆိုသလိုပင် ငြိမ်သက် သွားလေသည်။
မဲလုံး သေဆုံးပြီးသည့် နောက်တွင် သူ့ခြေထောက်မှ သံကြိုးကို ဖြုတ်ကြသည်။ မဲလုံးကား သံကြိုး အတုပ်အနှောင် ကင်းမဲ့သော ဘဝကို ခံစားနိုင်ခြင်း မရှိတော့။
သို့သော် မည်သည့် ဆင်ပိုင်ရှင် ဆင်ဦးစီးမျှလည်း သူ့အား နှိပ်စက်ခိုင်းစေခြင်း မပြုနိုင်ကြတော့။