Hikayat Ibrahim Hasan "Watee Sikula"
Ibrahim Hasan
- Tatoep tupong gulong keu timphan
Bak siuroe po muda seudang
IbrahimHasan jak sikula
- Geujak keudroe hansoe bri jalan
Meunan cit dilee watee beut Qur'an
Ibrahim Hasan keudroe geu tuka
- Oehka seulusoe geujak pasoe nan
Ramee nyang ikot dilikot gobnyan
Nyang sabe rakan tamong sikula
- Woe bak sikula teuma oh malam
Sikula rakyat meuhat watee nyan
Jameun Jeupang gohlom merdeka
- Sinan di Gigieng lhe thon timang
Pinah u Tijue laju watee nyan
Ibrahim Hasan hana le ngon ma
- Watee sikula teuma masanyan
Bak kongsi abi nan toke sawang
Uroe ngon malam sabee geujaga
- Di toke sawang na aneuk agam
Asai ka beungoh beudoh awaknyan
Jak taloe jalan meugandang dua
- Beungoeh beurangkat neuhat awaknyan
Keudeh u Sigli gari geu peutran
Ngoen Usman Sawang ileumee jak mita
- Woe bak sikula poe muda seudang
Lhe thon di Tijue laju oh lheuh nyan
IbrahimHasan gisa lom bak ma
- Nanggroe Sigli hai akhi karu hana ban
Bandun sikula hana nyang jalan
Ibrahim Hasan riwang gampong ma
- Di Gigieng lansong geu sambong rijang
Oh akhe thon langsong ujian
Ibrahim Hasan tamat sikula
- Keupala sikula teuma Guru Hasan
Ibrahim Hasan watee ujian
Kareuna got tulesan luloh sigra
- Sikula rakyat tamat watee nyan
Tamong SMP kande jeunulang
Tapi watee nyan bangku tanlena
- Bak Muhammadiyah bagah catat nan
Seubab bak neugri ka jibri peusan
Ibrahim Hasan tamong sikula
- Yoeh di Langsa teuma watee nyan
Sajan ngon abi domisili sinan
Bak masanyan jeut toke ija
- SMP Langsa teuma masa nyan
Saboh di Langsa nyang na lagee nyan
Saboh treuk meunan di Kuta raja
- Aneuk peujabat intat dum keunan
Meunan cit guru meujampu sinan
Batak Padang ngon ureung Jawa
- Masa sikula Ibrahi Hasan
Abdullah Ali, Ibrahim Alfian
Meusapat sinan saboh sikula
- Oeh akhe masa teuma awak nyan
Bandum hebat nyang tamat sinan
Meuteumee jabatan nibak neugara
- Jeut keu Profesor bandum awak nyan
Sayang bacut Ibrahim Hasan
Nibak watee nyan lalo leupahna
- Tuwoe sikula teuma di gobnyan
Di gobnyan lalo uroe ngon malam
Bak weng kilang Toke Hasan Langsa
- Laloe cop bajee teuntee di gobnya
Untong bak guru jibri su reujang
Jiba laporan ubak ayahda
- Laju di ayah ubah pikeran
Bah kheuh lon ba u kota Medan
Mangat siagam bekle lam manja
- Putoeh pakat beurangkat reujang
Thon limong sa bungka u Medan
Tamoeng yohnyan SMP Kesatria
- Kareuna carong Ibrahim Hasan
Tamat SMP tanlee pikeran
Tamong reujang ubak SMA
- Bagian sosial geucok jurusan
Sikula kristen beuken hana ban
Dum peulajaran got that dijaga
- Rame guru nyang koen Iseulam
Ureueng Batak cangklak hana ban
Nyo hana seunang laju jitampa
- Baroe teu ingat meuhat wateenyan
Watee insaf lam hatee badan
Teuntang Iseulam agama beuna
- Nyang ke meureunoe baro yoh silam
Keu asoe kitab teuingat reujang
Hukom Iseulam haleu ngon hana
- Seubab lam hatee teu patre iman
Bah that sahabat hana Iseulam
Ibrahim Hasan gangguan hana
- Oeh troh kutika masa ujian
Tuleh Bismillah bagah watee nyan
Bak keureutah ujian barangjan masa
- Guru kaloen pakon lagee nyan
Meunan sabe tiep uroe Tuhan
Keureutah ujian Bismillah kana
- Lam hate guru laju watee nyan
Beureukat Bismillah mudah peulajaran
Angka lapan ka jri jeumba
- Masa sikula di kota Medan
Seubab bak ayah sosah bantuan
Nanggroe teungoh prang hubungan hana
- Thoen limong sa kon ka tatuban
Thon limong lhee meuteuntee saban
Ibrahim Hasan sosah lagoina
- Peutron boh tektok cok keusimpulan
Peunyambong udep lam kota Medan
Bek keulaparan teungoh sikula
- Jeut tukang masak sinyak masanya
Oeh ban beudoh eh keudeh u peukan
Jak bloe barang sigala rupa
- Oeh lheuh meubloe puwoe le reujang
Oh lheuh maguen po buleun trang
Ngui pakaian jak bak sikula
- Sikula inggreh meuceh watee nyan
Meunan sabee kande jeunulang
Sunggoeh hana ban bak jak sikula
- Lawet sikula di Kota Medan
Watee supot ikot ngon rakan
U lapangan jam meuen bola
- Oeh watee woe manoe reujang
Hana tempo meureunoe hat nyan
Sigala bidang geu beulaja
- Watee di Langsa jahet pakaian
Jeut bacut sapeu Ibrahim Hasan
Peu lom hai rakan bidang agama
- Thoen limong limong si bungong peukan
Bah sosah payah bak geucah jalan
Lhee thon timang luloh SMA
- Luloeh sikula angka that maayang
Tamat sikula di kota Medan
Peugot rancangan laen keunira
- Kareuna carong Ibrahim Hasan
Jok bea siswa meuseunoh hat nyan
Teutapi gob nyan teutap geusaba
- Soe manyang angka teuma wateenyan
Watee ka tamat carat jih riwang
Sinan di Medan jibri keurija
- Teuma nyang laen jitem cit meunan
Hana meusaboh peu punoh harapan
Seubab yah gobnyan pih ureueng kaya
- Gohlom peureulee lakee bantuan
Watee ka luloh troh ayah keunan
Ibrahim Hasan ka geu pareksa
- Jinoe gata hai muda seudang
Peuna reuncana nyang ka ta pasang
Cuba ta peutrang ubak ayahda
- Bak lon hai ayah sosah bacut tan
Ho nyang galak yujak lon tuan
Ngon hatee seunang ulon keureuja
- Meutuwah raya gata hai intan
Bek sagai aneuk peuseuk wasit nang
Desya bak Tuhan dudoe geu siksa
- Teuma ayah bagah geu peusan
Jurusan ekonomi bak UI sinan
Bek peutamong nan keudeh bak GAMA
- Ikot Pak Mitro jinoe hai agam
Bhah ekonomi ahli that gobnyan
Gata pih meunan oh dudoe teuma
- Putoeh pakat leugat masa nyan
Beudoh lanja po muda seudang
U Beulawan beurangkat sigra
- Geu intat le yah bagah wateenyan
Hai boh hatee pike beu matang
Hai aneuk badan ingat lam dada
- Ta keubah kamoe sinoe hai intan
Gata beurangkat seulamat jalan
Beutroeh tariwang ohka seumporna
- Doa bak kamoe uroe ngon malam
Beulheuh sikula teuma hai agam
Dalam ujian beumayang angka
- Nyang peureule that ingat keu Tuhan
Pubut ibadat tobat barangjan
Beu teugoh iman di dalam dada
- Bek beurangkahoe duduoe meulang - lang
Seubab agama kana lam badan
Asoe Al Qur'an kalheuh beulaja
- Bidang sikula buka pikeran
Jaga marwah ayah deungon nang
Wate ta riwang beujeut sarjana
- Habeh peutuwah bak yah masanyan
Peulheuh rindu laju wateenyan
Di Beulawan bineh dermaga
- Lheuh mumat jaroe sigoe ngon rakan
De Ereen geukheun kapai nyan
Ibrahim Hasan ka jadeh bungka
- Kapai dijak meugrak geulumbang
Jipeutroen saoh piyoh disinan
Ladoem peunumpang jitron u kuta
- Leumah peuraho meu ato panyang
Keunan meuhudom bak ujong buritan
Inong ngon agam bloe barang lua
- Oeh lheuh pasoe ie keulasi kheun ban
Katroh watee teuntee masanyan
Kapai le reujang beurangkat teuma
- Nyang muda - muda dumna peunumpang
Na padum uroe dudoe hai rakan
Katroeh le yoh nyan laju u jawa
- Teungoh u darat laju laugat wateenyan
Teubit u lua jak mita kandran
Teupat tujuan katroh le jiba
- Kana teumpat meuhat nyang aman
Padum uroe tempo lheuh nyan
Tamong le reujang ubak sikula
- Tamoeng bak UI Ekonomi jurusan
Sikula UI cit gob turi nan
Kon seumbarangan keunan jiteuka
- Nyoe hana carong ngon kong bantuan
Nyan kheuh sikula nama pilihan
Meugah hana ban di Indonesia
- Aneuk ureueng gab ji intat keunan
Ayah deungon ma nyang na jabatan
Nyoe ureueng awam hana peu cuba
- Teusebut haba teuma hai rakan
Tamoeng sikula hana le reunggang
Oeh lheuh Mapram laju beulaja
- Hana le lalee lagee sabohnyan
Gobnyan laloe jinoe meu ulang
Bandum peulajaran wajeb geubaca
- Seubab akhe thon langsong ujian
Akhe tingkat sa nyata disinan
Ibrahim Hasan han taloe angka
- Ji peuek tingkat leugat masanyan
Sabe rata thon langsong lagee nyan
Lam peundidikan tinggai hantom na
- Ingat peutuwah ayah saboh jan
Seubab peureulee ileumee Tuhan
Uleh seubab nyan sunggoh beulaja
Oleh : Nurman Syamhas
Posted from my blog with SteemPress : https://almahdimahdi95.000webhostapp.com/2018/10/hikayat-ibrahim-hasan-watee-sikula