Hikayat Ibrahim Hasan "Lahe Ibrahim Hasan"
Image source
Deungon Bismillah lon kisah karang
Lakee bak Tuhan beu ek samporeuna
Haba lon tuleh ngondaweut itam
Baca hai rakan tuha ngon muda
Yoh mantong Aceh dalam jajahan
Goh tamoeng Jeupang jameun Beulanda
Watee A Ph van Aken mat pimpinan
Bak jameun nyan ulon calitra
Rata jeut sagoe nanggroe teungoeh prang
Inong ngon agam lawan Beulanda
Aceh Barat ngon Aceh Seulatan
Ban saboh nyan prang geupuga
Nanggroe Pidie pih lagee nyan
Uroe ngon malam peucrok Beulanda
Ladom ngon reuncong langsong geu tikam
Ladom ngon parang geutak bak muka
Watee nyan Aceh jadeh meuguncang
Ban saboh nyan geupoh Beulanda
Dalam seujarah geu peugah meunan
Aceh dalam prang si umu masa
Teuseubut haba teuma hai rakan
Yoh jameun nyan bak saboh desa
Kabupaten Pidie geurasi nan
Lam Kecamatan Simpang Tiga
Desa Lampoh Weng canden jeunulang
Deungo hai rakan ulon calitra
Saboh keluarga nama teu pandang
Dalam gampong nyan hudep bahgia
Keuluarga teungku meusyeuhu han ban
Tarikat keunan dum aneuk muda
Tuntut eleumee teuntee di sinan
Inong ngon agam jak beut agama
Dum ureung gampong meuhudom keunan
Oh watee malam jak beut agama
Nyang jak u laot pih ikot sajan
Ureung jak ublang pih keunan teuka
Nyang uglee bek lee ta payang
Ban woe di ladang jak beut agama
Hantom na pre cit sabee meunan
Lampoh Weng nyan ramee lagoina
Thon lhee ploh limong teuma wateenyan
Deungo hai rakan sambongan haba
Lam keuluarga Ulama teuma hai rakan
Timoh karangan di sinan punca
Hajjah Ainombi nyakti jeunulang
Judo Toke Hasan ulon calitra
Teungoh meugandong nibak wateenyan
Katroh beuleun nam dalam keunira
Bak beuleuntujoh jibloh hitongan
Nibak watee nyan makanan gob ba
Dumna wareh habeh troh keunan
Jak me makanan meunurot kada
Habeh tujoh troh beuleun lapan
Hana rintanggan Allah karonya
Sampoe beuleun sikureung timang
Judo Toke Hasan lahe aneukda
Bak beuleun lhee watee that reumbang
Kagrak bak Tuhan Nyang Maha Esa
Tanggai nam blah geupeugah meunan
Ibrahim Hasan geupandang donya
Uroe Sabto lahee Ibrahim Hasan
Hate that seunang ayah deungon ma
Bandun syedara nyang watee nyan
Jiteuka keunan jak kalon rupa
Hate geumbira hana pat lawan
Geungieng si agam lagee Hindia
Idong pih mancong ok patah manyang
Bah that beu itam mameh that rupa
Yoh masa lahe Ibrahim Hasan
Abdurrahman pih sigo nyata
Lam saboh rumoh dua boh ponang
Lahe si agam sigo bandua
Uroe nyang sama teuka awaknya
Watee geuboh nan pih rab sirupa
Sidroe geu meuhoe Abdurrahman
Ibrahim Hasan nyang keudua
Geubon nan Rahim deungon Rahman
Gaseh ngon sayang hareuto makna
Cut ka adat meuhat yoh silam
Watee geuboh nan brat keu agama
Geutueng beureukat bak sifeut Tuhan
Nyang that Rahman Rahim lom teuma
Peut ploh peut uroe sampoe bilangan
Judo Toke Hasan manoe meu upa
Manoe wajeb hukom Iseulam
Lheuh persalinan dum kawon hawa
Phon di ulee geuplee ie yoh nyan
Basah badan bulut anggota
Oh lheuh manoe sambinoe intan
Neu ek reujang laju u tangga
Salen ija sigra masa nyan
Boh bak badan ngon minyeuk ata
Sugot deungon ok tarek ngon andam
Beudak lee reujang boh bak muka
Oh ka hasee dum seukalian
Aneuk agam bri mom sigra
Geubri susu laju lee rijang
Peu eh yoh nyan lam ayon ija
Boh lam ayon panton geu deundang
Mangat siagam beu jipet mata
Leupah that susah ayah deungon nang
Seubab si agam jimoe meukuwa
Sabe lam jimoe uroe ngon malam
Ibrahim Hasan lalee hantom na
Sibok syehdara bak geupeutimang
Ibrahim Hasan lam moe meu 'a 'a
Hana piyoh uroe ngon malam
Sosah that ponang bak geupeulara
Kheun ulama teuma masa nyan
Geubi ramalan meunurot tanda
Watee rayeuk teuma si agam
Na umu panyang ceudah lagoina
Oh ka dewasa teuma komdian
Jeut keu pimpinan ato neugara
Meunurot dali meuri tan pandang
Uroe ngon malam cabak leupah na
Meunan kheuh dilee teuntee ramalan
Watee geupandang manyak lam tika
Peu kheuh teujadi atawa cit han
Sidroe Tuhan nyang thee sibeuna
Siboh that poma hana pat lawan
Seubab si agam cengeng leupah na
Lahna syeedara dilingka badan
Nyang peutimang sibijeh mata
Mak Habibah nyang leupah seunang
Uroe ngon malam geutem meujaga
Adek kandong Poma siagam
Bak watee nyan aneuk golom na
Seunang leupah that meuhat di gobnyan
Ibrahim Hasan sabee geu doda
Peu eh lam ayon panton geu deundang
Mangat si agam beu jipet mata
Allah hai do jak u doda idang
Ateuh rangkang blang geu laya tika
Reujang rayeuk aneuk agam
Jak bantu prang bela bangsa
Jak lon dodo doda idang
Bungong keumang lam istana
Reujang rayeuk boh hatee nang
Ta tron u balng jak seumula
Cicem pala dua sikawan
Cicem subang dalam cintra
Watee rayeuk na umu panyang
Ta beut Qur'an bak kubu poma
Jak lon timang lon timang mang
Bungong peukan sitangke dua
Oh rayeuk gata hai aneuk agam
Rata bidang tajak sikula
Seulawah inong seulawah agam
Oh watee malam kayen na rusa
Meunyo na umu neubri le Tuhan
Hai aneuk agam beujeut keu raja
Meunan sabe hana pre malam
Lam geu dodang beungoh sinja
Meu tuka - tuka ayon siagam
Hana reunggang bansun syeedara
Citnyan saboh aneuk agam
Lam lingkungan teungku ulama
Bandum murid nyang beut sinan
Tingkui siagam meu tuka - tuka
Padum na trep teuma teuma lheunyan
Rayeuk rijang bijeh mata
Kajeut jijak keudeh ublang
Bak lapangan meuen bola
Meuen gaseng ngon sabe rakan
Meuen geulayang meuen panta
Hana istirahat ba that barangjan
Baro na reunggang oh teugeut mata
Umu tujoh thon digampong sinan
Uroe ngon malam jak meudiwana
Laloe ngon sahbat meuhat masanyan
Ibrahim Hasan leupah bahgia
Meujan u laot jak pot geulumbang
Meukawan - kawan ta kalon rupa
Meujan drop udeung lam kareung tajan
Meujan lam kulam geujak drop kadra
Meujan dalam glee ngon sabe rakan
Teungeut bak rangkang sampoe an paja
Meujan ka gadoh samat teungoh blang
Oh watee malam baro deuh mata
Sabe tiep uroe laloe lagee nyan
Neu preeh dang - dang jak sikula
Gisa u rumoh peunoh lam idang
Jeuneh makanan sigala rupa
Kareuna wareh gaseh keu gobnyan
Seubab nyang amam sidroe geuh nyang na
Wareh keurabeut got that jisayang
Jibri makanan meubagoe rupa
Hana istilah sosah makanan
Breueh meugantang padee meugunca
Rumoh ulama kon ka neu tuban
Han tom reunggang seudeukah gob ba
Ureueng meugoe barangsoe saban
Pade dalam blang milek Rabbana
Meuyo get timoh peunoh rata blang
Tanda bak Tuhan geu kaboi doa
Nyang yue meudoa ulama sinan
Oleh seubabnyan geu balah guna
Zakeut geuboh oh troh hitongan
Meunan geu peusan uleh ulama
Ureueng meulaot geu ikot sajan
Peu nyang geu peusan oleh ulama
Uroe Jeumeuat leupah that pantang
Bandum neulayan hana keurija
Ureueng meutani barang ri saban
Bah that diblang bah that lam rimba
Bandum jitiree nyang guree peusan
Hansoe jeut teuntang takot meureuka
Seubab ka jithee ileumee manyang
Hadih fireuman cukop lam dada
Tuhan sidroe nyang poe alam
Hana soe tuban dumna rahsia
Nyang ne tupeu cit teungku inan
Rahsia alam rugoe ngon laba
Ureueng Lampoh Weang paleng panutan
Peu nyang geularang han jikeurija
Habeh uroe meugantoe malam
Aceh lam prang gohlom reuda
Oh ka rayeuk Ibrahi Hasan
Meureunoe yoh nyan bideung agama
Sinan bak nektu teungku analan
Geubeut Al Qur'an Bak phon aleh ba
Meureunoe doa cara seumbahyang
Hukom Iseulam dum geu aja
Tamat aleh ba teuma masa nyan
Fatihah reujang lagu geu aja
Tamat juz Amma teuma watee nyan
Ibrahim Hasan beut Qur'an raya
Oh ka tamat geubeut Al Qur'an
Kitab reujang laju geu baca
Masailai lanja le khatam
Kitab lapan laju geu aja.
Karangan : Nurman Syamhas
Posted from my blog with SteemPress : https://almahdimahdi95.000webhostapp.com/2018/10/hikayat-ibrahim-hasan-lahe-ibrahim-hasan
@yayan, I gave you a vote!
If you follow me, I will also follow you in return!
Thanks @introduce.bot