Hikayat Ibrahim Hasan " Jeut Keu Rektor Unsyiah"

Hanyoet u pasi bak kayee rimba
Ibrahim Hasan memeng gob turi
Disiplin tinggi dalam sikula

Disampeng dekan masa nyan jibri
Uleh meuntri lom geu peucaya
Pembantu Rektor perguruan tinggi
Di University Syiah Kuala

Syarief Tayeb lisek han sakri
geusuek keu meuntri di bidang PK
Geugieng Ibrahim bak meumimpin ahli
Jabatan geubri meuganda - ganda

Pinah pak Madjid orbit keu deputy
Jabatan geubri keu gob nyan teuma
Jeut keu rektor perguruan tinggi
Universitas Negeri Aceh mulia

Thoen tujoeh ploeh lhee teuntee mulai
Duek bak kurusi ato sikula
Watee di angkat meuhat le meuntri
Doktor ekonomi gob nyan golom na
Drs MBA nyang na lam jari
Tapi le meuntri jiboeh keupala
Rame masa nyan keunan beureuhi
Tapi le meuntri han geu peucaya

Lheuh jeut keu rektor doktor geu cari
Keudeh bak UI peutamoeng nama
Watee kuliah sosah han sakri
Roeh ula ili Jawa ngoen Banda

Meujan geu bungka uluwa neugri
Bak University di Philipina'
Seutoet pebimbing iring tiep hari
Meujan geu ili u Amerika

Keubah jabatan di perguruan tinggi
Tinggai kurusi bak Syiah Kuala
Geu keubah inoeng ngoen jantoeng hati
Putra ngoen putri tinggai di Banda

Aneuk peurumoeh timoeh seundiri
Nyang na peuduli cuma Cut Apa
Gubernur Aceh leubeh jeut seugi
Bantuan geubri ngoen jak sikula

Gob nyan geujak woe Banda ngoen Betawi
Aneuk ngoen istri jioh di mata
Adak beurangsoe meunoe teujadi
Malam ngoen hari susah lam dada

Bak mita pangkat ngat kubai diri
Dokto ekonomi beu ek sampoerna
Limoeng thoen tempo deudoe terbukti
Dokto ekonomi ijazah kana

Dokto MBA kana lam jari
Jurusan ekonomi geurasi nama
Ngoen susah payah ijazah geu cari
Hana padoli soai biaya

Oeh ka seulusoe dokto ekonomi
Ato strategi dalam sikula
Lagee atoran meunan geu jalani
Disiplin tinggi wajeb ta jaga

Dalam sikula koen ka ta tukri
Rame nyang anti nyoe meunan cara
Ibrahim Hasan han geupadoli
Lagee kheun meutri laju keurija

Ateuh pucok u meusu keudidi
Cempala paki di dalam cintra
Watee Ibrahim pimpin university
Leuh teurjadi luar biasa

Miseu contoh rampoe ta rawi
Hat nyan teurjadi Aceh Merdeka
Ka ji beurontak dum awak Pidie
Meungaku diri golim merdeka

Mantoeng di jajah le peumerintah RI
Meunan jikheun kri ta deungoe haba
Nanggroe Aceh meukleh seundiri
Deungoen RI hubongan hana

Boeh timoen phang di dalam guni
Pasoe boeh giri u dalam raga
Thoen tujoeh ploeh but nyan teujadi
Nyang mat keumudi mantoeng Cut Apa

Ibrahim Hasan di perguruan tinggi
Nyang keumudi bak Syiah Kuala
Hat nyan keuh watee teuntee teujadi
Neugara RI bacut meugumpa

Padum boeh ulee deungoe han sakri
Meungaku diri Aceh merdeka
But Hasan Tiro sidroe keurani
Hana soe turi pakiban rupa

Di Amerika berdomisili
Peugoet provokasi hana toem reuda
Diyue meupake ngoen sabe wali
Yue pisah diri dari Indonesia

Rata jeut sagoe nanggroe ka a i
Rate jeut seugi ka siboek teuntra
Ka dipeureksa hana beureunti
Asai na bukti ka jidroep sigra

Habeh ditijik keuchik ngoen waki
han ji peudoli tuha ngoen muda
Asai nyang salah bagah di gari
Baroe ji sudi oeh lam peunjara

Di Darussalam watee nyan akhi
Ji tamoeng ABRI droep mahasiswa
Untong na rektor keudroe padoli
han geubi gari duem mahasiswa

Rektor Unsyiah gagah beurani
Peugoet kompromi laju ngoen teuntra
Ibrahim Hasan yoeh nyan geu kheun kri
Wahe pak ABRI sayang keu bangsa

Lom bak panglima sigra peugah kri
Bek neu padoli buet mahasiswa
Teungoeh meureunoe sinoe tiep hari
Keu beukai diri oeh watee tuha

Pajan di pike peureulee neugri
Malam ngoen hari siboek beulaja
Meunan cara haba geu khuen kri
Komandan ABRI han ji peucaya

RA Saleh beungeh han sakri
Panglima ABRI hatnyan di Banda
Laju diyue ba bah hana bukti
Han ji peuduli nyan kheun keupala

Rektor Unsyiah bagah jok kawi
Yue jak kompromi deungon Panglima
Zainuddin Hamid keubit beurani
Laju peureugi ngon Di Murtala

Keudeh keunoe geu muproe cakri
Peulhueh keula I dum mahasiswa
Bah that ka meunan aman goh jadi
Mantong di cari sigala daya

Ka ji peusapat dum alat bukti
Rektor jikheun ikot membela
Ibrahim Hasan memang ogahri
Dum barang bukti geu lakee sigra

Peusapat bahan yoeh nyan peureugi
Meunghadap meuntri sideh di Jawa
Pak Syarief Thayeb geu lirek bukti
Han jeut keu dali dalam peukara

Geucoek keureutah ramahn ngoen jari
Pasoe lam guni yue toet uluwa
Ibrahim Hasan riwang keulai
Urusan meuntri mandum peukara

Syarief Thayeb geutarek laci
Isyarat geubi bak Pak Bus teuma
Keudeh bak Pak Bus laju peugah kri
Pakoen teujadi lagei nyan rupa

Pakoen rakyat ikat ngoen tali
Pakoen han jibri tamoeng sikula
Pakriban jalan nyang goet ta cari
Panglima ABRI bekle buet nyang ka

Bustanil Arifin yakin lam hati
Laju neu ili ubak sikula
Ubak Istana laju peureugi
Geujak peugah kri dumna peukara

Bapak Soeharto sidroe nyang ahli
Dalam strategi di Indonesia
Supaya nanggroe bek sampoe rugi
Laju yue ungdi bapak Panglima

RA Saleh jadeh di ganti
Teuka nyang ahli laen Panglima
Gantoe Panglima teuma Rivai
Aceh Allah bri ka aman teuma