(BALAK) Ka Idlas
Milyon na ang gapanawagan sa imong kamtayon
Morag samang panawagan sad ang imong nahimong pagkaon.
Daw kinsa may dili maulit kanimo, Ka Idlas,
Nga pila na kabatalyon nga gipadala
Taman ras damgo ang imong pagkapukan.
Unsa may matang sa anting-anting
Ang ginalikos nimo sa imong hawak?
Nga ang bala igo raman molahos sa imong lawas.
Gilihian ba sa matas agila
Kanang imong panan-aw?
Nga sa pagtak-op sa kahayag, makita man gihapon nimo
Ang gapadulong nga pulotong sa kadaot.
Gilugsong nako ang mga lasang.
Gikamang ang mga kuweba.
Gisaka ang kabukiran.
Imo gyod gibarogan ang ngalang gigasa kanimo.
Hangtod naabot ko kining bungtod
Sa ambot asa na ning dapita
Ug makita ang tibuok lungsod ug probinsiya
Diin gikan ang gapangita sa imong ulo.
Didto mingsantop sa akong hunahuna
Ang tinubdan sa imong gahom:
Morag bituon gakislap-kislap
Ang mga pulang bandilag banderitas
Sa samang lungsod ug probinsiya
Diin gikan ang gapangita sa imong ulo.
Mabuhi ka, Ka Idlas!
Dawata kining akong halad:
Usa ka masog sanggot
Alang sa atong kaluwasan.
About the Poet
@gilnambatac