great allama muhammad iqbal poetry hamdardi

Tahnī pe kisī shajar kī tanhā
bulbul thā koī udaas baiThā

kahtā thā ki raat sar pe aa.ī
uḌne chugne meñ din guzārā

pahuñchūñ kis tarah āshiyāñ tak
har chiiz pe chhā gayā añdherā

sun kar bulbul kī āh-o-zārī
jugnū koī paas hī se bolā

hāzir huuñ madad ko jān-o-dil se
kiiḌā huuñ agarche maiñ zarā sā

kyā ġham hai jo raat hai añdherī
maiñ raah meñ raushnī karūñgā

allāh ne dī hai mujh ko mash.al
chamkā ke mujhe diyā banāyā

haiñ log vahī jahāñ meñ achchhe
aate haiñ jo kaam dūsroñ ke