SURAH KANJAI

Salam alaikum teungku meutuwah
Lon keuneuk surah meu sikrek dua
Masalah kanjai lon neuk ci surah
Lagee geupeugah le ureung tuha

Yang geukheun kanjai wahee tgk cut
Ka roeh ta pubut but yang meulangga
Ta peugah ka thoe padahai bulut
Watee boco trub ka malee mata

Contoh yang laen ulon boh tamse
Na toke padee peu kureung harga
Padahai yum meuhai bukonle
Oeh watee akhee ka malee teuma

Meunyoe keu kanjai na macam-macam
Dikeu yah tuan teungoeh poh cakra
Bak peugoet lucu garang hana ban
Ka beukah pinggang leumah uram pha

Contoh yang laen wahee ee sampe
Ka dikeu guree roeh ta meuseunda
Bak peugah haba ngoen kata kah kee
Padahai guree ka malee raya

Ladom kanjai buet droe keudroe
Wap di yue meubloe le ma sidara
Pakaiyan dalam ka geutanyoe bloe
Watee ta puwoe ka raya teuma

Na cit yang ladom kanjai ngoen utang
Galak keu seunang beu oe usaha
Na meu eet tu oet jitop le utang
Dudoe ka jeut prang oeh akhee masa

Yang ladom kanjai sebab meulintei
Roeh tokee sabee lakoe sidara
Ban ji puwoe peng meu reutoh ribei
Oeh akhee lagee tamong penjara

Yang lucu kanjai wahee syedara
Bak peugah haba hana geuthei droe
Dudoe meu cukeh lakoe sidara
Pah bak uram pha bak bineh kolo

Nyoe keuh sipatah lon surah kanjai
Yang laen that jai meu macam bagoe
Bek sampe tanyoe ngoen sebab bangai
Ji teume kanjai rap tiep-tiep uroe

Teurimong geunaseh