So teuma Gata?

Kadang bak pandangan salah meukereuleng
Kadang bak loen khem salah meuhaba
Goh lom meuturi han mungken loen peukhem
Teuma di Dalem SOGATA teuma?

Han troh loen saweu jak meumat jaroe
Hanjeut loen peutoe jak peugah haba
Cuma reut komen loen tanyong jinoe
Pat keuh tinggai droe Abang @Sogata ?

Rampak blang na ureung meugoe
Rampak geutanyoe ta meusyedara
Hajat neuk meuturi foto loen peutoe
Ka cukop that paloe hana deuh rupa

Bumoe Aceh timang lhee sagoe
Na padum boh pulo di seu-seulingngka
Pakon hantom meurumpok sigoe geutanyoe
Padahai tiep uroe meuputa-puta

Mungken na beda neuduek geutanyoe
Gata lam moto uloen ek honda
Meuseubab nyan keuh hantom meusahoe
Kadang na sigoe-goe meukeu-keu mata

Kasep keuh haba loen tanyong jinoe
Supaya meusoe SOGATA teuma?
Meunyoe na watee neu balah komen nyoe
Lewat Alam Maya nyoe ta meusyedara

Terimong Geunaseh,