Cae Peu ingat bangsa

in news •  7 months ago

Assalamualaikum
(keunarang :Tarmizi Thaib Pda)
image

lahien lahien si ticem murong
diateuh tampong meuhayon doda
gasien gasien hudep bangsa long
saba hai ampon dang dang sijahteura

bek neujak pateh haba boh lam Oen
haba peu hayon dum calon raja
tanyoe jipeugot keu tutue sambong
lheuh nyan rakan lon tanyoe jilupa

nyoe teungoh peurlei gata jipeutow
jok haba laloe ngen tipu daya
watei kajiduek jingeuk hanjeut tow
peugah sibok droe rapat meubura

kayoh kayoh raket u nanggroe
marwah tapuwoe lagei yang ka ka
lakei bak allah nibak saboh roe
aceh beu meuwoe yoh masa raja

rakyat lam seunang rata jeut sagoe
bekna yang phang phow beuseujahteura
adakpih raja beuna geuthei droe
rakyat geuhiroe tuha ngen muda

bek lagei jinoe tan meuhoe sahoe
jipeukaya droe meukuba kuba
jipeugah meunoe jipubuet meudeh
keubit sep paleh wahe syedara

Keu ureung gasien sabe lam tuwoe
Cit han jipakow wahe syedara
Di Aneuk yatim meukuwien Sidroe
Sabe tiep uroe hudep seungsara

Oh tow pemilu peugah hayeu droe
Meunan keuh bagoe ji ilah daya
Jak sipreuk janji rata jeut sagoe
Janji jok leumoe modal usaha

Nacit yang ladom bagi ija krong
Sirop cap patong intat meubura
Jibagi jilbab rata jeut duson
Ngen kartu nama sion jipasoe sigra

Bak seutudio foto that rumeh
Wajah peuputeh dak kulet sukla
Jigupai jaroe bah igoe cumeh
Keubit sep pangeh bak tipu daya

Wahe rakan lon yang saboh hate
Geutanyoe bekle lagenyan cara
Tapileh waki yang tem seumike
Dewan yang ade keu ureueng papa

Hukom agama beugeutem peutheun
Beugeutem linteung Angkara murka
Bek teupeungaroh ija cap rimueng
Meunan peukateun hina that cara

Authors get paid when people like you upvote their post.
If you enjoyed what you read here, create your account today and start earning FREE STEEM!
Sort Order:  

Kami sudah upvote tulisan keren.. ;^) (Secuil kontribusi kami sebagai witness pada komunitas Steemit Indonesia.)