အဆင်ပြေပါတယ် အမေ (ဇာတ်သိမ်း)

ပါးပြင်ပေါ်စီးကျလာသော မျက်ရည်ပူတစ်ချို့ကို ဖိသုတ်ရင်း မလွန်း အားတင်းလိုက်ပါတယ်။ ခန္ဓာကိုယ်နာကျင်မှုထက် ရင်ထဲက နာကျင်မှုက ပိုလို့ဆိုးပါတယ်။ ပူပြင်းသောနေရောင်အောက်တွင် ခုတ်လက်စ နာနတ်သီး များကို သယ်လာရင်း သစ်ပင်ရိပ်တွင် ခဏနားမည်ဟုတွေးနေမိတုန်းမှာဘဲ ယောက်ခမ ဖြစ်သူ၏ မာန်မဲသံကို အရင်ကြားလိုက်ရတာကြောင့် နားမနေတော့ဘဲ ခြင်းအလွတ်တလုံးကို ယူကာ ခြံထဲပြန်ဆင်းလာခဲ့ပါတယ်။ နာနတ်သီးဆူးများကြောင့် သွေးစို့နေသော အနာများကို ဂရုမစိုက်အားဘဲ စိုက်ခင်းထဲသို့ တိုးဝင်ခဲ့ရပါတော့သည်။

တကယ်တော့ ဒီ ဒုက္ခတွေက ဘယ်သူမပြု မိမိမှုပါဘဲလေ။ မကြာသေးမီက အတိတ်ရဲ့ အရိပ်အချို့ မလွန်း မျက်ဝန်းအိမ်ထဲ မြင်ယောင်လာမိပါသည်။ ထိုသူနှင့် မလွန်း သိကျွမ်းရင်းနှီးပြီးနောက် ချစ်ကြိုးသွယ်ခဲ့ကျပါတယ်။ ချစ်သူဖြစ်ကျပြီး မကြာခင်မှာဘဲ မလွန်းတို့ လက်ထပ်ဖြစ်ခဲ့ကျပါတယ်။ မလွန်း မိဘများ ကျေနပ်သည် အထိ တောင်းရမ်းလက်ထပ်ပြီး မင်္ဂလာဆောင်ပေးခဲ့ရာ မလွန်းမှာ မိမိအပေါ်တန်ဖိုးထားလေခြင်းဟု အပျော်လွန်ခဲ့ရသည်။ မိဘများမှာလည်း သမီးကလေး လင်ကောင်းသားကောင်းရလေပြီဟု စိတ်အေးခဲ့ရသည်။ မိဘများအားလည်း လစဉ်ထောက်ပံ့ပေးမည်ဟု ထိုသူမှ ကတိပေးထားခဲ့သည်။ ထို့နောက် မလွန်းကို ခေါ်ကာ ထိုသူ၏ မိဘများ အိမ်သို့ မလွန်း ချွေးမတက်လိုက်ခဲ့ရလေသည်။

credit image source

ထိုသူ၏ အိမ်သည် ခြံလုပ်ငန်းများလုပ်ကိုင်သည့်အပြင် ဝက်များကိုလည်း စီးပွားဖြစ် မွေးမြူ ထားသောကြောင့် မလွန်းသည် တနေကုန်နားရသည်ကို မရှိ။ ထိုသူ၏ မိဘများမှာလည်း ချွေးမကို တန်ရာတန်ကြေး ပေးဝယ်ထားသော ငွေဝယ်ကျွန်သဖွယ် အနားမပေးပေ။ မနက်အစောထကာ တစ်အိမ်လုံးအတွက် စားသောက်ရန် ပြင်ဆင်ပေးရသည်။ ပြီးလျှင် ဝက်စာကြို အရက်ချက်ရသည်။ နေ့လယ်စာစားပြီးသည်နှင့် ခြံထဲဆင်းရသည်။ ညနေ စောင်း ရေချိုး ထမင်းစားပြီးသည်နှင့် ညအချိန်တွင် အရက်ဖောက်သည်များကို ချိန်တွယ်ရောင်းချရသည်။ ညနက်မှပင် မလွန်း နားရတော့သည်။ ကြာလာတော့ မလွန်း ခံနိုင်ရည်နည်းပါးလာသည်။ အမေ့အိမ်ကို သတိရ၍ အမေ့ရင်ခွင် ခေါင်းတင်ပြီး အိပ်ချင်လှသော်လည်း ယောက်ခမ နှင့် ယောက်ျားလုပ်သူက အိမ်မပြန်စေလို။

အမေ့ထံသတိရလွန်းလှသဖြင့် ဒီညတော့ မလွန်း ဖုန်းဆက်ဖြစ်သည်။ မိသားစုသုံးစွဲရန် ငွေပို့ပေးမည်ဖြစ်ကြောင်း မလွန်းပြောတော့ အမေက ငိုရှာသည်။ သမီး အဆင်ပြေရဲ့လားတဲ့။ တုန်ရီတဲ့အသံလေးနဲ့ အမေ မေးတော့ မလွန်း ဖြေလိုက်ချင်သည်။ အဆင်မပြေဘူး အမေ။ သမီးနေရတာ ကျွန်သာသာပါ။ ယောက်ခမတွေကိုလည်း ကြောက်ရသလို ယောက်ျားကလည်း တစ်ခွန်းတပါဒမှ ပြန်ပြောတာ မကြိုက်ဘူး အမေ။ သူ့မိဘ အရမ်းခိုင်းလို့ တစ်ခါ ပြန်တိုင်မိပါတယ် သမီးကို ထရိုက်တယ် အမေ။ ညညဆို ပင်ပန်းလွန်းလို့ ညောင်းကိုက်နေတာဘဲ အမေ။ အမေ့ရင်ခွင်မှာမှီပြီး တရေးလောက် မှေးစက်ချင်တယ် အမေ။ သမီး အိမ်ကို ပြန်လာချင်တယ် အမေ။ အမေတို့နဲ့ ဘဝထက်ဆုံး အတူနေချင်တယ် အမေ။ အမေ့ကို ပြောလိုက်ချင်သော်လည်း မလွန်း နှုတ်မှ မထွက်ခဲ့ပါ။ အမေ့ရဲ့ ပြောစကားကြောင့် မလွန်း ဆွံ့အသွားခဲ့ရပါပြီလေ။ ''သမီး ဒီတခါ ပိုက်ဆံပို့ရင် အမေ့ သားအိမ်က အလုံးကြီး ခွဲထုတ်လိုက်တော့မယ်နော်တဲ့'' မလွန်းပြန်သွားရင် အမေ ခွဲစိတ်ဖို့ တစ်မိသားစုလုံး စားဝတ်နေရေး ဘယ်သူထောက်ပံ့မလဲ။ တွေးရင်း မလွန်း မျက်လုံးတွေ ပြာဝေလာတော့သည်။ နောက်ဆုံးတော့လည်း အားတင်းရင်း အမေ့ အမေးကို ပြန်ဖြေလိုက်မိပါသည်။
'' ဟုတ်ကဲ့ သမီး အဆင်ပြေပါတယ် အမေ'' ဟူ၍သာ...

credit image source
ပြီးပါပြီ
အားပေးဖတ်ရှု့ခဲ့ကျသော Steemitမိသားစုများအားလုံးကို ကျေးဇူးတင်ပါတယ်

@suhlaing
msc 175