ရီမော ပျော်ရွှင်စွာ နေထိုင်ပါ ( Henry Aung )

မင်္ဂလာပါ။ လွန်ခဲ့သော ရက်အနည်းငယ်ခန့်က နေ့လည် ထမင်းစားချိန် အားလပ်ချိန်အတွင်း ကျွန်တော်၏ Steemit blog ပေါ်မှ comments များအား reply လုပ်နေချိန် ကျွန်တော်တို့ ကုမ္ပဏီမှ အရောင်းဝန်ထမ်း တယောက် ကျွန်တော့စာပွဲနားလာပြီ အဘယ်ကြောင့် နေ့လည်စာ စားချိန်တွင် အလုပ်လုပ်နေရကြောင်းမေးပါသည်။

ကျွန်တော်ကလည်း Steemit blog အကြောင်းပြောပြ၍ ဆောင်းပါးများရေးတင်နိုင်ကြောင်း ရှင်းပြခဲ့ပါသည်။ ထို့နောက် ကျွန်တော်ကလည်း တနှစ် ကျော်အတွင်း ဆောင်းပါး ၁၄၀ ကျော် ရေးသားခဲ့ပြီ ဖြစ်ကြောင်းရှင်းပြသောအခါ တအံ့တသြဖြင့် ပြန်မေးသည်မှာ " why you have so many things to write ? “ ကျွန်တော့တွင် ဘာကြောင့် ဤမျှ လောက်ရေးစရာ ရှိနေရပါသနည်း။

ကျွန်တော်ကလည်း ပြန်ရှင်းပြပါသည်။ ကျွန်တော့်ဘဝ အကြောင်းများ ၊ ကျွန်တော်သိ သောအကြောင်းအရာများ၊ ကျွန်တော် ရင်ဆိုင်ခဲ့ရသော ပြသနာများ ၊ အခက်အခဲများ ကို ဆောင်းပါးအဖြစ် ပြန်ရေး၍ အခြားသူများအား ဝေမျှခြင်း ဖြစ်ကြောင်းရှင်းပြပါသည်။ ထို့နောက်သူ ခဏလေး တွေဝေသွား၍ မှတ်ချက်ပေးသည်မှာ " ငါ့ အကြောင်းရေးရင်တော့ A4 တမျက်နှာတောင်ပြည့်ပါ့မလားမသိဘူး" ဟူ၍ သူ့ကိုယ်သူ မှတ်ချက်ချပါသည်။

ကျွန်တော်ကလည်း အဘယ်ကြောင့် ရေးစရာမရှိကြောင်း ပြန်မေးသောအခါ သူပြန်ပြောသည်မှာ ငယ်စဉ်ကတည်းက ပုံစံခွက် အတွင်း သာ ကြီးပြင်းလာရသဖြင့် ထွေထွေထူးထူး ရေးစရာမရှိပါ ဟူ၍ ပြန်ပြောပြပါသည်။ မှန်ပါသည်။ စင်္ကပူလူငယ်များမှာ မိဘများမှ နေထိုင်မှု standard ပုံစံသွင်း ထားသလို အစိုးရကလည်း အဆင်ပြေ စေရန် အားလုံး လုပ်ထားပေးသဖြင့် သူတို့အတွက် အခက်အခဲကြီးကြီးမားမား မရှိကြပါ။ ယေဘုယျ အားဖြင့် ပြောခြင်း ဖြစ်ပါသည်။ လူတိုင်တွင် မတူညီသော အခက်အခဲများ ရှိစမြဲသာ။

သူတို့ အနေဖြင့် ကျောင်းနေချိန်တွင် ကျောင်းနေ အစိုးရက ထောက်ပံ့ကြေးများပေးထားသလို ၊ သွားရေး လာရေး အကုန် အဆင်ပြေပါသည်။ ကျောင်းပြီး သွားလျင် အလုပ်အကိုင်များက လည်း စင်္ကပူနိုင်ငံသား ဦးစားပေးခန့်သဖြင့် ပူစရာအလို။ အိမ်ထောင်ပြုမည်ဆိုရင်လည်း အစိုးရထံတွင် နေစရာ တိုက်ခန်း လျှောက်လိုက်ယုံသာ။

သူတို့အတွက် အခက်အခဲဟူ၍ မိမိ ဝင်ငွေ ထက် ပို၍ သုံးနေကြသော အခက်အခဲသာရှိပါသည်။ ထို့နောက် ကျွန်တော်ဆက်၍ စဉ်းစားမိသည်မှာ ကျွန်တော်တို့ မြန်မာနိုင်ငံသား များအဖို့တော့ အခက်အခဲဟူသည်မှာ မွေးကတည်းက ဒွန်တွဲပါလာသကဲ့သို့ ဖြစ်နေပါသည်။ ထို့နောက် ကျောင်းနေအရွယ် အခက်အခဲများ ၊ ပညာရေး အခက်အခဲ ၊ အချိန်မတိုင်မှီ လုပ်ငန်းခွင်သို့ ရောက်ရသော အခက်အခဲ၊ အိမ်ထောင်ပြုလျင် အိမ်ငှားနေရသော အခက်အခဲ ပြောပြလျင် အခက်အခဲများ ပြောစရာပင် မကုန်ပါ။

ထို့ကြောင့် မြန်မာနိုင်ငံသားများအဖို့ မွေးကတည်းက အဖေါ်အဖြစ် အခက်အခဲများက ဒွန်တွဲပါလာဟန်တူပါသည်။ တခုတော့လည်းကောင်းပါသည် မြန်မာလူငယ်များအဖို့ Steemit တွင် စာ၊ ဆောင်းပါး ရေးရန် ကုန်ကြမ်းများက တွဲပါလာပြီး ဖြစ်၍ ဂုဏ်ယူမည် ဆိုကလည်း ကြံဖန် ဂုဏ်ယူနိုင်ပါသည်။

စင်္ကပူ နိုင်ငံသားများအဖို့ အရာရာ အဆင်ပြေနေ၍ အခြားအရာများကိုလည်း သိပ်ပြီး အလေးမထားတော့ပါ။ ပြသနာ တစုံတခု ဖြစ်လာလျင် မိမိ လွတ်ရာ လွတ်ကြောင်းကို အရင်စဉ်းစားကြပါသည်။ သို့မဟုတ် မည်သူ့ကို လွဲချ ရမည်ကို စဉ်စားကြပါသည်။ အရာရာတိုင်းအား သိပ်ပြီး အလေးအနက်မထားကြပါ။

ကျွန်တော်တွေ့ဖူးသော စင်္ကပူ နိုင်ငံသား အများအားဖြင့် ထို အတိုင်းသာ။ ဤတွင် ဆက်စပ်၍ တွေးမိသည်မှာ သူတို့ အနေဖြင့် ပုံစံခွက် အတွင်း ကြီးပြင်လာကြသဖြင့် ထိုပုံစံခွက်မှ အပြင်ကို မထွက် နိုင်ကြတော့ပါ ၊ တနည်းအားဖြင့် အရာရာ အဆင်ပြေနေသည်ကိုသာ လိုချင်ကြပါသည်။ အဆင် မပြေဖြစ်လာလျင် မည်သို့ ရှောင်ထွက်မည် သို့ မဟုတ် အဆင်မပြေဖြစ်သည်များကို ဖြေရှင်း ပေးမည့်သူကိုသာ စောင့် မျှော်ကြပါတော့သည်။

ထိုအကြောင်းများကို တွေးတောနေရင်း ဖြင့် ဇီဝဗေဒပညာရှင် Charles Darwin’s ၏ survival of the fittest ဟူသော စကားလေး ကိုသတိရမိပါသည်။ Survival of the fittest ဟူ သည်မှာ အလွယ်ကူဆုံး ဘာသာပြန်ရလျင် သက်ရှိဇီဝလောကတွင် ပါတ်ဝန်းကျင် ပြောင်းလည်း မှုအပေါ် လိုက်လျောညီထွေစွာ လိုက်ပါ ပြောင်းလည်း နိုင်သူတို့သာ အသက်ရှင်သန် နိုင်ကြသည် ဟူ ၍ အဓိပ္ပါယ် သက်ရောက်မည်ထင်ပါသည်။

ဥပမာ လက်ရှိ ကမ္ဘာကြီးတွင် အပူချိန် တဖြည်းဖြည်း မြှင့်တက်လာနေရာ ထိုမြှင့် တက်လာသော အပူချိန်ကို ခံနိုင်ရည်မရှိသော သက်ရှိတို့က တဖြည်း ဖြည်း မျိုးတုန်း ကွယ်ပျောက် ကုန်ကြမည်ဖြစ်ပါသည်။ ကျွန်တော်တို့ လူသားများကလည်း ထိုမြှင့်တက်လာ သော အပူချိန် အလိုက် မိမိတို့ အသားအရေ ၊ နေထိုင်မှုပုံစံများ လိုက်ပါပြောင်းလည်းနေရမည်သာ ဖြစ်ပါသည်။

ကျွန်တော်တို့နေထိုင် လူမှုပါတ်ဝန်းကျင်တွင်လည်း ဤကဲ့သို့ လိုက်လျောညီထွေစွာ မနေနိုင်ကြလျင် တဖြည်း ဖြည်း ဖြင့် ပါတ်ဝန်ကျင်း ၏ လစ်လျူရှု ခြင်းခံရမည်သာဖြစ်ပါသည်။ လွန်ခဲ့သော နှစ်အနည်းငယ်ခန့်က ကျွန်တော့တွင် သူငယ်ချင်းတယောက်ရှိခဲ့ဘူးပါသည်။ သူသက်ရှိထင်ရှား ရှိနေသေး၍ နာမည် မဖေါ်ပြတော့ပါ။ သူ့မိဘများမှာ အတော်အတန်ကြွယ်ဝ၍ ငယ်ငယ်ကတည်းက ပြည့်စုံစွာ နေရသည်ဟု ဆိုနိုင်ပါသည်။ သို့သော်သူ့မိဘများက အခြားရပ်ကွက် အတွင်းရှိကလေးများ နှင့် အပေါင်းအဖေါ် ဖြစ်ခွင့်မပေးခဲ့ပါ။

ထို့ကြောင့် ကျွန်တော်၏ ငယ်ဘဝ အကြောင်း ဂျင်ပေါက်ခြင်း ၊ ဂေါ်လီလိမ့်ခြင်း ၊ စက်ဘီးတာယာခွေအား တုတ်တချောင်း ဖြင့် ရိုက်ကာရိုက်ကာ လိမ့်ခြင်း ၊ ဧရာဝတီ မြစ်ထဲတွင် ငါးရှာ ဖားနှိုက် သည့် အကြောင်းများ စသည်စသည် ကျွန်တော့ ငယ်ဘဝအကြောင်းကို ပြောပြသောအခါ တအံ့တသြဖြင့်နားထောင်နေတတ်ပါသည်။

သူ့ငယ်ဘဝ အကြောင်း မေးသောအခါ TV gameဖြင့်သာ အချိန်ကုန်လွန်ခဲ့ကြောင်း ပြောပြပါသည်။ သူအနေဖြင့် စင်္ကပူ တွင် ကျောင်းပြီးထားပြီ computer တွင် အလွန်တော်ပါသည်။ ထို့ အတူ graphic design တွင်လည်း အလွန်တော်ပါသည်။ သို့သော် ပြင်ပ ဗဟုသုတ တွင် တော့ လုံးဝနီးပါ တကယ်ကို လုံးဝနီးပါး မရှိပါ။

ဗိုလ်ချုပ်အောင်ဆန်း အဘယ့်ကြောင့် ဖက်ဆစ်ဂျပန်နှင့်တွဲပြီး အင်္ဂလိပ်တို့ အား တိုက်ခဲ့သည့် ရည်ရွယ်ချက်ပင် မသိပါ။ မည်ကဲ့သို့ ၁၀ တန်း အောင်လာသည်ကို ကျွန်တော် အလွန်အံ့သြမိပါသည်။ ကျွန်တော့အနေဖြင့် သူ့အားစာဖတ်ရန် တိုက်တွန်းသောအခါ ခါးခါးသီးသီးပင်ငြင်းပါသည်။

စာဖတ်ခြင်းထက် Dota 2 ခုတ်ပြီး items များရလျင် ရောင်းစားနိုင်ကြောင်း ပြန်ပြောပါသည်။ ကျွန်တော့အနေဖြင့် ပြောရလျင် နေ့စဉ် ဘဝတွင် ဟာသအမြင် မရှိလျင် အတော်ပင် ခြောက်သွေ့သော ၊ တနည်းအားဖြင့် စိတ်ပင်ပန်း စရာ ကောင်းသော ဘဝများ ကိုသာ ဖြတ်သန်းရလိမ့်မည်ဟုထင်ပါသည်။ ပျော်ရွှင်ခြင်းများစွာ ရှိသည့် အနက် ရယ်မောပျော်ရွှင် ခြင်းသည် စိတ်အား လန်းဆန်း စေသလို ခွန်အားများလည်း ဖြစ်စေပါသည်။

ဆိုခဲ့သည့်အတိုင်း ကျွန်တော့သူငယ်ချင်း ထိုသူမှာ ဟာသအမြင် ပျောက်ဆုံး နေခြင်း ဖြစ်ပါသည်။ သူကျွန်တော့ကို တွေ့တိုင်း အမြဲပြောသော စကားမှာ “ ကိုဟင်နရီကို ကြည့်လိုက်ရင် အမြဲ တမ်း ပြုံးနေပြီး ရီရီမောမော နဲ့ တက်ကြွနေတယ် ၊ ဘယ်အချိန်ကြည့်ကြည့် active ဖြစ်နေတယ်၊ ကိုဟင်နရီရဲ့ ဘဝကို အားကျလိုက်တာ " ဟူ သောစကားဖြစ်ပါသည်။

ကျွန်တော့အထင် ထိုကဲ့သို့ ဟာသအမြင် ရှိရန်လည်း ပြင်ပ ဗဟုသုတများ ရှိရန်လိုအပ်ပါသည်။ များသောအားဖြင့် ဟာသများမှာ ဥပမာများဖြစ် တည်ဆောက်ကြသည်ဖြစ်ရာ ဥပမာပြစရာ ပြင်ပ ဗဟုသုတ မရှိလျင် ထိုဟသ များကိုနားလည် နိုင်မည် မဟုတ်ပါ။ ဟာသအချို့ကို ဥပမာပြပါမည်။

အကယ်၍ တစုံတယောက်က စမူဆာဝယ်လာ၍ အခြားသူတယောက်က ထိုစမူဆာကို " ခင်ဗျား စမူဆာက ရေသည်မိန်းမရဲ့ ဆံထုံး နီပါးလောက်ရှိပါလား " ဟူ၍ ဥပမာပြ၍ ဟာသပြောလျင် ရေသည် မိန်းမ ၏ ဆံထုံး အရွယ်အစားကို သိသူများသာလျင် ထိုဟာသအပေါ် ရီမော နိုင်ပါလိမ့်မည်။

မြန်မာတို့ ၏ နာမည်ကျော် လှတောသား စကားပဒေသာ ဟာသများမှာလည်း ဥပမာများ ဖြင့် တန်ဆာဆင်ထားခြင်းသာဖြစ်ပါသည်။ ထိုဥပမာများကို နားလည် နိုင်ရန်လည်း အတော်အသင့်တော့ ဗဟုသုတ ရှိထားရန် လိုသလို ထိုသို့သော ဗဟုသုတရှိထား နိုင်မှလည်း ဟာသအမြင် ရှိနိုင်မည်ဟု ထင်ပါသည်။

ဤသည်မှာ ကျွန်တော့ ထက်မြင်ချက်သာဖြစ်၍ မှား ကောင်းမှား နိုင်ပါသည်။ သို့သော် သေချာသည်တခုကတော့ ဟာသအမြင်ရှိသူများသည် အများသူငှာများထက် ပျော်ရွှင်နေတတ်သလို အောင်မြင်နေကြသူများ ဖြစ်နေတတ်ပါသည်။ အဘယ့်ကြောင့်ဆိုသော် ထိုသူများသည် အခက်အခဲများကို ဟာသများအဖြစ် ပြောင်းလည်း နိုင်စွမ်းသူများ ဖြစ်သောကြောင့် ဖြစ်ပါသည်။

ထို့ကြောင့် မိမိနေ့စဉ် ဘဝများတွင် ရီမောခြင်းဖြင့် ဘဝ ပင်ပန်းမှုများကို ဖြေဖျောက်နိုင်သလို ၊ ထိုကဲ့သို့ လွပ်လပ်ပေါ့ပါးစွာ ရီမော နိုင်ရန်အတွက် ဟာသ အမြင်များရှိဖို့လည်း လိုအပ်ပါသည်။ အထက်တွင် ဆိုခဲ့သည့်အတိုင်း ဟာသအမြင်များရှိရန် အတော်အသင့်သော ဗဟုသုတများ ရှိရန် လိုပါသည်။

စာဖတ်ခြင်းသည် ဗဟုသုတရရှိစေရန် အတွက် အကောင်းဆုံးနည်းလမ်း ဖြစ်ပါသည်။ ထို့ ကြောင့် Steemit တွင် ဆောင်းပါးများ ရေးခြင်း ၊ ဖတ်ရှုခြင်းဖြင့် ဗဟုသုတ ရှာ မှီးနေကြသော MSC members အပေါင်းတို့ ရီမောပျော်ရွှင်ဖွယ် ဖြစ်သော နေ့များစွာ ပိုင်ဆိုင်နိုင်ပါမည့် အကြောင်း ဆုမွန်ကောင်း တောင်းပေးလိုက်ရပါသည်။

မြန်မာလူငယ်များ steemit တွင်အောင်မြင်ကြပါစေ....

Photos credit; Google Image
Author : Henry Aung ( Kachin )
MSC : 001