Tabangi ko, Nanay

“Ang kangitngit niining panganod sa dughang nagtubod
Nagpatigbabaw sa kinabuhing walay unod
Niining bata ni inday nga nagkamamo ug panghalay
Sa iyang kalag nga halos mamatay sa kalaay”

Nay, tabangi ang bata nga naunlod niining baybay
Tabangi ang bata nga nagtabisay ang laway
Tungod sa imung sagpa nga milamay sa kanunay
Nay, tabangi ang bata nga naglatagaw sa awa-aw
Kay ang hagit dili tiaw
Sa bata nga natagbaw sa kamingaw
Ang kasubo nga gipanday sa dugo nga nag-away
Sa kasing kasing sa bata nga gisung-ay
Ang handurawan sa kahayag nga gihandum
Sa bata nga naglugos na ug pag-dumdum
Tungod sa kasakit nga gi luom-luom

Nay, ayaw ko biya-i, ang akung kaugmaon timan-i.
Paminawa ang lagitik sa akung dughang imung gibuy-an
Sa duyan nga imung gitabyog ug nidalugdog
Ang yuta nga gihagbungan sa kasing kasing
Nga dili na gayud matiman-an
Sa panumduman nga handumanan
Sa akung lawas nga dili na mapapas
Sa adlaw sa tinghunas

Nay, ang paghigugma hain naman?
Sa inahan nga maoy tinugyanan
Sa kaugmaon nga maoy hinungdan
Sa kaagi nga gikuptan
Sa usa ka bata nga gibilin sa kiliran
Tungod sa balas nga imung gibigaan
Wala kaha ka naulawan
Sumsuman ka sa mga tabi-an?

Paminawa ang hunghong
Sa hangin sa paghingilin
Kung aduna pakay gugma nga nahibilin
Sa bata nga gilugwa sa baba sa panganod
Nga naunlod sa balod nga hawod
Luwasa ang imong bata
Sa kamot sa ka aligogot
Nga nikupot sa dugo nga nangahurot

Ang agaab nga nidagayday
Sa mga mata sa bata nga nag inusara
Ang agulo nga nidahunog sa mga walog
Ang nadungog sa kalibutang nahulog

Ang bulan nga napatik sa dughan
Sa bata nga wala napura
Sa dagdag sa iyang mga luha
Nga murag ulan nga walay kahumanan
Ang tingog sa pulong nga wala nihunong
Sa paglubong sa kahuyang nga imong gipatagamtam
Ug ang imung mga lamlam nagkaanam

Sugata ang pagbanag-banag sa alamag
Tarunga ang imung utok nga nabarag
Sa kaniadtong ikaw gilakag
Imung nawong ga-hubag hubag
Tungod sa kabugnaw nga gababag

Nagapanghupaw ang akung dughan
Tungod sa kasakit nga hilabihan
Ang bitoon sa kawanangan
Ang nagalamdag sa akung dughang
Inumol sa mga adlaw nga nagkamang
Sa mga maidlot nga dalan sa amang
Nga kapalaran nga dili na makit-an
Sa buta nga dughan nga gitabunan sa kasal-anan
Sa akong inahan nga nabuntagan

Ikaw unta ang dalangpanan
Sa bata nga gilu-ok sa kasub-anan
Apan aha man ka gikan
Imo raman akong gitalikdan
Sa walay klaro nga hinungdan

Nag-aginod ang matag gutlo
Sa kalibutan nga gikutlo
Sa mahinungdanon nga kahigayonan
Sa usa ka inahan, nga nagdagan dagan
Aron ang iyang anak mabalikan

Tabangi ko, nanay
Kay ang akung luha nag-agas
Akung balahibo nagkahinay ug kalagas
Kay ang imung ngalan dili mapapas
Sa akung dughang hapit na mahupas
Ug hinaot nga kini maluwas
Kay si nanay, ania na.
Niabot na si Nanay nga akung hinigugma.
Nanay nga akung gihandum sa kanunay,
Si nanay ug wala na’y lain pa.