Haba pepatah
Tamita judo wahe rakan
Yang sipadan dengan gata
Karena judo nyan pasangan
Mangat aman rumoh tangga
Bek taharap ibuk bidan
Menyo lulusan gata SMA
Bek taharap yang rumoh Geudong
Menyo lam rambong takeurija
Bek tamita ibuk guru
Menyo pajoh bu dengon sira
Karena tanyo jet keu babu
Dumpue-dumpue jih keu raja
Bek taharok aneuk toke
Menyo tan CB dengon ninja
Bek taharap aneuk teungku
Menyo qulhu hana bisa
Karena judo wahe rakan
Nyan cerminan diri gata
Menyo gata muge pisang
Menyo pasangan tan sikula
Bek Tamita yang puteh meuprak
Menyo akhlak dijih tanna
Bek tamita yang kulet licen
Menyo oh meukawen maen phok raga
Bek tamita kuliahan
Menyo barang lage di banda
Karena kawen kot buet dagang
Rugo ranjang merek Jepara
Rugo jelame wahe abang
Menyo barang atra bersama
Rugo kueh dan peneuwoe
Sebab putoe kateubuka
Dara jino leu wawasan
Sira kuliahan na usaha
Laba sep leu barang tinggai
Boh pue pasai han jihawa
Mita judo wahe rakan
Pelan-pelan bek tergesa
Karena jino leu tiruan
Asoe dalam merek cina
Mita judo yang na iman
Mangat aman rumoh tangga
Yang jeut jibeut dan sembahyang
Baca Quran pih beu bisa
Jeut meusuci jitupue hukom
Bek alah hom ilon lupa
Menyeu dumnan jih hana jeut
Han jeut kubuet wahe syara
Mita judo yang hana petimang
Adak makanan dumpue bisa
Jeut on paku dan on bayam
Kadra sembam kabahgia
Baje asai ka tetop badan
Hana pesan atra korea
Adak budak jeut tupong kanji
Lip bak bibi jeut boh keusemba
Karena cantek keun bak dandan
Tapi bak iman dalam dada
Kepue lagak nyeu akhlak tan
Cukop saban ngon muruwa
Menyeu inong yang mutuah
Hana payah bak tajaga
Menyo inong keneuk paleh
Jitem sapeh mita dausa
Lake meuah wahe rakan
Bek neusimpan dalam dada
Nyo hanya saboh karangan
Sebagoe bahan tameuseunda.😂...