Petai Beans မျောက်ငိုသီး

Petai Beans မျောက်ငိုသီး

မျောက်ငိုသီး မေးကြတယ်။ နှမ်းဖတ်ချဉ်လည်း မေးကြတယ်။ ကျွန်တော်က မျောက်ငိုသီးကို ပြည်ပထွက်ပြေးတော့မှသာ စားဖူးတယ်။ အခုရေးတာလည်း တဆင့်စကား နှစ်ဆင့်စကား တပည့်ခံပြီးသိတာသာဖြစ်တယ်။

နိုင် နိုင် ဆွေ = အာလူးနဲ့ချက်စား ခရမ်းချဉ်သီးနဲ့လည်းချက်လို့ရတယ်။ မျောက်ငိုသီး ရေနွေးဖျောပြီး သုပ်စားလည်း ရတယ်။ အရသာက ဆိမ့်တဲ့ဘက်။ အနံ့က တညင်းသီး ရေထိကရုန်း အနံ့နဲ့တူတယ်။

Petai က မလေးစကားဖြစ်တယ်။ မြန်မာနိုင်ငံမှာ ချင်းပြည်နယ်နဲ့ ဆက်နေတဲ့နေရာဒေသတေမှာ စားကြတယ်။ အင်ဒိုနီးရှားနဲ့ အိန္ဒိယမှာလည်းစားသုံးကြတယ်။

ရုက္ခဗေဒလို Parkia speciose လို့ခေါ်တယ်။ အပင်က ပေ ၉ဝ အထိမြင့်တယ်။ မျောက်ငိုသီးတောင့်က အပြားလိုက် လိမ်ကောက်နေတယ်။ အစိမ်းနု-ရင့်အရောင်ရှိတယ်။ အဆစ်လေးတွေပါတယ်။ တဆစ်မှာ အစေ့တစေ့။ တတောင့်မှာ ၇ စေ့၊ ၈ စေ့ပါတယ်။

အနံ့က တညင်းသီးနံ့လိုရတယ်။ အရသာက ဖန်တယ်။ ဆိမ့်တယ်။ အနောက်ဖက်နယ်စပ်ဖြတ်ရင် မြောက်ဖက်က နာဂ၊ အလယ်က မဏိပူနဲ့ တောင်ဖက်က မီဇိုရမ်နဲ့ ထရီပူရပြည်နယ်ကလူတွေ စားကြတယ်။ မီဇိုးစကားနဲ့ Zongtah ဇောင်းသလို့ ခေါ်တယ်။ မြန်မာလို မျောက်ငိုတဲ့။

အနံ့ပြင်းတယ်။ မကြိုက်တဲ့သူတွေ မကြိုက်။ ကြိုက်တဲ့သူတွေက စွဲမက်ကြတယ်။ စားတဲ့နေ့ ရေများများသောက်သင့်တယ်။
နုတာကို အစိမ်းလည်းစားလို့ရတယ်။ အမျိုးစုက အဲလိုမစားနိုင်ကြပါ။

လုပ်စားနည်း အမျိုးမျိုးရှိတယ်။ သိသလောက် အတောင့်ရှည်အပေါ်ယံအခွံကို ဇွန်းနဲ့ခြစ်လိုက်ရတယ်။ တချို့နေရာတွေမှာ ခြစ်စရာကရိယာလေး လုပ်ထားကြတယ်။ အတွင်းအသားကိုသာ စားရတယ်။ ရေနွေးဖျောရတယ်။ ပါးပါးလှီးဖြတ်ပြီး အငန်နဲ့ တို့စားနိုင်တယ်။ ချက်တာ မစားဖူးသေးပါ။ ရင့်နေရင် အစေ့သက်သက်စားကြတယ်။

အများဆုံးက သုပ်စားကြတယ်။ ကိုယ်နှစ်သက်တာ ထည့်ကြတယ်။ အစပ်ပါမှ အရသာစုံတယ်။ မီဇိုငရုပ်၊ မိုးမျှော်ငရုပ်နဲ့ လိုက်တယ်။ မဏီပူ Eromba အိတုန်ပတ်ထဲမှာ ရွှေလံဘိုငရုပ်နဲ့ ထည့်စားကြတယ်။ နာဂတွေလည်း အဲလိုစားကြတယ်။ ကျွန်တော်လို ဗမာတွေကတော့ ကောင်းတာဆို အကုန်လိုက်စားကြတယ်။

ဒေါက်တာတင့်ဆွေ
၎-၇-၂ဝ၁၇
ည ဝဝ နာရီ၊ ၁၂ မိနစ်။