Panton Aceh | Bateu Pahala Puasa

Assamualaikum mandum sahabat
Seleum lon intat keu mandum gata
Ta suot saleum laju beu leugat
Timu ngen barat mandum seureuta

Deungon Bismillah lon peu phoen kalam
Ta pujoe Tuhan sidroe nyan Esa
Seulaweut saleum keu janjongan
Pang ule alam ban sigoem donya

Ujong Aceh na pulo sabang
Ngen pemandangan indah lagoina
Bateu pahala puasa jinoe lon karang
Deungoe hai rakan tuha ngen muda

Bek ta seumulet bak bulan suci
Harta nyan hana kri bek tayoe raba
Peugah haba beu hati - hati
Mue sumpah palsu bek roeh bak gata

Nye di Tangse na paya guci
Paya nyan sunyi sepi lagoina
Bek ta ta meu upat bak bulan suci
Ingat hai abi tuha ngen muda

Ta jak ubanda ta lewat Sigli
Keuripet boh ubi di Saree teuma
Buat adu domba nyan lom hai abi
Bak bulan suci bek roeh keurija

Dimulot tiwah dicoeng bak giri
Simirah pati di dalam cintra
Ta jaga mata bak bulan suci
Keu dara tari nafsu bek neuba

Taloe bineh glee di buka jalan
Taloe bineh blang ureung seumula
Nye meujunub di beuleun ramadhan
Manoe beu awai bek gadoeh pahala puasa

Dimusue musang oeh malam sunyi
Sue adi - adi oeh watee sinja
Meumada oeh noe haba lon rawi
Samboeng keulai bak kontes @sogata

Gadoh aneuk meupat jrat, gadoh adat hana pat tamita.

---

Sabang, 26 Mei 2018

---