Nazam " iqra' "

Assalamu'alaikum warahmatullah..
Poma ngon ayah bandum syedara..
Samboet saleum lon sion keureutah..
Saleum mahabbah hate lam dada..

Alhamdulillah segala puji..
Ta pujoe rabbi yang maha esa..
Selaweut saleum tajunjong tinggi..
Kepada nabi saidil Ambiya..

Kru seumangat rahmat meukuyan..
Karonya tuhan keutanyoe hamba..
Ta lake do'a uroe ngoen malam..
Beu sehat badan panyang usia..

Haba lon tuleh lam bentuk nazam..
Saboh karangan tentang pustaka..
Mari geutanyoe hai muda seudang..
Inong ngon agam beule membaca..

Meunyoe na kasus ngoen kejadian..
Tanyoe arsipkan simpanan data..
Bukti seujarah untuk saboh jan..
Soe tu'oh kadang lagee nyang ka-ka..

Di Nanggroe idi Keude geureubak..
Kota Peureulak goh trok u langsa..
Meunyoe jroh budi goet deungon akhlak..
Beurangaho tajak tuhan peulara..

Dalam Al-Qur'an surat Al-'Alaq..
Perintah iqra' dilee phon mula..
Allah neuseru hamba yang bijak..
Teuntee nyang galak tamong pustaka..

Sinan leu buku teuduk ateuh rak..
Geutanyoe ajak aneuk sikula..
Para mahasiswa moto penggerak..
Keubit lom ramphak kaum remaja..

Subhanallah wa bihamdihi..
Maha suci allah ta'ala..
Aceh beucaroeng ya allah neubri..
Beu bekna korupsi Baroe damai sejahtera..

Mari hai Rakan muda ngon mudi..
Ta peule ileume deungon tajak bak pustaka..
Seujarah aceh tateula'ah keulayi..
Pane ta teupu meunyoe hana ta baca..