Meukeusud kata "That" ngon "Tuloe" nyang meutajo lam bahsa Aceh

Sumber gambar

Hoe teuh dum! Peu na ujeun inan? Kiban keadaan, peu sehat atawa saket. Peu ka ciret Atawa ka meuputa-puta?? Tenang rakan, hudep nyoe geupeugah le ureung tuha memang beuna phet, beuna mameh, beuna sehat, beuna saket. Nyoe hana neu mita. Pokok jih beuna. Peu teuma yang na nyan?? Hom, peu-peu nyang hana, neu peuna laju! Nyoe kira-kira hana mameh neuboh saka. Sangkira hana phet, neu mita gue-gue putek, neu inthee bak muka, phet keudroe ih. Pokok jih tanyoe beu sep syarat ta meu udep. Beuthat di kira le gop leh kiban-kiban, bah ikeudeh. Pat ek tajak pike gop seumike. Meu ulee droe teuh han ek tapike.

Nibak uroe yang meubahgia nyoe, ilong keuneuk peugah tentang maksud lam bahasa Aceh, yang seureng geupakek bak ujong atawa bak kata-kata phon. Miseu kata "That". Teuma, ureung seureng berlebihan watee geu peunyum perangui ureung ngen tambahan kata-kata nyan. Padahai ladom hana payah pakek"That", tapi ka geu boh laju. That na neu kira laju..

Miseu yang kayeem ta deungo"Si Gam nyan that brok akai jih". Padahai be oek sagai brok. Meuseubab ka geupakek "that", ka brat deuh brok. Nyan ban neukira laju. Ilong han ek kukira. Contoh laen "kriet that, lagak that, that bakai, that itam, that kuneng igoe ih, that le glum, that le ok puteh, that meube geutiek, ramee that ureung, mangat that, meunyakni that, klo that, meu ineng that, meu agam that, ku'eh that, dan Le that-that yang laen yang hana geu kira-kira, dan sipadan ngen maksud jih. Pokok jih abeh geu peu "That-that gob. Padahai hana payah boh that saree.

Kata-kata that nyan karap sama ngen kata "Tuloe". Miseu jih na ureung kheun "supot tuloe, masam tuloe, kriet tuloe, klo tuloe, kuto tuloe, trok bak timphan na tuloe". Man tuloe nyan, nyoe geu tamah "Asee" brat lom serius jih. Miseu "kriet tuloe asee, bangai tuloe asee". Han ek takhem pokok jih nyoe na geusadeu asee bak ujong kata "tuloe" nyan.

Yang perle ku peugah nah, (sebetoi jih nyoe hana perle-perle that sit), tanyoe bek leubeh-leubeh that ta boh nyum gob. Bek meu tuloe asee that sit. That na teuh, lheuh ku pike-pike memang lam bahasa aceh payah that ta hindari kata-kata nyan. Hana mangat abah teuh nyoe hana ta boh kata-kata nyan memang. Ka keuhlah ilong eh noe ile kupeh tem beh. Singeh nyoe na umu panyang, ku peh beu simban, dua blah pah.

(Saleum keukarah, beurakah beuraya-raya🤴🤴)