පාළුව තනිකම මකන්නා | 5% for SL-Charity

කොහොමද යාලුවනේ මම හිතනවා ඔයාලා හැමෝම හොඳින් ඇති කියලා. කොරෝනා වසංගතය ක්රමයෙන් අඩු වෙමින් පැවතුනත් හැමෝම තවමත් ගොඩක් පරිස්සමින් සිටිය යුතු කාලයකි. සෞඛය උපදෙස් වලට අනුව වැඩ කරොත් අපිට මේ වසංගතය තුරන් කර දාන්න පුළුවන්.
මෙම වසංගතයක් සමග ගොඩක් අයට රාජකාරි කිරීමට සිදුවූයේ තමන්ගේ නිවෙස් වලයි. මාත් මුලින්ම lockdown කාලයේ නිවසේ සිට වැඩ කලත් සමහර අවස්ථාවලදී මට බෝඩිමේ ද වැඩ කිරීමට සිදු වුණා. ඇත්තටම ඒ විදිහට තනියම වැඩ කරන එක නම් ගොඩක් අමාරුයි. මනසටත් ලොකු වදයක. ගෙදර හිටියනම් මිදුලේ ටිකක් ඇවිදලා වත්ත වටේ පොඩ්ඩක් ගියානම් හරිම සැහැල්ලුවක් දැනෙනවා. ඒත් ඉතින් මේ බෝඩිම් වල ඉන්නකොට එහෙම ඇවිදින්නවත් තැනක් නෑනේ. අන්න ඒ වෙලාවට තමයි මාත් එක්ක මගේ බෝඩිමේ මගේ ලඟින්ම ඉන්න කෙනා මගේ පාළුව මකන්නේ. එය තමයි මගේ ගිටාර් එක.

මම හිතන විදියට සංගීතය කියන්නේ ගොඩක් අය ආස කරන දෙයක්.මාත් ගොඩක් කැමති දෙයක් තමයි සංගීතය. සමහර වෙලාවට ඒක භාවනාවක් වගේ. හිත එක තැනක තියාගෙන අහන් ඉන්න පුලුවන්. වැඩ කරන වෙලාවට තියෙන stress එක නැති කරගන්නත් හොඳම දෙයක් තමයි ඒක. සංගීතය රස විඳින්න ආස උනත් මම කවදාවත් සංගීතය හදාරලා තිබුණේ නෑ. ඒත් මට පොඩි කාලේ ඉඳලා ලොකු ආසාවක් තිබුණා ගිටාර් එකක් play කරන්න. ඒක ඉස්සර නම් මගේ ආසාවක් විතරක් වෙලාම තිබ්බා. මොකද මට ගිටාර් එක play කරන්න තියා අල්ලන්නවත් ගිටාර් එකක් තිබ්බේ නෑ.කොහොමහරි කැම්පස් ආවට පස්සේ අපි නැවතිලා හිටපු බෝඩිමේ ගිටාර් play පුළුවන් දෙන්නෙක්ම හිටියා. එයාලා නම් ඒ කාලේ ගිටාර් එක ප්ලේ කරන්නේ තමන්ගෙ ඇඟෙන් කෑල්ලක් වගේ. හරිම පහසුවෙන් play කරනවා. ඉතින් මාත් හිතුවේ මටත් ඒක එහෙම වෙයි කියලා.

එහෙම හිතලා මමත් ගිටාර් එක ප්ලේ කරන්න පුරුදු වෙන්න ගත්තා. මුලින්ම ගත්ත ගමන් නම් හිතුනේ මේක නම් කවදාවත් පුරුදු වෙන්න බැරි එකක් කියලා. ඒ දවස් වල නම් විනාඩි පහක්වත් ගිටාරයක practice කරන්න බෑ. ඇඟිලි ටික රිදෙනවා. එහෙත් කොහොමහරි මට හොඳ ගුරුතුමෙක් හම්බවුණා. ගුරුතුමෙක් කිව්වට එයා අපේම බෝඩිමේ යාළුවෙක්. බැන බැන කියලා දුන්නා කොහොමද මේක පුරුදු වෙන්නෙ කියලා. කොහොමහරි අන්තිමට පොඩියට සිංදුවක් ගහන්න පුළුවන් විදියට මම ඒක පුරුදු වුණා. දැන් කොහොමහරි මට කෝඩ් ටික අල්ලලා සින්දුවක් play කරගන්න පුළුවන්. මමත් මේක පුරුදු වුණා කියන්නේ ආසාව තියෙන ඕන කෙනෙක්ට මේක පුරුදු වෙන්න පුළුවන්😜. අන්තිමට කැම්පස් එකේ තිබ්බ ඉවෙන්ට් එකකත් මට ගිටාර් එක ප්ලේ කරන්න පුළුවන් වුණා.

කොහොමහරි දැන් නම් මං තනියම ඉන්න වෙලාවට මගේ පාලුව තනිකම මැකෙන්න සිංදුවක් කියලා ඉන්නවා. ඒකට මගේ ගිටාර් එක බෑ නොකියා හැම වෙලාවෙම මාත් එක්කම ඉන්නවා.මම හිතනවා හැමෝටම මට වගේහිත පොඩ්ඩක් සැහැල්ලු කරගන්න පාළුව තනිකම මකා ගන්න මොනව හරි ඇති කියලා.
ස්තුතියි..!!