පරිනත වූ මොහොතක්

අද මගේ ලොකු පුතාගේ උපන් දිනේ. එයා විවාහ වුණාට පස්සේ උදාවන පළමු උපන් දිනේ. ගෙදර ඉන්න කලේ නම් මම හොරෙන් මොනවා හරි ගෙනත් තියල කාඩ් එකකුත් හදලා එයා උදේ නැගිටලා ඉස්සෙල්ලාම යන තැන බලලා තෑග්ග සහ කාඩ් එක තියනවා. එතකොට එයාල ඒවා දකිනවා. මගේ උපන් දිනේටත් එයාල එහෙම තමා කරන්නේ. මම නිදා ගන්න කන් ඉදල මහා රෑ නැගිටලා කුස්සියේ රයිස් කුකර් එක ලගින් තෑගියි කාඩුයි තියල තියනවා. ඉතින් මම උදේ නැගිටලා උයන්න කුස්සියට ගියාම තමා මේවා දකින්නේ.

පුතාල අවුරුදු පහක් වෙනකම් විතරයි මම එයාලගේ උපන් දිනේට කේක් කපල උත්සවයක් ගත්තේ. ඊට පස්සේ හැම උපන් දිනේකටම තෑගි සහ කාඩ් දුන්න එක විතරයි කලේ. මොකද මම office යද්දී මට ඒවා කරන්න වෙලා තිබුනේ නෑ. හැබයි හැම උපන් දිනේකටම එයාලව රාත්‍රියට පන්සල් එක්කන් ගියා

ඒත් දැන් එයාල ඉන්නේ වෙනම ගෙදරක. ඒ නිසා මට පුදුම කරවන්න බැරිව යනවා. කෝකටත් කියල මම තෑග්ගකුත් අරගෙන කාඩ් එකකුත් හැදුව. මල්ලිත් කඩේ ගිහින් මොනවාද ගෙනාව . මම දැක්කා ඒක පාර්සල් කරනවා.

මම දුවගෙන් ඇහුව මොකද කරන්නේ කියල. එයා කීව අම්ම මම රෑ 12.00 ට නැගිටලා කේක් කපන්නයි හිතාන ඉන්නේ කියල. මටත් කීව පුළුවන්නම් අපිටත් රෑ 12.00 ට එයාලගේ ගෙදරට එන්න කියල. අපේ ගෙදර ඉදල වැඩි ඈතක නෙමේ පුතාගේ ගේ තියෙන්නේ. හරියටම ගෙවල් තුනකට කලින් එකම ලේන් එකේ. මමත් කීව එහෙනම් අපි එන්නම් කියල.

දුව අපේ චූටි පුතාට කියල කේක් එකක් ඕඩර් කරලා අපේ prige එකේම හංගල තිබ්බ. බැලුන් ටිකකුත් ගෙන්න ගත්ත. දුව කීව එය කිවම කේක් අරන් එන්න කියල.

ඉතින් ඒ විදියට පුතාට හොරෙන් කතා වෙලා අද පාන්දර 12.00 වෙද්දී කේක් එකත් අරන් අපි තුන්දෙනා එයාලගේ ගෙදරට ගියා. දුව message කරාම තමා අපි ගියේ. අපි යද්දී පුතා හොදටම ගොරෝ ගොරෝ නිදි. දුව බැලුන් බෝල පුම්බල සෙටිය වටේ දාල තිබුණ. ඉතින් අපි කේක් එකත් අරන් හතර දෙනාම එයාගේ ඇද වට කරගෙන happy birth day සිංදුව කියද්දී තමා එයා නැගිට්ටේ. පස්සේ නිදිමරගතෙම සෙටිය ලගට ඇවිත් කේක් එක කපල උපන් දිනේ සමරුව. අපි ගෙනාපු තෑගිත් දීල කේක් කාල තේත් බිල ගෙදර ආව.

ස්තුතියි