මතකයෙන් බිදක් | සොඳුරු මනාළිය

මගේ පරණ ෆොටෝ අතර දෙනෙත් දුව යන මොහොතේ අහම්බෙන් වගේ මගේ නෙත ගැටුන ඒ ෆොටෝ ටික මාව ගොඩාක් දුරකට රැගෙන ගියා කීවොත් නිවැරදියි. කාල සීමාව මගේ මතකයට අනුව 2020 අවුරුද්ද. Corona ලංකාවට එන්න මාස කීපයකට කලින්.

Source

මගේ office කාර්යමණ්ඩලයට පාලනාධිකාරිය විසින් නා නා විදියේ වැඩමුළු සංවිධානය කරනවා. මේ වගේ වැඩ මුළු නිතර නිතර සංවිධානය කරන එක මගේ පාලනාධිකාරියේ එක වගකීමක්. වෙනද වගේ මෙදාත් එවැනි වැඩ මුළුවක් සංවිධානය කෙරුණා. මෙවර ස්ථානය ලෙස තෝරා ගෙන තිබුණේ Avani Hotel, කළුතර. හරිම ලස්සන හොටෙල් එකක්. හොටෙල් එකට එහා පැත්තේ මුහුද. කෑම බීමත් ඉහල මට්ටමක තිබුණ. ගාන සැර වැඩි වුණත් අපට ලැබුන පහසුකම් නම් හරිම ඉහලයි. සියළු වියදම් දරන්නේ office එකෙන්.

මේ වැඩ මුළුවේදී සිද්ද වෙන්නේ team work concept එක ඉහල ගැන්වීම සහ අභියෝග වලට මුහුණ දෙන ආකාරය ගැන කාර්ය මණ්ඩලයට මනා පුහුණුවක් ලබා දීම. ඉතින් වැඩ මුළුව පුරා තියෙන්නේ නොයෙකුත් අභියෝග සහ කණ්ඩායම් වැඩ.

මේ සදහා කළමණාකරුවන් කීප දෙනෙකුගෙන් සමන්විත කොමිටියක් පත් කරලා තියනවා වැඩමුළුව සහ වැඩ මුළුවේ එක එක අභියෝග සහ කණ්ඩායම් තරඟ සංවිධානය කරන්න. මමත් මේ කොමිටියේ සාමාජිකාවක් ලෙස මටත් තිබුණ මොකක් හෝ අභියෝගයක් නිර්මාණය කරන්න.

මම නිර්මාණය කරපු අභියෝගයේ ෆොටෝ තමා අද මගේ නෙත ගැටුනේ.

මම ඔයාලට කියන්නම් මොකක්ද තරඟය කියල. කාර්ය මණ්ඩලය සමාන කොටස් හතරකට බෙදල එක් කණ්ඩායමකට පත්තර මිටියක් සහ ගම් බෝතලයක් ලබා දෙනවා. කණ්ඩායමේ සාමාජික සාමාජිකාවන්ට තියෙන්නේ අර පත්තර ඇති ප්‍රමානයක් ප්‍රයෝජනයට අරගෙන නිශ්චිත කාල සීමාවක් තුල එක මනාළියක් හැඩ කිරීමයි.

කණ්ඩායම් හැමෝම හරිම උද්යෝගයෙන් හා උනන්දුවෙන් තම කණ්ඩායමේ මනාළිය නිර්මාණය කිරීම ආරම්භ කලා. හැම තරඟයකටම ලකුණු ලබා දීල වැඩ මුළුව අවසානයේ දක්ෂතම කණ්ඩායම නම් කරල ත්‍යාග ලබා දී ඇඟයීමත් සිදු වෙනවා.

මේක හරිම විනෝද ජනකයි. ඒ තරඟයේ හැඩ කරන මනාළියන්ගේ ෆොටෝ තමයි මම අද ඔයාල එක්ක බෙදා ගත්තේ. අපි හිතුවට වඩා කණ්ඩායම් හරිම නිර්මාණශීලියි. බලන්න එයාලගේ දක්ෂතාවය. මෙතනදී අපිට මෙවැනි නිර්මාණශීලි සේවකයින් හදුනාගෙන අපේ කාර්යාලය සංවිධානය කරන අනෙකුත් උත්සව වලදී ඔවුන්ගේ සහය ලබා ගැනීමටත් අපිට හැකිවුණා.

ඒකාකාරී කාර්යාල ජිවිතයට නව පණක් ලබා දීමත් මේ තුලින් ඉටු වෙනවා. ඉතින් මම හිතනවා කාර්යාලයක් ඒ කාර්යාලයේ සේවකයන්ගේ කාර්යක්ෂම තාවය නන්වාලීමට මෙවැනි වැඩ මුළු සහ සම්මන්ත්‍රණ පවත්වනවා නම් කාර්යාලයේ දියණුවට එය උපකාරී වෙනවා කියල. සේවකයන්ගේ එකමුතු බව, නිර්මාණශීලි බව, කණ්ඩායම් හැඟීම, අභියෝග ජය ගැනීම වැනි කාරණා වැඩි දියුණු වීම මගින් කාර්යාලයේ ඵලදායිතාවය ඉහල නැන්විමක්ද ඒ මගින් සිදු වෙනවා.

ඉතින් මේ ෆොටෝ ටික මාව අතීතයට රැගෙන ගිහින් ඒ ලබා දුන් ආශ්වාදය මට කියා නිම කල නොහැකියි. ඒ සොඳුරු කාලය නැවත උදා වෙනවා නම් කියල හිතුන.

ස්තුතියි.