ජීවිතයට ඔවදනක්

අපි හැමෝම ගැහැණු හෝ පිරිමි වේවා දවසක කුස්සියට ගිහින් පොඩි පොඩි කෑම ජාතියක් හදා ගෙන කන්න වෙනවා. දුවෙක් වේවා පුතෙක් වේවා අම්ම අසනීප වුණ දවසට කුස්සියට ගිහින් තමන්ගේ සහ ගෙදර අනෙක් අයගේ කෑම ටික හදන්න වෙනවා නැත්නම් උදව් වෙන්න වෙනවා. ඉතින් එහෙම වෙලාවක කුස්සියේදී පාවිච්චි කරන්න පුළුවන් වටිනා උපදෙස් ටිකක් ඔයාලට දැන ගන්න සලස්වන්නයි අද මම සූදානම් වෙන්නේ.

_{Image Source}

මූලික වශයෙන් පිරිසිදු කම අංක එක කියල හිතල වැඩ කරන්න. අපි හාල් ටික වේවා එළවළු ටික, මස් මාළු ටික වේවා හොදින් හෝදලා උයන්න ගන්න. සහල් විශේෂයි. ඔය සහල් හරියට මෝල් වලදී කකුල් වලට පෑගෙනාව කියල හාල් මෝලක වැඩ කරපු මම දන්නා කෙනෙක් කීව. ඒ නිසා උයන්න කලින් ඒවා හොදට හෝදන්න. එළවලු වල එහෙම ගොඩක් මඩ අස්සේ හැංගිලා තියනවා. ඉතින් ඒවා හොදට නොසේදුවොත් අපේ සනීපාරක්ෂාවට බලපානව.

හාල් මැස්සෝ උයන්න ගද්දි ඒවායේ බොකු අයින් වෙන විදියට ඔළුව කඩන්න ඕනි, නැත්නම් හාල් මැස්සෝ ඉව්වම තිත්ත රසක් එනව. ඒ වගේම තමා හාල් මැස්සෝ හොදට හෙදුනේ නැතිවම අමුතු පාණ්ඩු රසක් දැනෙනවා. ඒ නිසා ඒවා හොදට හෝදන්න ඕනි.

ඊලග එක තමා ළුණු ශුද්ධ කරද්දී ළුණු තෙමන්න කලින් ඒවායේ අග සහ මුල කපල පොත්ත ඉවත් කරලා වතුරට දාන්න. ඒ ක්‍රමයට කරපුවම ළුණු වල පොත්ත අරින්න හරිම පහසුයි. බී ළුණුත් එහෙම තමා. සුදු ළුණු පොතු අරින එක ටිකක් වදයක් වගේ නේද? වැඩේ ටිකක් අමාරුයි වගේනෙ. එහෙම නැහැ සුදු ළුණු ගෙඩියේ මුල වගේ පැත්ත උඩින් තද කරපුවම ඉකමනින් බික් ගැලවෙනවා. ඊට පස්සේ ඒ මුල වගේ පැත්තෙන් මුල හරිය පළමුවෙන්ම ඉවත් කර ගත්තම සුදු ළුණු ගෙඩිය හොදින් පොතු ඉවත් වෙනවා. අනික තමා සුදු ළුණු හොදිවලට දාද්දි කවදාවත් පිහියෙන් කපල දාන්න එපා. සුදු ළුණු ගෙඩියේ ගුණය සහ රසය සුවද රැකෙන්නේ ඒක තලලා කෑම වලට එක් කරපුවම තමා.

ඊළඟ කාරණය අල ශුද්ධ කරන කොටත් අල ගෙඩිය තෙමන්නේ නැතිව ශුද්ධ කරන්න. එතකොට අල ගෙඩියේ පොතු අරින්න හරිම ලේසියි. ඒ වගේම තමා ඔයාල අල තම්බද්දී පොත්ත පිටින් හෝදලා අල තම්බන්න. මම දැකල තියනවා සමහරු අල ගෙඩියේ කුරුට්ට ඇරලා අල තම්බනවා. එතකොට මොකද වෙන්නේ දනන්වද අල ගෙඩියේ තියන පෝෂණ පදාර්ථය අල තම්බන වතුරට එකතු වෙනව ලේසියෙන්ම.

තව එකක් තමා ඔයාල අල, බිත්තර, බතල වගේ තම්බද්දී බත උයද්දී රයිස් කුකුර් එකේ ස්ටිමර් එක උඩ තියල තම්බ ගන්න. ඒකෙන් ඔයාට ගෑස් ඉතිරි කර ගන්න පුළුවන්. ඒ වගේම කාලය ඉතිරි කරගන්නත් පුළුවන්.

ඒ විතරක් නෙමේ කැන්ද කොළ ඒ කියන්නේ හැලප වගේ දෙයක් කලින් පිළියල කරලා තියාන ඉදල බත උයාගන්න වෙලාවට ඒක උඩින් ස්ටීමර් එක තියල ඒකට හැලප ටික දාල තම්බා ගන්නත් පුළුවන්. මම නම් මුං ඇට වගේ දේවලුත් තියල තම්බා ගන්නවා.

ඒ වගේම උයල ඉවර වුණ ගමන්ම ඔයාල පාවිච්චි කරපු භාණ්ඩ හෝදලා පිහ දාල අරන් තියන්නත් අමතක කරන්න එපා. ඒ වෙලාවටම කුස්සියත් පිරිසිදු කරලා දාන්න. මේ වගේ ඒවා පුරුදු උනාම ඔයාලට නොදැනීම ඒ වැඩ සිද්ද වෙනවා. ඒ නිසා ඒ වගේ හැම හොද වැඩක්ම පුරුද්දක් කර ගන්න. පුරුද්දක් කර ගත්තම අපිට ඒවා අපිටම නොදැනී කෙරෙනවා. දැන් බලන්න අපි උදේට දත් මැදල මුහුණ හෝදන්නේ පුරුද්ද නිසානේ. ඒ වගේ තමා කුස්සිය උයල ඉවර වුණ ගමන් අස් කරලා දාන්න.

- ස්තුතියි -