මගේ කිරි අල අස්වැන්න

ස්වාභාවික පරිසරයට මනා ලැදියාවක් දැක්වූ ශ්‍රී ලංකාවේ ආදී ගම් වැසියන්ගේ ආහාර වේල සපයා ගනු ලැබුවේ අවට පරිසරයෙනි. මෙසේ අවට පරිසරයෙන් සරි කරගත් ආහාරයට පලා වර්ග මෙන්ම අල වර්ගද ඇතුලත්වේ. ඔවුන් වැසි සමය අලලා අල වර්ග සිටුවා නිසි කල ඒවා උගුල්ලා ගෙන අවට ගම වැසියන් සමග අල සහ කොළ බෝග හුවමාරු කර ගැනුණි.

Image source

එහෙත් අද වන විට විවිධ හේතුන් මත දේශීය අලවර්ග භාවිතයෙන් මෙන්ම පරිසරයෙන්ද ඉවත්ව යාමේ ප්‍රවනතාවක් දක්නට තිබේ. විවුර්ත ආර්ථික ප්‍රතිපත්තියත් සමග දේශීය ආහාර වලින් ඈත්වූ මිනිසා ක්‍රමයෙන් බටහිර ක්ෂණික ආහාර වලට පුරුදු වීමත්, ගොඩ මඩ ඉඩම් කට්ටි නාගරීකරණය වීමත්, තිබෙන ඉඩ කඩේ පවා යමක් හිටුවා ගැනීමට මිනිසා දක්වන කම්මැලි කමත් සමග මෙවැනි දේශීය ආහාර අපෙන් ඈත්ව ගොස් තිබුණි.

අල යනු අඩු ඉඩ කඩක පවා වගා කල හැකි, ජලය ඉතා අඩුවෙන් අවශ්‍ය, කාබණික පොහොර පමණක් යොදා ගෙන, අඩු ශ්‍රමයකින් වැඩි ඵලදාවක් ලැබිය හැකි බෝගයකි. සෑම අල වර්ගයකම පිෂ්ඨය 60% පමණ ඇති අතර විශේෂයෙන්ම අපේ ශරීරයේ වැඩීමට අත්‍යවශ්‍ය ප්‍රෝටිනයක් වන ඇමයිනෝ අම්ලද වැඩි ප්‍රමාණයක් අඩංගු මෙම අල ශක්ති ජනක ආහාරයක් ලෙස නම් කල හැකිය.

එහෙත් අපෙන් යම් ප්‍රමාණයකට ඈත්ව ගොස් තිබු මෙම අල බෝග වගාව පසු ගිය කාලයේ ඇතිවූ ආර්ථික අවපාතයත් සමග වඩා ප්‍රචලිත වීමට පටන් ගත්හ. එදා ක්ෂණික ආහාර වලට පුරුදු වූවන් අද ආර්ථික උද්ධමනයත් සමග මෙවැනි පහසු බෝගයයක් තම නිවෙස්වල කුඩා ඉඩ ප්‍රමාණයේ පවා සිටුවා ගැනීමට උනන්දු විය.

මෙවැනි වගාවට යොමු වූ මමද, මාගේ බෝග වලින් උපරිම ඵල නෙලා ගත්තෙකි. අද දින මෙසේ වගා කරගත් කිරි අල ගස් හතරකින් එකක් ගලවා ගැනීමට මට අවස්ථාව උද විය. කියන්නටත් සතුටුයි. ගස හොදට වැඩි ඇති අයුරින්ම ඵලදාවද එලෙසම දැක ගත හැකි විය. මෙවැනිම ගස් තුනක් තවත් ඉතිරිව ඇති අතර එය මතු දිනක ප්‍රයෝජනයට තබා එක ගසකින් සෑහීමට පත් වීමට මම උත්සුක වීමි.

ඔබ සැමගේ දැක ගැනීමටත්, ඔබවද මෙවන් වගාවන් කෙරෙහි යොමු කරවීමේ අරමුණද ඇතිව, මා ලබා ගත් අස්වැන්නේ චායරුපයක් ඔබ සමග බෙදා ගනිමි. මෙතරම් ප්‍රමාණයක් අපට වැඩි බැවින් අසල් වැසියන්ටද බෙදා දී මගේ සතුටු ළිද පුරවා ගනිමි.

ස්තුතියි.