ඕලු | 5% to SL Charity

පෝච්චිය හැදුවෙ නෙළුම් පැළ කරන්න වුණාට වෙච්ච අකරතැබ්බයක් නිසා නෙළුම් පැළ හිටවන්න වුණේ නෑ. මොනව වුණාම මොකද මල් පිපෙනවා නම් කියල හිතපු මම ලේසියෙන්ම හොයගන්න පුළුවන් ඕලු පැළයක් හිටවන්න අන්තිමටම තීරණය කරා. ඕලු පැළයක් හොයාගන්න ඕන නම් යන්න ඕන පහළ ගඟ පැත්තට. එතන ඕලු තියෙනවා. රතු ඕලු නම් නෙවෙයි. සුදු පාට පෙති තියෙන, කහ පාට රේණු තියෙන පොඩි මල් පිපෙන ඕලු.

මං ළඟ කලින් ගනිපු ඵොටෝ එකක් තිබ්බා වගේ මතකයි. මේ තියෙන්නෙ. මෙන්න මේ මල ගැන තමයි මං කිව්වෙ. නෙලුම් තරම් නොවුණත් මේ මලත් ලස්සනයි. ලා පාට නිසා හරි පිං පාටයි. නිවිච්ච පාටයි. ඉතින් ඕලු පැලයක් ගලවන් එන රාජකාරිය මං තාත්තටයි මල්ලිටයි බාර කරා. මල්ලි නම් පෝච්චිය හදන්න කලින් ඉඳන්ම වදේ පැල ගලවන්න යන්න. තාත්තා වැඩේට කැමති වුණේ ඔක්කොම ඉවර වුණාට පස්සේ.

රසීටත් පැළයක් ඕන කිව්ව නිසා මං කිව්වා පැළ දෙකක් ගළවන් එන්න කියල. ඕලු පැළ දෙකක් ගළවන් එන්න යවපු දෙන්න, ඕලු පැළ 4ක් විතරයි, කිරල ගෙඩි ගොඩකුයිත් අහුලන් ඇවිත් තිබුණා. කිරල දැකපු පාර ඕලු හිටවන එක අමතක වෙලා, කිරල හදන් බිව්වටත් පස්සෙ තමයි මල් පැළ ටික හිටව්වේ.

මුලින්ම හොයාගත්තා මැටි භාජන ටිකක්. පරණ කිරි හට්ටි ටිකක් තමයි ගත්තේ. ඊට පස්සෙ පැළේ තියල ටිකක් මඩ වගේ තැනකින් ගත්ත පස් ටිකකුත් දැම්මා. ගෙනාපු පැළවලත් මඩ ටිකක් තිබුණ. ඒ මඩ තමයි මේ වැඩේට හොඳම. ඒත් ඒ තිබ්බ ටික මදි නිසා පස් ටිකක් දාන්න වුණා.

අපේ ගෙදර හදපු පෝච්චියට අමතරව තව බිම හදපු පොඩි පොකුණු දෙකක් තියෙනවා. ඒ වගෙ කලින් නම් තිබුනේ ඕලු හා කුමුදු මල්. දැන් නම් ආසාවට කුමුදු මලක් දකින්නවත් නෑ. ඒ නිසා ඒ දෙකටත් පැළ දෙකක් වෙන් කරන්න තීරණය කරා. වැඩේට නම් ගොඩක් වෙලා ගියේ නෑ.

පැළ ටික පෝච්චිවලින් තිබ්බට පස්සෙ, අලුත් පෝච්චියට මාලු ජෝඩුවක් දාන්නත් අමතක කරේ නෑ. නැත්නම් ඕවගෙ මදුරු පණුවෝ හැදිලා හරි කරදරයක් වෙනවා. කඩෙන් මාලු ගේනව වගේ නෙවෙයි මල්ලිගෙන් මලු ඉල්ලන එක. හරි අමාරුවෙන් සද්දෙකුත් දාලා තමයි මාලු දෙන්න අරගත්තෙ.

දැන් ඔක්කොම හරි. බලන් ඉන්න තියෙන්නෙ අර පැළේ තිබ්බ මල් පොහොට්ටුව පිපෙනකන් තමයි. 😍