50 වන වරටත් අපේ පන්සලේ පොසොන් පෙරහැර 🙏
කොහොමහරි ඒ අතරෙ තමයි පොසොන් පොහොය ලැබුවේ.
පොසොන් පොහොය කියන්නේ අලුත්වල අපේ ගමේ අයට නම් විශේෂ පොහොයක්. හැම වසරකම අපේ ගමේ පන්සලේ පෙරහැර පවත්වන්නේ පොසොන් පෝයට. ගියවර අවුරුදු කීපයකට පස්සෙ තමයි මටත් පෙරහැර බලන්න යන්න ලැබුනේ. එදා රන්දුලත් , මල්ලිත් පෙරහැර බලන්න යන්න ආව නිසා මට තවත් විශේෂ උනා. මේ සැරේ අපේ පෙරහැර තවත් විශේෂ උනේ මේ පෙරහැර 50 වැනි මිහිඳු පූජා මහා පෙරහැර වීම නිසා. ඒ නිසා ම බොහෝ කාලයක් තිස්සේ මේ සඳහා ගමේ සියලු දෙනාම ලොකු වෙහෙසක් දැක්වූවා.
සාමාන්යයෙන් අපේ පන්සලේ පෙරහැර තියෙන්නෙ දවල් කාලයේ. ඒත් මෙවර දවල් පෙරහැර වගේ ම රාත්රි පෙරහැර ත් අති උත්කර්ෂවත් ලෙස තිබුනා.
පොඩි පොද වැස්සක් තිබුන නිසාත් තනියම අලුත්වල හංදියට යන්න තිබුන කම්මැලිකම නිසාත් මම මේ සැරේ පෙරහැර බලන්න ගියේ අපේ පාර ළඟට විතරයි. ඒත් ඒ වෙනකොටත් විශාල පිරිසක් පාර දෙපස රැස් වෙලා හිටපු නිසා මටත් ටිකක් එහෙට මෙහෙට වෙන්න සිද්ධ උනා.
මේ සැරේ පෙරහැරට විශේෂාංග 60කට අධික සංඛ්යාවක් එකතු කර තිබුනා. එහි විශේෂත්වය උනේ මෙවර කතරගම , දෙවුන්දර , සීනිගම වගේ අති විශාල ලෙස පවත්වම පෙරහැර වලින් විවිධ අංග පෙරහැරට එකතු කර තිබීම. එය අපේ ගමේ වගේම පෙරහැර බලන්න ආපු සියලු ම දෙනාට අලුත් අත්දැකීමක් උනා. ඒ වගේම වෙනදා දකිනවට වඩා වෙනස් ආකාරයේ නර්ථනාංග, වෛවර්ණ ඇඳුම් ආයිත්තම් පෙරහැරට ගෙනදුන්නේ අමතක නොවෙන වටිනාකමක්.
ගමේ ව්යාපාරිකයන් බොහොමයක් ඔවුන්ගේ නොමසුරු දායකත්වය මෙවරත් ලබා දුන් නිසා අලි ඇතුන් ගණනාවකින් මෙවරත් පෙරහැර සමන්විත උනා.
පස්වරු 3ට පමණ ආරම්භ කරපු පෙරහැර අපේ නිවෙස් අසලට එනවිට පස්වරු 5ට ආසන්න උනා. පොද වැස්ස පෙරහැරට තරමක අභියෝගයක් උනත් එය බාදාවක් නම් උනේ නෑ.
ඉතින් අලුත්වල පුරාණ නන්දාරාම විහාරස්ථානයේ 50 වන මිහිඳු මහා පෙරහැර සම්පූර්ණයෙන් නරඹන්නත් ඔබට අවස්ථාව තියෙනවා. ඉතින් තව පෝස්ටුවකින් රාත්රි මිහිඳු පූජා මහා පෙරහැර තුළින් මම ලබපු අත්දැකීම් ඔබට ගෙන එන්නම්....
අලුත්වල පෙරහැර කියන්නෙ අපේ සංස්කෘතික උරුමයක්. ගෙදර හිටියා නම් බලන්න එනවා අනිවාරෙන්. ඔයාට ස්තූතියි අපේ දේවල් වලට මෙහෙම තැනක් දෙනවට. ජය.