ලොවීනා | 10% for SL Charity

ලොවීනා නැමැති මෙම කතාව කතෘ මොහාන් රාජ් මඩවල මහතා තනි වැකියකින් සඳහන් කරන්නේ "මවුන්ට් ලැවීනියාවේ සැඟවුණු ආදර කතාව" ලෙසයි.

මට මේ කතාව සොයාගෙන කියවීමේ ආශාව ඇති වුනේ, අද හැම කෙනෙක්ම දන්න මවුන්ට් ලැවීනියා හෝටලය, ඉංග්‍රිසි යටත්විජිත සමයේ ඉංග්‍රිසි ආණ්ඩුකාරතුමන් ගේ නිල නිවස හා බැඳුනු ශෝකී ආදර කතාව සොයා යෑමට ඇති වූ කුකුසයි.

මාගේ පොත් කියවීමේ රුචිය හා කුතුහලය, මා රැයක් නිදිවරමින් පොත කියවීමට පෙලඹවීමට තරම් ශක්තිමත් විය. සෑම විටකම පාහේ එය එසේම සිදු විය. කතාවෙ නිමක් දැක මිස නින්දක් මට නොවීය.

මුලුමහත් කතාවම කියවා අවසානයේ, මාගේ හැඟීම් මොනවාදැයි තේරුම් ගත නොහැකි පරිද්දෙන් මා කතාව තුලම ගිලී සිටියෙමි.

ලොවීනා හුදෙක්ම ආණ්ඩුකාරවරයාගේත් රොඩී කෙල්ලකගේත් ආදර කතාවක්ම නොවන බව තේරුම් ගැනීමට කතාවේ මුල් පරිච්ඡේදයම ප්‍රමාණවත් විය.

ලොවීනා මේ දීර්ග කතාවේ එක් කොටස්කාරියක පමණක් ය. ඇයගේ කතාව මෙහි අතුරු කතාවක්‍ ය. මේ මුලු කතාවේම හිමිකාරිය ලොවීනාගේ කිරි අත්තම්මාය. කුල කාන්තාවක්ව ඉපිද, අන්තඃපුර කාන්තාවක් වන්නට වූ ඇයගේ ඉරණම රොඩී කුලයකට ලියවී ගියේය. පුන්නා ලෙස ඉපිද, පුන්නී නම් රොඩී ගැහැණිය වන්නට ඇයට සිදු විය.

_{අවසන් පිටුව බැලීමට මතක් වූයේ කතාව කියවාද අවසන් වූ විටය.}

කතාව තුල සිටින විවිධාකාර කාන්තාවන් ඔවුන් ගේ ජීවිතවල කටුකත්වය සමග අරගල කරන අයුරු මා ඔවුන් ඉදිරියේ සිට බලා සිටියෙමි. මේ කිසිවක් පිටතින් පෙනෙන අරගල නොවූ අතර, සියල්ලක්ම සිත්තුලම සිරකරගත් අභ්‍යන්තර අරගලයන්‍ ය. විටෙක තමාට ඇවැසි දේ දකින්නට දුම් කබල් දල්වන පුන්නාත්, කීරීත් ඒ දුක මොනවට කියාපෑහ. තවත් විටෙක දේවදූතයන් දකින පින්චීත්, පිච්චමල් සුවඳේ සිහිසුන් වන ලොවීනාත් තමන්ට ඇවැසි ලෙස සිත හසුරුවනා අයුරු පෙන්වූහ.

_{මේ සියල්ලම කතාව තුල ජීවත් වන කාන්තාවන්‍ යැයි මා සිතමි.}

එකල පැවති කුල මල භේදයන් නිසා, අනේක දුක් විඳි මිනිසුන් ගේ කතා මේ පොතතුල දැකිය හැක. රජුගේ සිට, රොඩී කුලයේ බයියා දක්වාත්, ඉන් ඔබ්බට පරංගිත්, ඉංග්‍රීසි ආණ්ඩුකාරවරයාත් දක්වා විවිධ පිරිමින් ගේ හැසිරීම් දැකගත හැකි විය.

කතාවේ අවසානයට පැමිණියද, මා තවමත් කතාව තුලම ජීවත් වෙමි. දස්කොන් ප්‍රේම කලේ ප්‍රමිලාටද, පුන්නාටද සිතමි. මේ හුදුමහත් කඨෝර දිවිය පුන්නී කෙලෙස දරාගත්තා දැයි සිතමි. තමා ලොවීනා අත්පත් කරගත්තේයැයි ආණ්ඩුකාරවරයා සිතුවේදැයි සිතමි. ඔහු සැබවින්ම ලොවීනාට ප්‍රේම කලේද, නැතිනම් ප්‍රේමයක් ලෙස අත්පත් කරගැනීමේ වුවනාවෙන් සිටියාදැයි සිතමි. තමාගේ ගැහැනිය අහිමි වීමේ දුකට උත්තියා කුමක් කරගත්තේදැයි සිතමි.

අවසානයේදී, අතුරුදන් වූ උත්තියා සොයා ගිය ලොවීනාට කුමක් සිදුවුනිදැයි මා වද වෙමි.