වලාකුළු රටා | 5% for SL Charity

සාමාන්‍යයෙන් මම හවස් වෙනකොට මිදුල පැත්තේ යන එක පුරුද්දක් වෙලා. මට වැඩ නැති දවසක් නම් මම ඒක වරද්දන්නේ නෑ. අද පොඩි කම්මැලිකමකුත් තිබුන නිසා, ටිකක් කලින්ම ඉස්තෝප්පුවට ආවා.

අහස නිල් පාටට, සුදු පාට වලාකුළු වලින් පිරිලා. මට පුන්චි කාලේ මතක් උනා. මං හරි ආසා දෙයක් තමයි වලාකුළු දිහා බලාගෙන ඒවාගේ හැදෙන රටා, රූප වලට නම් දෙන්න. පුන්චි කාලේ ඒ පුරුද්දට තාමත් වලාකුළක් දැක්කම ඒකේ හැඩයක් හොයාගන්න පුලුවන්ද​ කියලා බලනවා.

ඉස්සර හවසට, ගේ ඉස්සරහ තියෙන ගල් පොත්තෙ තාත්තා මාවත් වාඩි කරගෙන, අපි දෙන්නා අහස දිහා බලාගෙන ඉන්නවා. මගේ තාත්තා මට දීපු ලස්සනම තෑගි තමයි මේ. පරිසරය දිහා බලාගෙන, ඒ ලස්සන රසවිඳින්න, පරිසරයට ආදරය කරන්න.

_{ගල් තලාව}

අපි එහෙම වාඩි වෙලා ඉන්න වෙලාවට, වලාකුළු වල මැවෙන රටා, හවසට කුරුල්ලෝ රන්චු පිටින් කූඩු වලට පියාඹලා යන හැටි බලාගෙන ඉන්නවා. මේ වෙලාවට මම ගොඩක් දේවල් ඉගෙන ගන්නවා. ඒ ගැන ආයේ හිතනකොට තේරෙනවා, මේ තමයි තාත්තා අපිට පරිසරය පාඩම ඉගැන්නුව විදිය කියලා. ඒ අතින් එයාලා අපිට වඩා ගොඩාක් දියුණුයි.

සමහර දවසට, ඉර බැහලා ගියාට පස්සේ අහස පැහැදිලි නම් අපි තරු බලන්නත් ඉන්නවා. මං ඒ පුන්චි කාලෙට හරිම ආදරෙයි. තාත්තා ලගට වෙලා අහස දිහා බලාගෙන ලබන සරල සතුටට ආදරෙයි.

_{මකරෙක්ද​? 🧐}

අදත් මම අහස දිහා බලාගෙන අතීතයේ මතක අතරේ කිමිදිලා හිටියා. අද වලාකුළු ගොඩක් වැඩි දවසක්. ඒ නිසාම මට රූපනම් හොයාගන්න බැරි උනා. වෙනදටනම් වලාකුළු හාවෙක්, එහෙමත් නැත්නම් බබෙක්, සමහර වෙලවට මකරෙක්, සෙල්ලම් කරන පුන්චි සතෙක් දකින්න පුලුවන්. ඒත් අද ඒ කවුරුත්ම නැති වුනත් ලොකු, පොඩි වලාකුළු හුලඟ එක්ක තරගෙට පාවෙන විදිය බලාගෙන ඉන්නනම් එපා වෙන්නෙ නෑ.

අද ගොඩක්ම දකින්න ලැබුනේ කැටි වලාකුළු. සුදුම සුදු පාටයි පුළුන් ගොඩක් වගේ. වලාකුළු එක්ක එකතු වෙලා ඉර හැන්ගිමුත්තම් කරනවා වගේ පාරින් පාර, නොපෙනී යනවා. ඒ වෙලාවට දැනෙන අව්වත් ටිකක් අඩු වෙලා යනවා.

_{වලාකුළකට මුවා වුනු ඉර}

ඉතින් මේ විදියට​ මගේ දවසේ හවස් කාලය වලාකුළු දිහා බලාගෙන, පොඩිකාලේ මතකයන් එක්ක ගතවෙලා ගියා 💖.